اعملي بنفسك وصفات لتعطير الشعر بمكونات طبيعية
كل بنات حوا بيحرصوا على الاهتمام بشعرهم بالماسكات والكريمات ومنتجات الشعر المختلفة لكن الاهتمام بالشعر مش بيقتصر على الشامبو والماسكات بس عشان نكمل جماله لازم كمان نخلي ريحته حلوة دايما, لان بعض الماسكات او منتجات تصفيف الشعر مش دايما بيكون ريحتها حلوة, وكمان افراز الدهون الزيادة في فروة الراس بتأثر عليه وبتسبب ريحة مش حلوة, وعشان نعطر شعرنا ونخلي دايما ريحتة جميلة جايبين لكل بنات حوا طرق طبيعية لتعطير الشعر.
تعالوا نعرف مع بعض وصفات لتعطير الشعر:
1- وصفة مية الورد:
مية الورد من الحاجات الهايلة جدا لتعطير الشعر ومش بس بيعطره كمان بيحافظ على رطوبة الشعر وبيقلل من تجعيد وهيشان الشعر, ممكن تحطي مية الورد في ازازة ببخاخ وترشي على الشعر بعد ما تغسليه, او ترشي على فرشة الشعر وتسرحي بيها عشان توزعي مية الورد على الشعر كله.
2- وصفة الليمون:
– الليمون من الحاجات المفيدة جدا للشعر مش بس بيساعد في تعطيره كمان بيعالج قشرة الشعر, حطي عصير ليمون في ازازة ببخاخ ورشي على الشعر كله كويس سيبيه من 5 لــ 10 دقايق وبعدين اغسليه بالمية الطريقة دي فعالة في تعطيروتنضيف الشعر لانه الاسيد اللي في الليمون بيساعد على تنضيف فروة الراس بعمق وده بيحافظ على ريحة الشعر حلوة وبيعالج القشر.
– ممكن تعمليه بطريقة تانية ضيفي عصير ليمونة على كوباية مية ورشيها على شعرك بعد ما تغسليه بالشامبو وسيبيه 10 دقايق وبعدين اغسليه بالمية, وممكن تكرري الوصفة دي من مرة لمرتين في الاسبوع.
– وممكن نخلط عصير الليمون مع زيت اللافندر او زيت اكليل الجبل ودلكي فروة الراس بالخليط وسيبيه طول الليل على شعرك واغسليه الصبح, وتقدري تكرري الوصفة دي من 2 لــ 3 مرات في الاسبوع, وصفات الليمون غير انها بتعطر وبتنضف الشعر كمان بتفتح الشعر مع الوقت.
3- وصفة مية الورد والزيوت العطرية:
الوصفة دي عبارة عن نص كوباية مية ورد مع 5 لــ 10 قطرات اي نوع زيت عطري ممكن زيت اللافندر او الياسمين او زيت القرفة او زيت الورد يعني اي نوع مفضل ليكي هنصب المية في ازازة ببخاخ ونضيف عليها الزيت ونرج الازازة كويس عشان نخلط المكونات مع بعض كويس, وهنرش منه بعد غسل الشعر, ونرج الازازة كل مرة قبل كل استخدام.
4- وصفة القرفة:
هنجيب كوباية مية ورد وهنضيف عليها معلقة صغيرة قرفة مطحونة ونصب الخليط في ازازة ببخاخ ونرجهم كويس, ونرش منه على الشعر.
5- وصفة البرتقان:
– هنجيب كوباية مية ورد ونضيف عليها معلقة صغيرة من قشر البرتقان المجفف والمطحون “وبالنسبة لقشر البرتقان سهل نعمله هنحط القشر في الشمس لحد ما ينشف خالص وبعدين نطحنة في الخلاط هيبقى عندنا زي البودر ناخد منه ونحطه مع مية الورد”, ونحط الخليط في ازازة ببخاخ ونرش منه على الشعر والخليط ده ممكن نستخدمة كمان كمعطر للجسم بيخلي ريحته حلوة جدا.
