إزاي تكسب قلب انثى برج السرطان؟
انثى السرطان اتكلمنا عنها بالتفصيل وقلنا اد ايه هي حنينة وهي الأكثر عاطفية بين كل بنات الأبراج.. حساسة وبتهتم بكل اللي حواليها وفعلا بيبقي هدفها الدائم هو اسعادهم, بس يا تري إزاي ممكن تكسب قلبها؟؟ تعالوا نعرف سوا في الموضوع ده الطريق الي قلب انثى برج السرطان!
1- متخفش تبان ضعيف:
الجانب الحنين في شخصية السرطان بيبان قوي لما بتحس إن شريكها محتاجلها وضعيف قدامها.. متكسفش إنك تبين ده معاها حتي لو إنت قوي وجامد أكيد كل انسان وليه نقط ضعفه وأوقاته اللي بيبقي محتاج فيها لحب وحنية وحد يثق فيه ويرمي عليه حمله .. لو إنت شريكتك سرطان يبقي يا بختك بيها لانها احن وارق انسان في الدنيا خصوصا لما يكون شريكها محتاجلها.
2- العيلة والذكريات:
عيلتها مهمة جدا عندها.. أتكلم معاها عن عيلتها وذكريات زمان زي اتولدت فين وأهلها واخواتها وكانت بتسافر معاهم فين وكمان شاركها بذكرياتك مع عيلتك وصورك وإنتي صغير.. عيلتها عندها كوم ومامتها كوم تاني خالص, انثي السرطان بتربطها علاقة قوية جدا بمامتها ودايما بتاخد رأيها في كل حاجة عشان كده أنت كمان لازم تهتم بمامتها وتعاملها كأنها مامتك بظبط عشان تكسب ثقتها وحبها.
3- علي مهلك عليها وخليك حنين:
اوعي تستعجلها في موضوع المشاعر لانها بتحب تاخد وقتها وتتأكد من مشاعرها قبل ماتاخد أي قرار في موضوع الحب والعلاقات.. بلاش اسأله كتير وضغط بالعكس خليك حنين وحساس ومتفهم النقطة ديه عندها.. بتاخد وقت عشان تثق فالاخرين لأن حساسيتها الزيادة ممكن بسهولة تعرضها لجرح بس خليك واثق مجرد إنها تقع في الحب بتقع لشوشتها وبتبقي صبورة جدا وممكن تصبر وتدافع عن حبها للنهاية قدام أي مصاعب.
4- بلاش تستغلها:
كتير من الرجالة ممكن يفكروا يستغلوا انثي السرطان عشان طيبتها وحنيتها ومشاعرها المرهفة.. بس لو بجد عايزة تكسب قلبها اوعي تقع في الغلطة ديه , هي ممكن تسامحك مرة و 10 مرات كمان بس لو حسيت إنك بتستغلها هي عمرها مابتقدر تنسي اللي بيأذيها عن عمد وقصد وعمرها ماهتسامحك علي الغلطة ديه وهتخسرها للأبد.
5- عاملها بالأصول:
في عصر الحرية اللي احنا عايشينه هنلاقي انثي السرطان متحفظة جدا.. تعشق العادات والتقاليد وطرق الحب القديمة اللي كانت كلها رومانسية و “سهوكه” :D والتقدير والأحترام المتبادل .. مش معني كده إنها مملة مثلا أو مش ماشية مع العصر بالعكس هي شيك وبتهتم بنفسها وشكلها ولبسها جدا بس هي مش بتحب الجنون والافوره في مواضيع الحب والعلاقات وهتحبك جدا لو إنت كمان زيها طبعك من طبعها هادي وبتقدس العادات والتقاليد وتحبها نوع الحب الرومانسي اللي هي بتحبه.
طبعا المشاعر دي حاجة مش بإيدينا يعني مش شرط انك تنفذ الخطوات دي وتكون نتيجتها ايجابية تماما واكيد كمان في فروق فردية بين الناس وبعض يعني الكلام ده مش حينطبق على كل بنات السرطان، لكن دي محاولة مننا عشان نفهمك طبيعة انثى السرطان وتخليك تتعامل معاها بالشكل المناسب. أهم نصيحة من بنات حوا عشان تكسب قلب أي بنت هي إنك متمثلش وإنك تخليها تنجذب لشخصيتك الفعلية مش شخصية إنت بس بتعيشها عشان تجذبيها ليك, لانك غصب عنك وبعض فترة هترجع لشخصيتك الأصلية ووقتها ممكن تحصل مشكلة كبيرة لما تحس إن مش ده الرجل اللي هي حبته…
