11 نصيحة تجنن للتصوير بموبايلك على البحر
في الصيف ومع جو البحر والانطلاق كلنا بنحب ناخد صور تبقى ذكرى حلوة للمصيف, لكن عشان تكون الصور دي مش عادية او تقليدية زي باقي الصور اللي بناخدها طول السنة هنقولكم النهاردة نصايح تخليكوا تاخدوا صور بطريقة تجنن واحترافية جدا.
تعالوا نعرف 11 نصيحة تجنن للتصوير بموبايلك على البحر:
1- خلي في نقطة محورية للصورة:
ساعات كتير بناخد صور للبحر مثلا وناخد اكتر من صورة ونيجي نشوفهم نلاقيهم كلهم شبة بعض اننا واخدين مجرد صورة لمساحة فاضية وخلاص ومافيهاش اي حاجة ملفتة, عشان كده اول حاجة في قواعد التصوير باحتراف انه لازم نخلي في حاجة نركز عليها في الصورة يعني حاجة مثيرة للاهتمام ونبني اللقطة كلها على النقطة دي ممكن في البداية تحسي الموضوع مش سهل لكن مع التكرار هتلاقي نفسك بتطلعي صور احلى, يعني مثلا يكون في الصورة شخص, او صخرة, او قارب, او رصيف, او قلعة رملية, او اثار القدم على الرملة يعني اي حاجة تدي معنى للصورة.
يعني مثلا لو بصينا على الصورة دي هنلاقيها مجرد مساحة فاضية ومافيهاش اي حاجة ملفتة.
لكن الصورة دي مثلا النقطة المحورية فيها او اللي ركزنا عليها هي البنت اللي على الشاطيء, لو تخيلنا بقى الصورة من غير البنت هنلاقيها صورة عادية مجرد مساحة فاضية رملة وبحر وسما ومافيش فيها اي حاجة ملفتة, لكن البنت ادت معنى للصورة وهي الحاجة الرئيسية وكل اللي حواليها من السما والبحر والرملة مكمل للصورة فطلعت في الاخر صورة حلوة متكاملة.
ولو بصينا على الصورة دي نقطة التركيز فيها هي الشخص اللي واقف على الصخرة, والصورة هنا متاخدة من بعيد والشخص باين فيها بحجم صغير ومبينة مساحة واسعة للبحر والمنظر الطبيعي.
2- صوري اي حاجة قدام البحر:
ممكن لما تيجي تلقطي الصورة صوري اي حاجة قدام البحر يعني خلي البحر خلفية للصورة, زي الصور دي كده مثلا الورد في مقدمة الصورة ووراه البحر, او الكاس, ويقاس على كده بقى اي حاجة تانية ممكن تصوريها بنفس الطريقة دي.
3- اظبطي الصورة على الـ Burst Mode:
البحر بيبقى طبعا فيه حركات كتير غير متوقعة يعني حركة الموج والناس والطيور والقوارب وغيرها من الحاجات اللي بتقابلنا على البحر, وعشان تلقطي الصورة بشكل حلو ومحترف اظبطي الصورة على الـ Burst Mode اللي بياخد أكتر من لقطة للصورة لانه هيساعدك على لقط الصورة في اللحظة المناسبة.
يعني ممكن تاخدي صورة الموجة وهي بتخبط في الصخرة بكل سهولة وبسرعة, لكن من غير ظبط المود ده هتاخدي وقت كتير عشان تطلعي الصورة زي ما انتي عايزة وبردوا في الاخر مش هتطلع زي ما انتي عايزاها ومش تديكي النتيجة المطلوبة.
او صورة زي دي مثلا بنشوفها كتير ومش بنعرف نعملها اننا نلقط الصورة واحنا بنط لو ظبطتي التليفون زي ما قولنا على الــ Burst Mode هتلقطي الصورة دي بكل سهولة, وده ينطبق بقى على اي حاجة تانية صورة طيور او حيوانات او اي حاجة تانية.
