23 نصيحة لجمالك عشان تستمتعي بالصيف

بقلمريهام محمود فيمكياج visibility8460

كلنا في فصل الصيف تقريبا بتقابلنا مشاكل كتير في بشرتنا وشعرنا ومش بنعرف نحميهم ازاي من الحر والرطوبة والبحر وبنطلع من الصيف بشرتنا محروقة من الشمس وشعرنا ناشف بسبب الرطوبة ونزولنا البحر, ومش بنعرف نتعامل مع بشرتنا وشعرنا بطريقة صح ومش بنعرف ايه المناسب ليهم خلال فترة الصيف, عشان كده احنا النهاردة هنقول لكل بنات حوا نصايح تحافظي بيها على جمالك عشان تقدري تستمتعي وتنبسطي بالصيف من غير قلق ولا مشاكل.

تعالوا نعرف مع بعض 23 نصيحة لجمالك عشان تستمتعي بالصيف:

– هنبدأ بواقي الشمس او الصن بلوك:

اهم حاجة في الصيف هو واقي الشمس او الصن بلوك لان اشعة الشمس هي اكتر حاجة ممكن تضر البشرة وهتخليها جافة ومش نضرة وبتسبب تجاعيد وخطوط البشرة ده غير حروق الشمس طبعا عشان كده لازم نهتم جدا بواقي الشمس ونعرف ازاي نختاره صح ولازم نحط في حسابنا اعتبارات كتير لما نيجي نختار واقي الشمس.

1- اول حاجة اختيار واقي الشمس المناسب, كلنا عارفين ان الواقي في منه درجات حماية لكن منعرفش ارقام درجات الحماية دي معناها ايه ؟ الواقي اللي بيبقى عامل الحماية او الـ SPF 15 ده معناه انك تقدري تقعدي في الشمس 15 مرة اطول من غير ما الشمس تأثر في بشرتك وال15 ده مناسب لو مش هتقضي اليوم كله في الشمس لكن لو هتقضي يومك كله بره في الشمس يبقى الافضل انك تستخدمي واقي شمس بدرجة حماية اعلى.

– ولو عامل الحماية 60 ده طبعا اعلى وافضل للبشرة ولكن ده مش معناه بردوا انه هيحميكي طول اليوم وخصوصا لو رايحة البحر فتأثير حمايته هيروح اسرع بسبب المية حتى واقيات الشمس اللي معمولة ضد المية بردوا تأثيرها هيروحاقى وقت ليها هو 80 دقيقة بعدها المفروض انتي تجدديه وتحطي واقي تاني على البشرة, وحاولي تدي فترة راحة لبشرتك من الشمس وتقعدي في الضل شوية يعني متبقاش طول الوقت تحت الشمس, ولازم نعرف ان واقي الشمس بيحمي من اشعة الشمس لكن مش هيعالج حروق الشمس لو انتي عندك من الاول على البشرة.

2- تاني حاجة اننا نحط واقي الشمس بكمية كفاية لان الكمية القليلة من الواقي مش هتحمي البشرة من الشمس بشكل كافي يعني منبخلش على بشرتنا ونغطي البشرة كويس بالواقي ونمزجه على البشرة لحد ما تمتصه كويس.

3- الملابس الصيفي الخفيفة مش كافية انها تحمي من الشمس وخبراء التجميل قالوا ان الملابس بتحمي من الشمس بنسبة 8% بس ودي نسبة قليلة جدا وخصوصا انواع الاقمشة الخفيفة زي الكتان, عشان كده الافضل تحطي كريم واقي على البشرة تحت الهدوم.

4- حطي الواقي على كل الاماكن المكشوفة اللي هتتعرض للشمس يعني متستهونيش باي مكان يعني غير الوش حطي كمان على الرقبة والايد واي مكان هيتعرض للشمس.

5- حطي الصن بلوك حتى لو قعدة في الضل او تحت الشمسية لان حتى في الضل حرارة الشمس بتعمل تأثير على البشرة, وجددي الصن بلوك على البشرة كل ساعتين او كل ما تنزلي البحر وتطلعي حطي صن بلوك, والبسي الكاب او البرنيطة طول ما انتي قاعدة على البلاج.

واقي الشمس
واقي الشمس

– العناية بالبشرة:

6- استخدمي منتجات البشرة الخالية من الكوميدو جينيك وكمان الواقي اختاريه خالي منها لان المادة دي بتسبب انسداد المسام وده بالتالي بيسبب ظهور حب الشباب على البشرة, وخصوصا في فصل الصيف المشكلة ممكن تزيد بسبب الحر والرطوبة والعرق لما هيتفاعل مع المادة دي بيضر البشرة وبيسد المسام وعشان نتجنب كل ده نختار المنتجات الخالية من الكوميدو جينيك.

7- متهمليش ترطيب البشرة ابدا لان البشرة طول ما هي رطبة هتحافظي عليها نضرة وصحية وهتمنعي جفافها, عشان كده لازم تحطي كريم مرطب خفيف عشان يحمي بشرتك من عوامل الجو من حر ورطوبة ومن حروق الشمس والملح في البحر او الكلور في حمام السباحة.

8- اهتمي بتقشير بشرتك عشان تتخلصي من الجلد الميت وتحافظي على نضارة البشرة, لكن نخلي بالنا اننا منعملش التقشير قبل البحر عشان التقشير بيخلي البشرة حساسة اكتر لاشعة الشمس عشان كده الافضل اننا نعمل التقشير بالليل, او في ايام تكوني مش هتتعرضي للشمس او مش هتروحي البحر.

