21 نصيحة وحيلة عشان تستمتعي بوقتك على البحر

بقلمريهام محمود فيمنوعات visibility6064

وقت الصيف والبحر بنبقى عايزين نستغل كل دقيقة ونستمتع بوقتنا وننبسط عشان كده جمعنا النهرده للبنات حيل جامدة جدا إزاي تتجنبي ال sun burn وتظبطي شعرك وتعملي curls صبح وليل, جربي خدعة التان تاتو وحيل تانية كتير هتخليكي تقضي وقت ممتع جدا علي البحر!

تعالوا نعرف مع بعض 21 نصيحة وحيلة عشان تستمتعي بوقتك على البحر:

1- اعملي ليسته بكل حاجة:

اعملي ليسته او قايمة بكل حاجة هتاخديها معاكي عشان متنسيش حاجة وتقدري تستغلي الوقت كله في الاستمتاع بالبحر واحنا قولنا لكم بالتفصيل قبل كده ايه اللي ممكن تاخدوه معاكم تقدروا تشوفوه من هنا اعرفي معانا ازاي تجهزي نفسك للصيف والبحر.

دوني كل اللي محتاجاه في المصيف
دوني كل اللي محتاجاه في المصيف

2- اعملي تان تاتو:

جربي حاجة جديدة في الصيف واعملي تان تاتو ده احدث حاجة نازلة في الصيف,بتعملي تاتو بالتان بيبقى حلو جدا ومختلف, ممكن تشوفوا طريقته وازاي تعملوه بالصور من هنا التان تاتو اجدد تريند في صيف 2016.

اعملي تان تاتو
اعملي تان تاتو

3-اعملي سبراي ملح البحر عشان تعملي شعرك ويفي:

عشان تدي شعرك لوك حلو ويفي طبيعي استخدمي سبراي ملح البحر وممكن تعمليه بنفسك في البيت بمكونات بسيطة جدا هنجيب ازازة ببخاخ ونملى نصها بالمية والنص التاني نملاه اي نوع جل للشعر من اللي بيستخدم عشان نعمل الشعر كيرلي ونضيف عليهم تقريبا معلقة كبيرة ملح البحر ونقفل الازازة ونرجها كويس عشان نخلط المكونات, وبعدين نرشه على شعرنا وهو ناشف, وبكده تبقي عملتي شعرك كيرلي وادتيه لوك حلو بسهولة جدا.

اعملي بنفسك سبراي ملح البحر
اعملي بنفسك سبراي ملح البحر

4- استخدمي جل الالوفيرا لحروق الشمس:

في الصيف في بنات كتير بيتعرضوا لحروق الشمس بسبب التعرض للشمس لفترات طويلة وعشان نعالج الحروق دي هنستخدم مكون بسيط جدا وهو جل صبار الالوفيرا, املي مكعبات التلج بجل الالوفيرا وحطيه في الفريزر لحد ما يتجمد وبعدين فضي المكعبات في كيس بلاستيك وخديه معاكي في المصيف حطيه في الفريزر واستخدمي منه كل يوم مرري المكعب على البشرة هيهديها ويعالج الحروق.

مكعبات الألوفيرا عشان حروق الشمس
مكعبات الألوفيرا عشان حروق الشمس

5- استخدمي البيبي بودر عشان تتخلصي من الرملة على بشرتك:

الرملة اكتر حاجة بتبقى مزعجة لينا لانها بتلزق في البشرة وبتطلع بصعوبة جدا ومش بنعرف نتخلص منها ازاي, احنا هنقولك ازاي تتخلصي منها بطريقة سهلة جدا وهي باستخدام الببيي بودر هتجيبي البيبي بودر تحطي منه شوية على ايدك وافركي ايدك في بعض واغسليهم عادي كانك بتغسلي ايدك بالمية والصابون, واعملي نفس الطريقة على جسمك لو في رملة لازقة فيها هتلاقي الرملة نزلت من بشرتك بسهولة جدا.

