اعرفي معانا ازاي تجهزي نفسك للمصيف

ريهام محمود
ريهام محمود
106054

كلنا كل سنة في موسم الصيف بنبقى شايلين هم تجهيزات المصيف وشنطة السفر وايه الحاجات اللي لازم ناخدها والتجهيزات الاساسية, وايه الحاجات اللي مش ضرورية ومالهاش لازمة وبتاخد مكان على الفاضي معانا, ده غير بقى الحاجات اللي بننساها وبعد ما نوصل نكتشف اننا نسيناها ونفضل قاعدين متضايقين أو نضطر نشتريها من هناك, عشان كده احنا النهاردة هنقولكم ازاي تجهزي نفسك وشنطتك للمصيف بكل بساطة عشان تروحي المصيف والبحر وانتي مبسوطة وريلاكس ومن غير اي مشاكل وتقضي وقت حلو.

ياللا نعرف خطوة خطوة ازاي تجهزي نفسك للمصيف:

اول خطوة قبل المصيف بكام يوم على روقان كده هنجيب ورقة وقلم ندون كل حاجة احنا عايزين ناخدها معانا عشان منبقاش ساعة التجهيز متعصبين ومستعجلين لان هو ده اللي بيخلينا ننسى حاجات.

الموضوع طبعا بيختلف علي حسب إنتي رايحة هوتيل ولا رايحة شاليه أو شقة لو هوتيل يبقي فيه حاجات كتير من الأدوات الاساسية هتبقي متوفرة زي الفوط, والشامبو, والكريمات والسشوار, أما لو مش هوتيل يبقي ركزي كويس مع الحاجات اللي جايه ديه.

قسمي الورقة دي تلات اقسام قسم فيه الحاجات الاساسية اللي هتستخدميها في البيت, وقسم للحاجات الشخصية اللي انتي هتستخدميها لنفسك, والقسم التالت للاطفال لو عندك اطفال.

– نبدأ بالحاجات الاساسية:

هتحطي شنطة اسعافات اوليه صغيرة فيها قطن وشاش ومطهر جروح وبعض الادوية اللي ممكن تحتاجي لها زي برشام صداع مثلا او برشام مغص.

مقص, ابرة وخيط, فوط كفاية كبيرة وصغيرة لانها اكتر حاجة بنستخدمها في المصيف والبحر, ليفة, فرش السنان, ومعجون السنان.

اكياس بلاستيك “زيبلوك” عشان تحفظي فيها السندويتشات لو هتحتاجي معاكي وانتي رايحة البحر او حتى الكاميرا والموبايل عشان تحافظي عليهم من الرملة والمية.

الحاجات ديه كلها للبيت أو الشاليه: علب لحفظ الاكل, ترمس شاي, كولمان مية, فتاحة للعلب, ولاعة اوكبريت, كوبايات واطباق بلاستيك, شوك ومعالق وسكاكين بلاستيك, ممكن ناخد باكيتات اي مشروبات زي الشاي والنسكافية والشاي الاخضر واي مشروبات نفضلها, اكياس بلاستيك.

العاب زي الكوتشينة “اونو أو مونوبولي”, الطاولة, دومينو او شطرنج بيبقوا مهمين جدا للترفيه خصوصا في السهرة.

ازاي تجهزي نفسك للمصيف والبحر
ازاي تجهزي نفسك للمصيف والبحر

– الحاجات الشخصية:

دي الحاجات اللي تخصك انتي, اول حاجة واهم حاجة في حاجتك الشخصية هي الصن بلوك عشان تحمي بشرتك من الشمس, وكريم مرطب, كريم او زيت شعر, سيروم للشعر, شامبو, بلسم, مزيل عرق, شنطة المكياج اللي هيبقى فيها كل مكياجك اللي هتستخدميه خلال فترة المصيف, زبدة كاكاو, بونية للشعر, طاقية بحر, مراية صغيرة, ونضارة الشمس, فوط صحية, شبشب للبيت, بنس شعر, توك, مشط, شور جيل, غسول البشرة, مناديل معطرة “ويبس”, روب حمام ,والفلوس والموبايل طبعا ممكن بينك وبين نفسك تقولي دول مستحيل انساهم بس مع الاستعجال ممكن تنسي اهم الحاجات.

وشعرك لازم تحددي إذا كنتي هتعملي ستايل الكيرلي فتاخدي معاكي ادواته أو هتاخدي معاكي السشوار أو الببي ليس, وممكن تنوعي بين الستيلين عشان الصور وتجدي اللوك بتاعك.

الحاجات الشخصية
الحاجات الشخصية

– مستلزمات الاطفال:

– لو في اطفال متنسيس تكتبي الحاجات الخاصة بيهم والافضل تخصصي شنطة للاطفال غير شنطتك عشان هيحتاجوا حاجات وهدوم اكتر لانهم بيستهلكوا لبس اكتر, اكتبي هدومهم للبلاج والخروج والنوم, وشباشب وجزم, وفرش السنان, والمشط, وتوك الشعر للبنات, وملابس داخلية, ليفة وفوط خاصة بيهم, والشامبو الخاص بيهم, والعوامات الكبيرة, وعوامات الكتاف, ونضارة السباحة, والكاب, والعاب البحر زي الجاروف والجردل وكورة البحر, مضارب راكيت, كورة طايرة, يعني كل الحاجات الترفيهية اللي محتاجينها.

