12 حيلة للشعر الكيرلي هتغيرلك حياتك!

بقلمآية حسان فيشعر visibility38890

كلنا عارفين انه الشعر الكيرلي ستايل و شيك و حلو جدا و انه من ستايلات الشعر المنتشرة جدا و اللى كتير من البنات بيبقوا عايزين يعملوه ، بس كمان الشعر الكيرلى بيحتاج عناية خاصة و بيحتاج اهتمام كبير جدا علشان يبقى مظبوط و شكله حلو من غير ما تضرى شعرك ، لو انتى شعرك كيرلى او عايزة تغيرى اللوك بتاعك و تعملى شعرك كيرلى اعرفى معانا 12 حيلة لـ الشعر الكيرلي هتغيرلك حياتك! 

12 حيلة لـ الشعر الكيرلي هتغيرلك حياتك!

1- استخدمى البلسم صح:

الطريقة الصحيحة لاستخدام البلسم على الشعر الكيرلي هى انك بعد ما تغسلى شعرك بالشامبو تفردى البلسم من منتصف شعرك للاطراف و تضغطى على شعرك زى ما موجود فى الصورة، و بعدين تمررى صوابعك بين خصل شعرك . بعد توزيع البلسم بالطريقة دى اشطفى شعرك بالمياة الفاترة الى الباردة علشان تقفلى مسام شعرك و تحتفظى بالترطيب .

الطريقة الصحيحة لاستخدام البلسم
الطريقة الصحيحة لاستخدام البلسم

2- لفى شعرك على صوابعك : 

واحدة من اسهل الحيى اللى ممكن تعمليها لشعرك الكيرلى هى انك تلفى خصل شعرك على صوابعك  لوراو هو مبلول ، و ممكن تستخدمى كمية بسيطة جدا من الجيل كريم علشان انا شعرك ينشف ميبقاش هايش .

لفى شعرك على صوابعك
لفى شعرك على صوابعك

3- طريقة تمويج الشعر:

علشان تقدرى تخلى خصل شعرك مموجه او تعملى waves مظبوطة اضغطى بايديكى الاتنين على اطراف شعرك من تحت و ارفعى شعرك بايديكى لفوق لحد ودنك و بعدين بالراحة اوى ابدأى نزلى ايدك و سيبيى شعرك ، ممكن تكررى الحركة دى اكتر من مرة علشان تعملى waves حلوة و مفصولة عن بعضها . 

طريقة تمويج الشعر:
طريقة تمويج الشعر

4- استخدمى فوطة فيها فايبر او الياف صناعية لتجفيف شعرك : 

افضل طريقة تجففى بيها الشعر الكيرلي من غير ما يتفرد او ال curls تبوظ او تهيش هى انك تستخدمى فوطة فيها ميكروفايبر او نسبة من الالياف الصناعية ، علشان تحافظ على التمويجات فى شعرك و فى نفس الوقت تمتص كل البلل اللى فيه . لو الفوطة مش متوفرة ممكن تستخدمى تيشيرت او بلوزة قديمة فيهم نسبة من الالياف الصناعية بدل الفوطة القطن الطبيعي عشان بتفرد الشعر أثناء تنشيفه وبتبوظ الكرلز.

استخدمى فوطة فيها فايبر او الياف صناعية لتجفيف شعرك
استخدمى فوطة فيها فايبر او الياف صناعية لتجفيف شعرك

5- ازاى تفصلى ال curls؟

واحدة من احسن الحيل اللى لازم تجربيها على الشعر الكيرلى علشان تفصلى ال waves عن بعضها و شعرك يبان انه كثيف و مش متعقد هى اانك تستخدمى القطعة اللى بتتركب على السيشوار لتجفيف الشعر الكيرلى ، القطعة دى ميزتها انها بتوزع الحرارة بالتساوى على شعرك و بتوصل الهواء السخن بتاع السيشوار لكل ال  curls حتى الصغيرة ، و كمان هتقدرى تحسي السخونية فين بالضبط فى شعرك و بالتالى هتعرفى تعملى شعرك كله بالتساوى . ممكن كمان تستخدمى السبراى المثبت للشعر بعد ما تخلصى و بعدين تمشي عليه بالسيشوار كمان مرة علشان يبان كثيف و بـ volume  اكتر . 