استخدمي البيبي بودر عشان تتخلصي من الرملة على بشرتك
استخدمي البيبي بودر عشان تتخلصي من الرملة على بشرتك

6- اعملي حامل للازايز:

عشان تحمي ازايز المية والعصير من الرملة ممكن تعملي ليها حامل بطريقة بسيطة جدا, هتجيبي اي كان فاضي عندك في البيت اغسليها كويس وشيلي الورقة اللي بتبقى لازقة عليها من بره, هاتي اي حتة قماش ملون عندك قصي على قد العلبة وادهني العلبة من بره بالغرا وبعدين لفي القماش على العلبة والزقيها كويس, وبعدين قصي شريط رفيع تاني من القماش ممكن تلزقيه على حرف العلبة من فوق مكان الغطا عشان تغطيه عشان متتعوريش منه لانه بيبقى حامي, وحطي في العلبة من تحت مسمار طويل وثبتيه بالغرا, وكدة يبقى الحامل جاهز عندنا.

حامل الازايز
حامل الازايز
حامل الازايز
حامل الازايز
حامل الازايز
حامل الازايز
حامل الازايز
حامل الازايز
اعملي حمالة الزجاجات وخديها معاكي البحر
اعملي حمالة الزجاجات وخديها معاكي البحر

7- استعملي ورق الكب كيك عشان الايس كريم ميسحش على ايدك:

اجمل حاجة في الصيف الاستمتاع باكل الايس كريم في جو الحر والبحر, بس مشكلتنا معاه ان الحر بيخليه يسيح على ايدينا وعشان ناكله باستمتاع من غير ما يسيح وينزل على ايدينا ممكن نستخدم ورق الكب كيك نحطه في ستيك الايس كريم من تحت وبكده اي حاجة هتنزل من الايس كريم هتنزل جوه الورق وهتحمي ايدك.

استعملي ورق الكب كيك عشان الايس كريم ميسحش علي ايدك
استعملي ورق الكب كيك عشان الايس كريم ميسحش علي ايدك

8- اعملي السكارف بتاعك كاش مايوة:

بدل ما تشتري كاش مايوة جديد عشان توفري ممكن تعمليه بنفسك باي سكارف عندك بطريقة سهلة جدا زي الخطوات اللي في الصورة.

اعملي السكارف بتاعك كاش مايوة
اعملي السكارف بتاعك كاش مايوة

9- اعملي سبراي لانعاش بشرتك:

في حرارة الجو ورطوبة البحر بنبقى محتاجين حاجة تنعش بشرتنا وتهديها من حرارة الجو والرطوبة , ممكن نعمل بنفسنا سبراي منعش وهيحمي بشرتك من الجفاف اللي ممكن تسببه الشمس وكمان هيدي ريحة حلوة للبشرة, هنعمله بطريقة بسيطة جدا هنجيب ازازة ببخاخ ونملاها بمية سقعة وهنحط فيها 2 باكيت شاي اخضر ونسيبه من ساعة لساعتين وبعدين نشيلهم وممكن نضيف مكعبات تلج كمان ده اختياري لو انتي حابة وتقفلي الازازة وتاخديها معاكي على البحر وتستخدمي السبراي على بشرتك كل ما تحسي بالحرارة.

اعملي سبراي لانعاش وحماية بشرتك
اعملي سبراي لانعاش وحماية بشرتك

10- استخدمي زيت الاطفال لازالة الشعر الزائد:

طبعا ازالة الشعر من الحاجات المهمة جدا اللي لازم نعملها قبل ما نروح البحر, ممكن تعملي ازالة للشعر بطريقة سهلة هنجيب زيت اطفال جونسون وندهنه على بشرتنا ونبل مكنة الحلاقة ونبدأ نشيل بيها الشعر وبعد كده اغسلي البشرة ورطبيها, والطريقة دي مش بتسبب اي التهاب للبشرة وخصوصا مع نزول البحر وحرارة الشمس يعني طريقة آمنه جدا وسهلة في نفس الوقت.

استخدمي زيت الاطفال لازالة الشعر الزائد
استخدمي زيت الاطفال لازالة الشعر الزائد

11- اعملي جيوب لفوطة البحر:

ممكن تستغلي فوطة البحر تعملي فيها جيوب تشيلي فيها اي حاجة زي الهاند فري او الصن بلوك او كتب, وطريقتها سهلة اوي هنتني جزء من الفوطة ونقسمه جيوب باحجام مختلفة حسب ما احنا عايزين ونخيط ما بينهم.

اعملي جيوب لفوطة البحر
اعملي جيوب لفوطة البحر

12- استخدمي البالونات للتبريد:

لو واخدين معانا ايس بوكس على البحر عشان نحتفظ بالاكل والمشروبات بتاعتنا فيه ممكن بدل ما نملاه بالتلج نعمل حيلة احسن هنجيب بالونات ونملاها مية ونخليها طول الليل في الفريزر لحد ما تتجمد ونحطها الصبح في الايس بوكس ونحط فيه الاكل او المشروبات او اي حاجة معانا عايزين نحتفظ بيها باردة.

استخدمي البالونات للتبريد
استخدمي البالونات للتبريد

13- استخدمي البرطمانات الفاضية حطي فيها السناكس:

ممكن نستخدم البرطمانات الفاضية عندنا ونحط فيها السناكس اللي هناخده معانا البحر عشان نحميها من الرملة.

استخدمي البرطمانات الفاضية حطي فيها السناكس
استخدمي البرطمانات الفاضية حطي فيها السناكس

14- حطي الايس كريم في كيس بلاستيك:

عشان نحتفظ بالايس كريم زي ما هو من غير ما يسيح مننا من حرارة الجو حطيه في كيس بلاستيك “الزيبلوك” واقفليه كويس وخديه معاكي البحر في اكياس هيقعد معاكي متجمد زي ما هو.

ايس كريم في شنطة
ايس كريم في شنطة

15- لمي شعرك بالسكارف بطريقة حلوة:

ممكن تلمي شعرك على البحر بالسكارف بطريقة بسيطة وشيك هتجيبي سكارف كبير وتتنيه نصين بالطريقة العادية وتحطيه على الشعر وتربطيه من ورا هيحمي شعرك من الشمس والحرارة والرملة وفي نفس الوقت هيبقى شكله حلو.

لمي شعرك بالسكارف بطريقة حلوة
لمي شعرك بالسكارف بطريقة حلوة
لمي شعرك بالسكارف بطريقة حلوة
لمي شعرك بالسكارف بطريقة حلوة

16- استخدمي خلة السنان او الشوك البلاستيك للاكل:

طبعا على البحر بتبقى ايدينا على طول مبلولة بمية البحر وفيها رملة, فاحسن حاجة عشان ناكل السناكس على البحر نستخدم خلة السنان او شوك بلاستيك.

استخدمي خلة السنان او الشوك البلاستيك للاكل
استخدمي خلة السنان او الشوك البلاستيك للاكل

17- اعملي حافظة للفلوس بعلبة البرشام:

ممكن نعمل حافظة للفلوس بتاعتنا عشان نحميها من المية والرملة,  هنجيب اي علبة برشام فاضية عندنا ونجيب الغطا بتاعها نخرمه من النص ونجيب حتة حبل صغيرة وندخل الحبل في الخرم ونربطه عقدة ونعمل عقدة تانية على الحبل من بره عند الجزء بتاع الغطا ونثبته من جوه ومن بره من عند الهقدة بالامير او بالغرا, وكده تبقى الحافظة جاهزة عندنا ممكن نعلقها في رقبتنا او نربطها في ايدينا.