– وممكن نعمله بطريقة تانية اننا نجيب كوباية مية عادية ونضيف لها معلقة قشر برتقان ونحط الخليط على النار ونسيبه لحد ما يغلي ونسيبه لحد ما يبرد وبعدين نحط الخليط على الشعر بعد ما نغسله ونسيبه 10 دقايق وبعدين نغسله بالمية.
6- وصفة المخمرية:
المخمرية من الحاجات المعروفة في الخليج على طول بيستخدموها لتعطير الشعر والجسم, هنجيب مكعب مسك احمر “من عند العطار” نبشره ونضيف عليه معلقة كبيرة مية ورد ومعلقة كبيرة جليسرين ونحط المكونات دي كلها في حمام مية سخنة لحد ما يدوبوا كويس مع بعض وبعدين هنضيف عليهم علبة كريم جليسوليد “وممكن نستبدل الجليسوليد بعلبة فازلين” هنقلب الخليط كويس جدا وبعدين حطيها في اي علبة كبيرة اوبرطمان عندك, اسخدمية على الشعر خدي كمية بسيطة وافركيها في ايدك وادهني شعرك بيها بعد ما تغسليه, وممكن كمان تدهني بيها الجسم بعد ما تستحمي وهو مبلول بتدي ريحة تحفة للشعر والجسم.
7- وصفة مية الورد وزيت جوز الهند:
هنخلط ربع كوباية مية ورد ومعاها زيت جوز الهند و15 نقطة من اي نوع زيت عطري تفضليه او ممكن تختاري اكتر من نوع تمزجيهم مع بعض, هنخلط المكونات مع بعض كويس ونحطهم في ازازة ببخاخ ونستخدمها على الشعر, الوصفة دي مش بتدي ريحة حلوة بس لكن كمان بتدي لمعة حلوة اوي للشعر وبتحافظ على رطوبتة وبتنعمه.
8- الزيوت العطرية:
ممكن نستخدم الزيوت العطرية لوحدها لتعطير الشعر هنضيف كام نقطة من اي زيت عطري على الشامبو او البلسم بتاعنا وكل ما تيجي تغسلي شعرك هتلاقي ريحته حلوة والريحة هتثبت فيه مع الاستخدام, والزيوت العطرية مش بس بتعطر كمان هتخلي شعرك صحي.
9- معطرات الجسم:
ممكن تستخدمي الاسبراي المعطر للجسم على الشعر لو بتستخدمي اي معطر للجسم ممكن ترشي منه على شعرك هيخلي ريحتة حلوة لفترة طويلة.
10- البرفان:
ممكن كمان نستخدم البرفان العادي بتاعنا نرش منه على الشعر عشان نعطره, هترشي رشة من البرفان في الهوا وتعدي تحتها بسرعة عشان تاخدي الرزاز بتاع البرفان بس ومتبقاش الريحة اوفر اوي زيادة عن اللزوم, او ممكن ترشي رشة على فرشة الشعر من بعيد بردوا عشان تاخدي الرزاز بس وتسرحي شعرك بيها.
11- الشامبو الجاف:
احنا اتكلمنا قبل كده عن الشامبو الجاف وازاي ممكن نعمله بنفسنا في البيت, هو يعتبر من الحاجات اللي بتدي ريحة حلوة للشعر لان كل مكوناته ريحتها حلوة ده غير انه بينضف الشعر من الزيوت.
12- منتجات تصفيف الشعر:
ممكن نستخدم منتجات تصفيف الشعر سواء الشامبو او البلسم او الكريم اللي بعد غسيل الشعر من المنتجات اللي بتحتوي على فواكة في مكوناتها دي هتساعد انها تدي ريحة حلوة للشعر.
اعملي معطر طبيعي لجسمك في البيت
