حولي بنطلونك القديم لهوت شورت ديرتى بالصور والفيديو
زى ما احنا فى ” بنات حوا ” بنحاول نجيبلكم دايما كل جديد فى الموضة و الازياء ، و بنحاول كمان نلاقى افكار و طرق حلوة و جديدة علشان نستغل كل حاجه و نطلع منها حاجه حلوة ، النهاردة فى المقال ده هنقولك على استخدام حلو اوى للبنطلونات الجينز اللى دايما لما بتقدم او موضتها بتروح او لونها بيتغير بتبقى اول حاجه بييعملها معظمنا انه بيرميها او بنبطل نلبسها و نركنها فى الدولاب ، بس خلاص مش هتعملى كده تانى ! فى المقال ده اعرفى معانا طريقة سهلة و بسيطة جدا تعرفى بيها إزاي تحولي بنطلونك القديم لـهوت شورت ديرتى بالصور والفيديو و فى وقت قليل جدا بنفسك فى البيت ..
حولي بنطلونك القديم لـهوت شورت ديرتى بالصور والفيديو
الخطوة الاولى : اتنى رجلين البنطلون على بعضهم و بقلم ارسمى خط حسب الطول اللى تحبيه علشان تقصى الرجلين . بعد ما ترسمى الخط ابدأى امشى عليه بالمقص علشان الرجلين يتقصوا مع بعض و يطلعوا بنفس الطول و متساويين .
الخطوة الثانية : بعد ما تقصى الرجلين حسب الطول اللى حددتيه ، البسى الشورت و بقلم او دبابيس اعملى خط حسب الشكل اللى تحبيه ” خط مستقيم او دوران ” بس ارسمى الخط بعد سنتى او 2 من الطول اللى حددتيه علشان لما تيجى تتنى الشورت ميبقاش اقصر من الطول اللى انتى عايزاه .
الخطوة الثالثة : اقلعى الشورت و ابدأى قصى على الخط اللى رسمتيه ، و بعدين اتنى البنطلون على بعضه و قصى الرجل التانية على الرجل الاولى علشان يطلعوا زى بعض بالضبط .
الخطوة الرابعة : بعد ما تقصى رجلين البنطلون ممكن باستخدام cutter او موس تبدأى تعملى خطوط او فتحات فى رجلين الشورت علشان تديله اللوك الديرتى و اما تخلصى اغسلى الشورت فى الغساله علشان تتخلصى من الخيوط الصغيرة اللى هتطلع من البنطلون و انتى بتعمليه .
و بكده تكونى حولتى البنطلون الجينز بتاعك لـهوت شورت ديرتى فى اربع خطوات بس :) ، شوفى كمان فيديو فيه الخطوات بالتفصيل
و اعرفى معانا كمان ازاي توسعي وسط البنطلون الجينز بخدعة ذكية ؟
