13 سر وحيلة لتثبيت مكياجك في الصيف وحمايته من العرق والحر

الصيف هو موسم الاجازات والانطلاق والبحر لكن المشكلة اللي كلنا بنعاني منها في فصل الصيف ان المكياج مش بيثبت وبيسيح بسرعة جدا بسبب حرارة الجو والرطوبة والعرق, عشان كده احنا النهاردة جايبين لكل بنات حوا مجموعة نصايح واسرار من خبراء المكياج عشان نحافظ على مكياجنا في الصيف ونحميه من العرق والرطوبة والحرارة ونستمتع بالصيف والبحر واحنا في كامل جمالنا.

تعالوا نعرف مع بعض 13 سر لــ تثبيت مكياجك في الصيف:

1- ابدأي بأساس سليم للمكياج:

اول حاجة عشان نثبت مكياجنا هي الاساس السليم او القاعدة الاساسية للمكياج وهي المرطب نحط مرطب مناسب لنوع بشرتنا والافضل انه يكون كريم خالي من الزيوت خصوصا في فترة الصبح.

اعرفي من هنا افضل انواع مرطب البشرة حسب نوع كل بشرة.

2- استخدمي برايمر قبل المكياج:

من الحاجات المهمة جدا اللي هتحافظ على ثبات المكياج فترة اطول هي البرايمر, وبيتحط بعد الكريم المرطب, والبرايمر مش بيثبت المكياج بس كمان بيخلص البشرة من اللمعة وبيقلل المسام الواسعة.

3- استخدمي البرونزر:

البرونزر من الحاجات المناسبة جدا لفصل الصيف بيدي لوك حلو اوي للوش وبيظهر جمال العيون, واحسن اماكن لتطبيق البرونزر هي على الجبهة, وعضم الخدين, والدقن, والانف, ممكن كمان تحطي شوية على الرقبة وشحمة الاذن خصوصا لو شعرك قصير او عاملة ديل حصان عشان يبقى باين.

4- حطي مكياج خفيف:

عشان نمنع ان المكياج يتكتل على الوش خبراء التجميل بينصحوا بان “الاقل هو الاكتر” بمعني اننا لو حطينا مكياج خفيف هيثبت اكتر وهيكون احسن من المكياج الكتير, يعني لو تقدري تكتفي بالمرطب الملون والكونسيلر لو انتي محتاجاه وعندك هالات سودا ده هيكون افضل وهيطلع شكل الوش طبيعي واحلى.

5- متستعمليش الملمع او الهايلايت:

كتير مننا بيحب المكياج المضيء زي الملمع والهايلايت لانه بيدي لوك حلو للوش لكن الافضل في الصيف اننا نتجنب اي مكياج مضيء عشان ميلمعش الوش زيادة.

6- استخدمي الوان طبيعية اكتر:

الافضل في فصل الصيف اننا نتجنب الالوان التقيلة في المكياج ونعتمد الالوان الخفيفة والنيود سواء في مكياج العيون او الشفايف, وممكن نحط تحديد شفايف فاتح بنفس لون الروج عشان نمنع الروج يطلع بره حدود الشفايف.

7- اتجنبي استخدام كريم العين:

لو عايزة الايشادو بتاعك يثبت فترة اطول اتجنبي انك تحطي كريم العين على الجفون لانه ممكن يسيح الايشادو بسرعة لكن ممكن تستخدمي بداله برايمر العين هيخلي مكياجك يثبت فترة اطول, ولثبات اكتر طول اليوم ممكن نحط على البرايمر طبقة بودر وبعدين نحط الايشادو والايلاينر بتاعنا عادي اي نوع انتي بتستخدميه, ونستخدم فرشة الايشادو الصغيرة مع لون أسود ونضغط بيها على الايلينر عشان نثبته فترة اطول.

8- استعملي البلاشر الكريمي:

البلاشر من الحاجات اللي بتدي حياة للمكياج ومنقدرش نستعنى عنها, ومعظمنا تقريبا بنستخدم النوع البودر من البلاشر لكن النوع ده مش مناسب للصيف لانه مش بيثبت فترة طويلة في حرارة الجو والرطوبة واوقات ممكن يكلعكع علي البشرة , الافضل اننا نستخدم نوع البلاشر الكريمي, ولتثبيت اكتر ممكن تحطي لمسة بودرة شفافة فوقيه.

اعرفي من هنا ازاي تحطي البلاشر حسب شكل وشك.

9- استخدمي الوان مبهجة مناسبة للصيف:

احنا زي ما قولنا منستخدمش الالوان التقيلة لكن نحط تاتش بس لون من الالوان المبهجة المناسبة للصيف عشان ننور الوش وميبقاش اللوك بتاعنا باهت , يعني ممكن تختاري جزء واحد من الوش تحطي فيه لون مبهج زي مثلا البلاشر تدي تاتش على تفاحتين الخد هيدي حياة للوك بتاعك.

10- وقفي اللمعة ونوري الوش في نفس الوقت:

طبعا زي ما قولنا في النقط اللي فاتت اننا عشان منزودش لمعان الوش نبعد عن المكياج المضيء, لكن احنا ممكن نوقف اللمعة وفي نفس الوقت ننور الوش, اولا منستغناش عن ورق امتصاص الدهون نخليه على طول في شنطتنا ونستخدمة خلال اليوم , تاني حاجة ممكن نحط لمسة من البودرة المضغوطة اللي بيكون فيها لمعة بسيطة هتدي لوك حلو وهتنور الوش وفي نفس الوقت من غير لمعة تضايقك او تخلي اللوك بتاعك شكله مش حلو.

11- استعملي ملمع الشفايف بدل الروج:

في كتير مننا بيعتمد دايما على الوان الروج التقيلة او الغامقة وبيفضل الالوان المات لكن الالوان دي مش مناسبة لفصل الصيف اوي الافضل انك تستبدليها بالالوان الطبيعية زي الوردي والخوخي او الالوان النيود ولو عايزة لون جريء شوية ممكن تستخدمي العنابي او الاورانج الفاتح, وممكن تكتفي بس بملمع الشفايف او زبدة الكاكاو.

12- استخدمي انواع مكياج ضد المية Waterproof:

طبعا من انسب انواع المكياج لفصل الصيف هي الانواع اللي ضد المية او الـ Waterproof يعني هتقدري تنزلي البحر او حمام السباحة من غير قلق ان الماسكارا او الايلاينر ممكن يبوظوا ويسيحوا حوالين عينك, ودلوقتي تقريبا معظم الماركات منزلة انواع ايلاينر وماسكارا ضد المية.

شوفي من هنا افضل ماركات واتر بروف ايلاينر مش هيسيح منك في الصيف.

13- خلي دايما في ادوات مكياج بالحجم الصغير:

دايما وانتي خارجة خلي في شنطتك ادوات مكياج الاساسية عشان لو هتتصوري مثلا ومحتاجة تظبطي أي حاجة, خصوصا الورق اللي بيمتص الزيوت والدهون الزيادة من البشرة واستخدميه على مدار اليوم, وفي ماركات مكياج كتير دلوقتي منزلين ورق امتصاص الدهون زي كلين اند كلير, وسيفورا, ونيكس, وايلف, وبوبي براون, وممكن نستخدم زي ما نصحنا بنات حوا قبل كده ورق الزبدة اللي بنستخدمه في الاكل نحطه في شنطتنا ونستخدمه على البشرة خلال اليوم.

شوفي 23 نصيحة لجمالك عشان تستمتعي بالصيف