4- دوري على انعكاس للصورة:
على البحر هيبقى سهل اننا ناخد انعكاس للصورة في المية زي الصورة دي مثلا متاخدة من ارتفاع منخفض عشان تبين الانعكاس والموجة البيضا في مقدمة الصورة.
او صورة زي دي انعكاس المراكب على المية بيدي شكل حلو جدا, ممكن تلقطي الصورة دي ساعة الغروب هتطلع تحفة جدا.
5- اعملي ظل للصورة:
طبعا من احسن الاماكن اللي ممكن تاخدي فيها ظل للصورة هي على البحر وخصوصا وقت الغروب لان ضوء الشمس في اللحظة دي هو اللي هيساعد ان الصورة تطلع حلوة وبشكل احترافي, وخدي اللقطة من ارتفاع منخفض عشان تبيني شكل السما والغروب مع الظل.
6- اقفي قدام الشمس:
من اللقطات الجامدة جدا برده هي إنك تكفي قدام الشمس وقت الغروب, الصورة ديه مش هتبين ملامح وشك بس هتبين السيلويت بتاعك وبتبقي تحفة لما بتبقي لبسة دريس أو سكيرت عشان بتطلع كلها انوثة.
7- دوري على التفاصيل وصوريها:
جربوا تصوروا التفاصيل الصغيرة كنوع من التغيير عشان متبقاش الصور كلها شبه بعض بس سما وبحر ورملة وخلاص, يعني مثلا زي الصورة دي ممكن تصوري اثار الاقدام على الرملة, او تصوري الاعشاب البحرية اللي بتطلع على الشط, او خشب طافي على البحر, او شبك الصيد, يعني حاولي تدوري على التفاصيل الصغيرة اللي هتدي معنى واختلاف للصورة.
8- دوري على الالوان الحلوة:
يعني غير الوان البحر والرمل والسما حاولي تدوري على الوان مختلفة على الشاطيء, يعني مثلا في الصورة دي صور كرسي على الشاطيء بلون زاهي.
او صورة زي دي صور الشماسي أو السلم بالوان حلوة وملفتة, ممكن تصوري القوارب مثلا بالوانها المختلفة, او كورة البحر, الجردل وجاروف الرملة, لو في مثلا اكواخ على الشاطيء صوريها يعني دخلي حاجات مختلفة غير الرملة والبحر والسما بس.
9- خلي في خط محدد للصورة:
خلي في خط يحدد نهاية الصورة بتاعتك سواء خط منحني او مستقيم بس المهم يكون في خط للصورة لانها هيخليها تطلع احلى وبشكل احترافي جدا, يعني ممكن تستخدمي خط المية في تكوين الصورة بتاعتك, او زي الصورة دي مثلا استخدم الجبل المنحني ده كخط للصورة ولقط معاه البيت والبحر فالصورة طلعت حلوة بالشكل اللي احنا شايفينه ده.
10- القطي صورة ابيض واسود:
ممكن تغيري وتجربي ايفيكت الابيض والاسود للصور بيدي الصور شكل حلو ومختلف, وممكن الابيض والاسود يبقى علاج لاي صور اخدتيها وحاسه ان الوانها باهتة او مش حلوة اويممكن تعمليها ابيض واسود هتداري بهتان الالوان, والابيض والاسود بيبين كمان تباين الالوان بشكل حلو جدا زي ما هو باين في الصورة دي كده مثلا.
11- دوري حواليكي على المناظر الحلوة:
اخر نصيحة معانا هي انك تدوري حواليكي دايما عن لقطات حلوة ومختلفة تصوريها, يعني عودي عينيكي تبقى كاميرا تلقط الحاجات الحلوة قبل كاميرة التليفون, مع الوقت هتلاقي عينيكي بتاخد بالها من اللقطات الحلوة على طول.
شوفي كمان 8 نصايح ازاي تتصوري احلى سيلفي !
