اعرفي معانا ازاي تستخدمي خل التفاح لازالة الشامة
بالرغم ان الشامة في الغالب بتكون من علامات الجمال ومش مضرة ولا بتسبب اي ازعاج لكن ساعات بيكون شكلها مش حلو وبتشوه شكل الوش وبنبقى متضايقين منها , والشامة هي بتبقى عبارة عن خلايا صبغية اتجمعت في مكان واحدة بدل ما تتوزع على الجسم كله وكونت الشامة, وبيكون من الاسباب الرئيسية لظهورها هو التعرض الزيادة للشمس او تغيرات هرمونية في الجسم
طبعا في علاجات جراحية لازالتها او بالليزر من غير تدخل جراحي لكن في الغالب بتسيب مكانها علامة او ندبة مش بتروح, لكن احنا النهاردة هنقولكم على طرق طبيعية لازالة الشامة بشكل فعال جدا ومن غير ما تسيب اي اثر او ندبة بعد ما تروح باستخدام خل التفاح هو يعتبر من الحاجات الفعالة جدا في علاج الشامة لان الطبيعة الحمضية للخل بتساعد على تحلل انسجة الشامة, مع الاستمرار في استخدامه هتلاقي الشامة اختفت تماما:
تعالوا نعرف مع بعض وصفات من خل التفاح لازالة الشامة:
1- وصفة خل التفاح:
– هنجيب حتة قطن على قد حجم الشامة ونبلها كويس بخل التفاح ونحطها على الشامة ونثبتها بلزق الجروح او بلستر ونسيبها عليها من 6 لــ 8 ساعات, وخلال الفترة دي نبدل القطنة اكتر من مره كل ما تنشف.
– ممكن نحط خل التفاح بطريقة تانية نجيب ابره او دبوس ونسخن السن بتاعها ونمسحها بالكحول عشان نطهرها ونعقمها قبل ما نستخدمها وبعدين هننغز بيها الشامة مرتين عشان ده هيساعد ان خل التفاح يدخل جواها ويجيب نتيجة احسن واسرع, هنبل القطنة بخل التفاح ونحطها على الشامة ونثبتها بلزق الجروح ونسيبها 20 دقيقة وبعدين نغسلها وننشفها وندهنها زيت جوز هند, كرري الوصفة لمدة 6 ايام ورا بعض على الاقل لحد ما تختفي الشامة.
– وفي طريقة كمان اننا نرش على الشامة مية وبعدين نجيب مبرد خشب من بتاع الضوافر العادي بس يكون واحد جديد ونضيف غير اللي بنستعمله لضوافرنا ونفرك بيه الشامة بالراحة وبعد كده هنبل قطنة بخل التفاح ونسيبها على الشامة لحد ما القطنة تنشف وبعدين نغسلها بالمية وندهنها زيت جوز هند, وممكن نكرر الوصفة دي اكتر من مره في اليوم.
2- وصفة حمام خل التفاح:
الطريقة دي مفيدة للشامات اللي في الجسم, هنملى البانيو بمية دافية ونحط فيها معلقتين كبار خل تفاح وتنقعي جسمك فيها لمدة 20 دقيقة, وبعدين تغسلي جسمك عادي بالمية والشاور, كرري الوصفة مرتين في اليوم.
3- وصفة خل التفاح وعصير البصل:
هنخلط كميات متساوية من خل التفاح وعصير البصل ونبل قطنة بالخليط ونحطها على الشامة ونثبتها بلزق الجروح ونسيبها طول الليل ننام بيها ونشيلها الصبح ونغسلها بالمية, كرري الوصفة كل يوم.
4- وصفة خل التفاح وعصير الفجل:
هنبشر الفجل ونصفيه لحد ما نطلع منه العصير ونخلط معاه نفس الكمية خل تفاح وعسل ابيض, نبل قطنة بالخليط ونحطها على الشامة ونسيبها 20 دقيقة وبعدين نغسلها بالمية, نكرر الوصفة كل يوم.
5- وصفة خل التفاح وصودا الخبز:
اخلطي كميات متساوية من خل التفاح وصودا الخبز “كربوناتو” لحد ما تكون عندك عجينة حطيها على الشامة وسيبيها 20 دقيقة وبعدين اغسليها بالمية, كرري الوصفة مرتين في اليوم.
6- وصفة خل التفاح والعسل:
اخلطي كميات متساوية من خل التفاح والمية وبعدين ضيفي عليهم نص معلقة عسل واخلطيهم كويس مع بعض, ادهني الشامة بالخليط وسيبيها 20 دقيقة وبعدين اغسليها بالمية, كرريها يوميا.
7- مشروب خل التفاح:
ضيفي معلقة صغيرة خل تفاح لكوباية مية واشربيها يوميا لحد ما تختفي الشامة, ولو عايزة تغيري طعم المشروب ممكن تضيفي له معلقة صغيرة عسل نحل ومعلقتين صغيرين عصير ليمون.
– نصايح لما نيجي نستخدم خل التفاح:
1- ممكن تحسي بلسعة بسيطة لما تحطي خل التفاح ده طبيعي مافيش قلق منه وممكن تخففي الخل بشوية مية عشان ميسببش اللسعة دي للبشرة.
2- لازم نحرص دايما نحط الصن بلوك قبل ما ننزل في الشمس لان زي ما قولنا التعرض للشمس هو من الاسباب الرئيسية في ظهور الشامات.
3- نستخدم زيت جوز الهند ندهن بيه الشامة بعد كل مره نعمل فيها وصفة من وصفات الخل.
4- لو بشرتك حساسة من الخل ادهني حوالين الشامة بالفازلين عشان تحمي البشرة من تأثير الخل.
5- ممكن بعض الشامات بتكون بداية اورام سرطانية عشان كده الافضل اننا نروح نكشف عليها عند دكتور جلدية قبل تجربة اي علاج طبيعي لو لقينا انها مجرد شامة عادية ومش ورم نستخدم العلاجات الطبيعية.
6- نتجنب خالص خدش الشامة بالايد او باي طريقة عشان متسيبش علامة والمشكلة تسوء اكتر.
شوفي وصفات طبيعية للتخلص من رائحة القدم الكريهة