– لو الطفل لسه بيبي يبقى متنسيش الادوية بتاعته عشان تبقي عاملة حسابك على اي حاجة, والبامبرز, واللبن الخاص بيهم, والسيريلاك, وزودي طبعا من الهدوم والملابس الداخلية عشان بيحتاجوا يغيروا كتير, بافتات, قطن للودان, بطانية او لحاف صغير, عربية البيبي, غلاية مية او كاتيل عشان تحضري اكل البيبي.

مستلزمات الاطفال
مستلزمات الاطفال

– ملابس المصيف:

بالنسبة للبس حاولي تنوعي على قد ما تقدري ومتخديش حاجات شبه بعض كتير و في نفس الوقت متاخديش حاجات مالهاش لازمة وتاخد مكان في الشنطة على الفاضي.

– طبعا اول حاجة المايوة “خدي أكتر من مايوه” وبالنسبة لهدوم البلاج اختاري أكتر من طقم ونوعي مابين الفساتين, او السكيرت وبلوزة, او هوت شورت وتشيرت علي  حسب الستايل اللي بتحبيه اكتر, والافضل انهم يكونوا الوان فاتحة عشان تعكس اشعة الشمس وتكون خامتها قطن او كتان عشان تبقى مريحة ومتحرركيش.

– اختاري كل يوم طقم مختلف لخروجاتك بالليل ما بين الفساتين والجيبات والشورتات ومتنسيش الإكسسوارات مهمة جدا للوك الصيف وممكن تكرري مثلا لبس شورت أو سكيرت بس يفضل إنك متكرريش التوب أو الدريس خصوصا إن ده أكتر حاجة بتبقي عليها التركيز في اللبس وعشان كمان الصور تبقي فيها علي طول متألقة باكتر من لوك, وطبعا للمحجبات يفضل الطرح بردو تكون خامات مش بتحرر زي القطن.

– هدوم النوم هاتي بيجامات قطن مريحة وألوان مبهجة.

ملابس المصيف
ملابس المصيف

– الجزم:

خدي معاكي حاجات خفيفة وعملية عشان متتعبش رجلك وتبقي مرتاحة, يعني الصبح على البلاج البسي سابوه او فليب فلوب ده هيبقى اكتر حاجة مناسبة  للرملة والبحر, ولخروجاتك التانية البسي الجزم الفلات الخفيفة او بردوا الحاجات المفتوحة هتبقى انسب للمصيف و يفضل انه يبقي معاكي علي الاقل جزمة واحدة بكعب خصوصا لو هتسهري في مكان بالليل.

الجزم
الجزم

– شنطة البلاج:

خدي معاكي شنطة ايد كبيرة توتي ستيل عشان تلمي فيها كل حاجة وانتي رايحة البلاج زي الصن بلوك, والفوطة الخاصة بيكي ونضارة الشمس, والافضل يكون نوع الشنطة من الخامات اللي ضد المية او الانواع اللي ممكن تتغسل عشان تتحمل الشمس والبحر.

شنطة البلاج
شنطة البلاج

بعد ما كتبنا كل الحاجات اللي هناخدها نبدأ نشوف الحاجات دي موجودة عندنا في البيت ولا نقصنا حاجة مش موجودة عشان ننزل نشتريها وتكون جاهزة ليوم السفر.

قبل يوم السفر هتبقي طبعا كاتبة كل حاجة هتاخديها معاكي وجهزتي كل حاجة واشتريتي كل اللي ناقصك هيبقى الموضوع بقى سهل جدا عليكي كل الحكاية انك هتحطيهم في الشنطة بس من غير ما تبقي مستعجلة ولا متعصبة.

نتمنى اننا نكون غطينا كل الحاجات المهمة اللي محتاجينها في المصيف ودي تقريبا الاساسيات اللي كلنا بنحتاجها ممكن بعض البنات يحتاجوا اضافات او حاجات تانية زيادة حسب احتياجاتهم, اكتبوها مع الحاجات اللي احنا كاتبينها لما تيجوا تجهزوا عشان متنسوهاش.

شوفي كمان 23 نصيحة لجمالك عشان تستمتعي بالصيف

23 نصيحة لجمالك في الصيف 1
23 نصيحة لجمالك في الصيف 2
23 نصيحة لجمالك في الصيف 2

مقالات متعلقه

21 نصيحة وحيلة عشان تستمتعي بوقتك على البحر

21 نصيحة وحيلة عشان تستمتعي بوقتك على البحر

13 سر وحيلة لتثبيت مكياجك في الصيف وحمايته من العرق والحر

13 سر وحيلة لتثبيت مكياجك في الصيف وحمايته من العرق والحر

23 نصيحة لجمالك عشان تستمتعي بالصيف

23 نصيحة لجمالك عشان تستمتعي بالصيف