اعملي المحفظة اللي مش بتضيع ولا بتغرق في الميه
اعملي المحفظة اللي مش بتضيع ولا بتغرق في الميه

18- اعملي خيمة بحر:

ممكن نعمل خيمة بحر بنفسنا, هنجيب قماش من التخين الخشن ده زي اللي بيتعمل بيه قماش الشماسي ونجيب على قد ما احنا عايزين حجم الخيمة كبيرة او صغيرة, وهنجيب اربع قطع خشب بطول الخيمة لما نتنيها نصين ونعمل في كل قطعة خشب خرمين على طرفين الخشبة, ونجيب قطعتين خشب رفيعين بطول الخيمة, بعد ما جهزنا القماش والخشب بتاعنا هنتني القماش من الجنبين من تحت ونخيطها ونحط في الفتحة بتاعة التنية من كل ناحية قطعة الخشب الرفيعة, وبعدين نثبت قطع الخشب اللي احنا خرمناها قصاد بعض على القماش ونثبتهم بمسامير, وكده تبقى الخيمة بتاعتنا جاهزة ناخدها معانا على البحر.

خيمة البحر
خيمة البحر

19- اعملي جيب ضد المية:

ممكن نعمل جيب جوه الشنطة ضد المية نحط فيه الحاجات المهمة زي الفلوس والموبايل مثلا, هنجيب حتة قماش بلون قريب من لون الشنطة او اي لون يمشي معاها وتكون مربعة بالحجم اللي احنا عايزين نعمل بيه الجيب كبير او صغير, ونجيب حتة قماش تانية صغيرة بلون تاني عشان نخيط عليها السوستة بتاعة الجيب, حتة القماش الكبيرة المربعة اللي هنعملها جيب نخيطها من الاربع اطراف يعني هتبقى مقفولة من كل الجهات وبعدين نجيب القماشة التانية اللي هنخيط عليها السوستة نخيطها عندنا على القماشة المربعة ونفتحها بالمقص من النص حسب طول السوستة اللي احنا هنحطها وبعدين ندخل باقي القماش من جوه ونخيطه وبعدين نخيط السوستة, كده يبقى الجيب جاهز عندنا.

جيب ضد الميه
جيب ضد الميه
جيب ضد الميه
جيب ضد الميه

20- اعملي بسين للولاد من مية البحر:

ممكن للولاد الصغيرين اللي بنبقى خايفين عليهم من نزول البحر نعملهم بسين صغير على الشاطيء من مية البحر هينبسطو وفي نفس الوقت يبقوا في امان قدام عينك, هنعمل حفرة في الرملة غويطة شوية ونحط عليها كيس بلاستيك كبير يغطي الحفرة ويبقى طالع منه جزء بره الحفرة نغطيه بالرملة عشان نثبته وبعدين نملاه من مية البحر بالجردل وتسيبي الولاد يلعبوا فيها ويستمتعوا بامان من غير خوف عليهم.

اعملي بسين للولاد من ميه البحر
اعملي بسين للولاد من ميه البحر

21- استخدمي بوكس بلاستيك لتخزين العاب البحر:

خدي معاكي على البحر بوكس بلاستيك كبير حطي فيه كل العاب البحر عشان متضيعش منك ويبقى سهل توصلي لها, خصوصا في الشواطيء العامة اللي بتكون زحمة اوي اي حاجة ممكن تضيع منك, عشان كده الافضل تجميعهم وتحفظيهم في بوكس كبير جنبك, او ممكن تستخدمي شنطة شبك كبيرة تحفظي فيها الحاجة والميزة في الشبكة انك هتقدري تنزلي منها الرملة بسهولة بدل ما تتجمع وتلزق في الشنطة المقفولة.

استخدمي بوكس بلاستيك لتخزين العاب البحر
استخدمي بوكس بلاستيك لتخزين العاب البحر
جمعي لعب الاطفال في شبكة
جمعي لعب الاطفال في شبكة

شوفي 23 نصيحة لجمالك عشان تستمتعي بالصيف

23 نصيحة لجمالك في الصيف
23 نصيحة لجمالك في الصيف