9- جل صبار الالوفيرا يعتبر صديق البشرة في الصيف لانه مضاد للالتهاب وده بيساعد على ترطيب البشرة وحمايتها من الجفاف وبيهدي البشرة بعد التعرض للشمس, وكمان بيحتوي على مضادات للاكسدة ودي من الحاجات الفعالة جدا في اصلاح تلف البشرة ومنع الجذور الحرة اللي بتسبب تجاعيد البشرة, ممكن تخلطي الالوفيرا مع الفازلين وتستخدميه كلوشن للبشرة والجسم ده يعتبر مرطب ومهديء هايل للبشرة.

10- حطي المرطب على البشرة والجسم وهي مبلولة لان كده هيبقى فعاليتها اكتر على البشرة لان المسام بتكون مفتوحة وده هيساعد انها تتغلغل كويس جوه البشرة وتستفاد منه اكتر.

11- متستخدميش كريمات تفتيح البشرة في المصيف وتفتكري انك كده بتحافظي على بشرتك وانك مش هتسمري من الشمس لكن بالعكس الكريمات دي ممكن تعمل نتيجة عكسية وتتفاعل مع الشمس وتسمر بشرتك زيادة لان كلها مواد كيميائية مضرة بالبشرة, زي ما قولنا هو الصن بلوك بس.

12- متشيليش الشعر من منطقة البكيني قبل ما تروحي البحر على طول لان البشرة بتكون حساسة ولما تتعرض لحرارة الجو وملح البحر والكلور هيتسبب في تهيجها واحمرارها, عشان كده الافضل انك تشيليه قبل ما تروحي البحر قبلها بيوم على الاقل عشان تكون بشرتك هديت شوية.

13- اختاري وقت نزولك البحر اكتر وقت ممكن يضر بشرتك هو ما بين الساعة 11 لحد الساعة 4 تقريبا لان الشمس في الوقت ده بتبقى في ذروتها وهتحرق بشرتك حتى مع الصن بلوك يفضل انك تبعدي عن الميعاد ده, الافضل انك تنزلي البحر بعد الساعة 4 او تنزلي الصبح بدري من 6 لــ 10 دول انسب توقيتات عشان تحافظي على بشرتك وكده تبقي انبسطتي واستمتعي بالبحر وحافظتي على بشرتك في نفسك الوقت.

العناية بالبشرة
العناية بالبشرة

– المكياج:

14- بالنسبة للمكياج الافضل انك تخففي من المكياج في فصل الصيف وتحطي مكياج خفيف مناسب للصيف والجو, يعني ممكن تكتفي بس بمرطب ملون وكمان لما تيجي تختاريه اختاري درجة اغمق من اللي كنتي بتستخدميها في الشتا عشان الوش يطلع طبيعي اكتر.

15- استخدمي الايشادو الكريمي بدل الايشادو البودر لانه هيكون مناسب اكتر للصيف ومقاوم للمية والحر والرطوبة اكتر, واختاري الالوان الهادية الطبيعية زي اللون الوردي الفاتح اوي او لون يكون افتح من بشرتك بدرجة.

16- متنسيش البرايمر لانه هيحافظ على ثبات المكياج على البشرة وهيحمي بشرتك من اللمعان وهيقلل من المسام على البشرة وهيخلي بشرتك تطلع شكلها حلو ومخملية.

17- لما تيجي تختاري الماسكارا جيبي النوع الوتر بروف او اللي ضد المية عشان تثبت وكمان هتغذي رموشك وهتحميها, بس اتجنبي انك تحطي الماسكارا على الرموش اللي تحت عشان الزيوت والعرق ميتجمعش تحت العين اكتفي انك تحطيها على الرموش اللي فوق بس, ممكن تستخدمي ماسكارا ريميل ضد المية.

18- استخدمي البرونزر بشكل صحيح, لان البرونزر دوره انه يدي اضاءة للوش بس بتاتشات بسيطة يعني ميتحطش على الوش كله حطيه بس على تفاحتين الخد او على الجبين.

19- خلي دايما في شنطتك ورق امتصاص الدهون الزيادة واسخدميه على بشرتك كل ما تلاقي فيها دهون زيادة او لمعة الورق هيمتص كل الزيوت والدهون الزيادة, ممكن تستخدمي ورق كلين اند كلير.

20 – اختاري الروج يكون بالوان طبيعية وفاتحة مناسبة للصيف والبحر وممكن تكتفي بالـ Gloss او ملمع الشفايف او زبدة الكاكاو بس هيكون افضل.

المكياج
المكياج

– العناية بالشعر:

21- سيبي شعرك كيرلي طبيعي وريحيه من السيشوار والمكوى, ممكن تستخدمي سبراي الملح او سيروم عشان تدي شعرك تمويجات طبيعية.

22- استخدمي انواع الشامبو اللي بتحمي الشعر من اشعة الشمس والحرارة والملح, , وبالنسبة للمحجبات اهتمي بردوا بشعرك واغسليه بشامبو الحماية عشان تحافظي عليه مش عشان متغطي نهمله لانه بردوا هيتأثر بحرارة الجو والرطوبة حتى وهو متغطي.

23- قبل ما تنزلي المية بلي شعرك وحطي عليه سيرو لان ده هيقلل من الضرر اللي ممكن يحصل له من الملح او الكلور وهيحافظ على صحة الشعر.

العناية بالشعر
العناية بالشعر

اعرفي من هنا ازاي تجهزي نفسك للمصيف

اعرفي معانا ازاي تجهزي نفسك للمصيف
اعرفي معانا ازاي تجهزي نفسك للمصيف