 ازاى تفصلى ال curls
ازاى تفصلى ال curls

6-استخدمى خلة الاكل :

ايوة اللى قريتيه مظبوط ، واحدة من الحيل اللى ممكن تستخدميها على شعرك الكيرلى هى انك تشتخدمى الخلة الخشب بتاعة الاكل  فى انك تفصلى الcurls عن بعضها علشان تدى شعرك volume بطريقة سهلة ، كمان الطريقى دى حلوة جا فى التخلص من تعقيد الشعر و فك التشابك . بس مهم جدا انك متمرريش الخلة لاخر شعرك عند الاطراف علشان تحافظى على الموجات و ماتتفردش  .

استخدمى خلة الاكل
استخدمى خلة الاكل

7- نامى و شعرك معمول كحكة : 

علشان تحافظى على شعرك متموج اعملى شعرك كحكة مرفوعة لفوق قبل ما تنامى ، من غير ما تمررى صوابعك فى شعرك ، ببساطة لمى شعرك و لفيه كحكة مرفوعة لفوق  بتوكة شعر صغيرة و سيبيه لحد ما تصحى الصبح . 

نامى و شعرك معمول كحكة
نامى و شعرك معمول كحكة

8- حيلة بنس الشعر : 

علشان تخلى شعرك يبان تقيل و كثيف استخدمى حيلة بنس الشعر ، قسمى شعرك خصل صغيرة و اشبكى كل خصلة ببنسة من عند منبت الشعر بحيث تحسي بالبنسة على فروة شعرك ، يعمى ارفعى خصلة شعرك لفوق و اشبكى البنسة من منبت الشعر و هو مبلول ، واما تحسي انه نشف بنسبة حوالى 75% شيلى البنس بنفس الطريقة اللى حطتيهم بيها . 

حيلة بنس الشعر
حيلة بنس الشعر

9- لمة الاناناسة لـ الشعر الكيرلى قبل النوم: 

واحدة من الحيل الحلوة و السهلة جدا للشعر الكيرلى هى لمة الاناناسة قبل النوم، ارفعى شعرك لفوق و حاولى انه وانتى بترفعيه يبقى مرفوع كويس من ناحية منبت الشعر ، يعنى كل خصلة مرفوعة على اتجاه نموها ، اربطى شعرك بأستك شعر و نامى .اللمه ديه مفيدة عشان المخدة متمصتش الزيوت منه وتنشفه ومهم جدا لاصحاب الشعر الكيرلى او لاى شعر عموما انه تنامى على مخدة من الحرير او الستان بدل المخدة القطن لان القطن بيمتص كل الزيوت الطبيعية اللى بيفرزها شعرك وبينشفه.

حيلة نسريحة الاناناسة
حيلة نسريحة الاناناسة

10- رطبى اطراف شعرك : 

الزيوت الطبيعية اللى بتفرزها فروة الرأس بتبقى صعب جدا انها توصل لاطراف الشعر الكيرلى ، علشان ترطبى اطراف شعرك الكيرلى رشى عليها مياة دافية علشان تفتحى مسام شعرك و بعدين ادعكيها بكمية مناسبة من زيت الزيتون او زيت جوز الهند علشان تحصلى على الترطيب المناسب . 

رطبى اطراف شعرك
رطبى اطراف شعرك

11- تسريحة رفع الشعر: 

واحدة من الحيل المهمة اللى هتغير شكل شعرك الكيرلى للاحلى انك ترفعيه لفوق باستعمال بندانة الشعر فى انك تلمي الـcurls فى شعرك لفوق وسيبي الخصل تنزل علي قورتك كأنها قوصة، و لو مفيش بندانة و عندك ليجنج قديم ممكن تاخدى منه قطعة و تستخدميه . حطى البندانة حوالين رقبتك و بعدين ارفعيها لفوق على منبت شعرك.

تسريحة رفع الشعر
تسريحة رفع الشعر

وممكن كمان تجربي تسريحة الاناناسة للشعر الكيرلى وهي إنك تلمي شعرك لمه لفوق أكتر باستك ومن غير ماتحطي الباندانا وتربطيه بالاستك  وبرده حاولى وانتى بترفعيه يبقى مرفوع كويس من ناحية منبت الشعر ونزلي الأطراف علي القورة برده كأنها قوصة, بيبقي ستايل شيك وترندي جدا.

تسريحة الاناناسة للشعر الكيرلى
تسريحة الاناناسة للشعر الكيرلى

شوفي كمان 7 طرق لعمل الشعر كيرلي في البيت

طرق لعمل الشعر كيرلي
طرق لعمل الشعر كيرلي