التان تاتو : اجدد تريند في صيف 2016
تريند جديد انتشر الصيف ده وهو التان تاتو .. لو فيه أي حد منكم يا بنات متابع بنترست هيلاقي صور كتير نازله لبنات حطه الصن بلوك علي كتفها أو رجلها بأشكال ورسومات وقاعدة بتاخد تان في الشمس.. هو ده بظبط التان تاتو إنك تبقي قاعدة بتخدي تان في الشمس ومعرضة جزء من بشرتك للشمس ومخبية جزء بإستعمال الصن بلوك.
طيب إزاي تظبطي شكل رسمة التاتو, هنشوف بالتفصيل الطرق إزاي ممكن تستعملي ورق كرتون, silly bands اللي بيلعبوا بيها الولاد الصغيرين , عاملة رسمة بالمانيكير علي جلدك, أو حتي لابسة اكسسوارات فيه رسمة مفرغة.. الجزء اللي مستخبي ومش واصلة الشمس ده لونه مش هيتغير ومش هياخد تان زي باقي بشرتك ووقتها الرسمة اللي إنتي كنتي عملاها عليه هتبان وهتبقي باينة بلون جلدك الطبيعي ومختلفة عن لونك التاند الجديد.
احلي حاجة لازم تبقي عارفاها عن التان تاتو انه طبعا مش دائم وبيروح لوحدة بعد اسبوع أو أكتر لما لونك يبدأ يرجع للونه الطبيعي, وكمان مناسب قوي لجو الصيف و ال FUN إنك مثلا ترسمي قلب علي كتفك أو سمايل فيس علي ايدك, ممكن كمان تكتبي اسم حبيبك وهتبقي لمسة رومانسية جميلة وذكري لوقت الصيف الممتع.
يلا نشوف الطرق المختلفة لعمل التان تاتو:
أول نصيحة قبل عمل التاتو, اعملي تقشير لبشرتك عشان تتخلصي من أي جلد ميت وتخلي بشرتك صافية عشان وقت التاتو يقعد أكتر.
1-عمل التان تاتو بالورق المقوي:
شوفي من هنا لو عايزة تعملي شكل معين للتاتو ممكن ترسميه علي ورقة وتقطعيها بالكطر عشان تفرغيها وبعدين تحطيها علي المكان اللي عايزة تعملي فيه التاتو وتمليه صن بلوك وتشيلي الورقة من علي جسمك واقعدي في الشمس. عشان التاتو يبان أكتر ممكن تكرري الموضوع ده أكتر من يوم بس اهم حاجة تظبطي مكانه بظبط في نفس المكان اللي عملتي فيه التاتو قبل كده.
2- عمل التان تاتو بالمانيكير:
حددي الأول شكل الرسمة اللي إنتي عيزاها بقلم مكياج الأول وبعدين أمشي عليها بالمانيكير, هتستني لحد لما المانيكير ينشف تماما وبعدين تعملي حمام الشمس, وبعد ماترجعي البيت وقبل الشور شيليه بالاسيتون وقطنة من علي جسمك هتلاقي مكانه عمل التاتو بالرسمة اللي حددتيها.
3- طريقة عمل التان تاتو بالسيلي باند Silly Band :
السيلي باندز بتاعة الأطفال اللي بيجيبوها عشان يلعبوا بيها أو يلبسوها في ايديهم ممكن تستعمليها, الاول حتي التان اويل بتاعك وبعدين ثبتيها علي جسمك وخدي حمام الشمس ولما تيجي تشيلها هتلاحظي الفرق وإنها عملت تاتو مفرغ.
4- عمل التان تاتو بالاكسسوار:
لو عندك خاتم, اسورة أو سلسلة مفرغة ممكن تلبسيها وتعرضي ايدك أو الجزء اللي عايزة تعملي فيه التاتو للشمس, هتلاقي التاتو اخد شكل الرسمة اللي في الاكسسوار اللي استعمليته.
ده البوم من احلي أشكال التان تاتو جمعنهلكم وممكن تستوحوا منها أفكار: