وصفات طبيعية لفرد الشعر المجعد

ريهام محمود
ريهام محمود
في
شعر
40782

على قد ما في بنات كتير بيحبوا يعملوا شعرهم مجعد او كيرلي لانه بيدي شكل حلو للشعر لكن من وقت للتاني بنحب نغير اللوك ونعمل الشعر ستريت او مفرود ده غير انه الشعر المجعد بيبقى صعب التعامل معاه وبيحتاج مجهود مننا, وفي بنات كتير تانيين بيبقى شعرهم مجعد طبيعي ونفسهم يبقى مفرود باي طريقة, لكن دايما بنخاف من طرق فرد الشعر انها ممكن تضر شعرنا, عشان كده احنا النهاردة هنقولكم على افضل الطرق الطبيعية الفعالة جدا لــ فرد الشعر المجعد او الكيرلي وفي نفس الوقت مش هتسبب اي ضرر لشعرك, وكلها طرق سهلة ومش محتاجة اي مجهود ومش مكلفة خالص.

تعالوا نشوف مع بعض افضل الوصفات الطبيعية لــ فرد الشعر المجعد:

1- وصفة حليب جوز الهند لفرد وتنعيم الشعر:

– هناخد كوباية من حليب جوز الهند ونعصر عليه نص ليمونة ونقلبهم مع بعض كويس وبعدين نسيب الخليط ساعة في التلاجة, بعد الساعة نطلعه من التلاجة ونحطه على الشعر كله ونغطي الشعر ببونيه الشعر او بكيس بلاستيك ونحط عليها فوطة سخنة او نوجه عليه السيشوار لمدة دقايق, سيبي شعرك متغطي وملفوف بالفوطة لمدة من نص ساعة لساعة وبعدين تغسليه عادي, الطريقة دي بتفرد الشعر وبتنعمه وبتغذيه جدا.

– والوصفة دي ليها طريقة تانية هنخلط كوباية حليب جوز الهند مع عصير ليمونة ومعلقتين كبار زيت زيتون و3 معالق كبار نشا, هنخلط النشا مع عصير الليمون وندوبه كويس, هنخلط حليب جوز الهند مع زيت الزيتون ونضيف عليهم خليط النشا والليمون ونقلبهم مع بعض ونحطهم على النار على درجة حرارة متوسطة ونفضل نقلب فيه لحد ما الخليط يبقى سميك زي الكريم وبعدين نرفعه من على النار, هناخد من الخليط نحطه على الشعر كله ونغطيه بكيس بلاستيك وفوطة سخنة ونسيبة من ساعة لساعتين وبعدين نغسله بالشامبو والبلسم, ولو في باقي من الخليط ممكن نحتفظ فيه في برطمان ونحطه في التلاجة لما نيجي نستخدمه تاني

– بالنسبة لحليب جوز الهند اللي ممكن مش هيبقى متوفر في كل الاماكن ممكن احنا نعمله في البيت هنجيب واحدة جوز هند هتلاقوه عند اي فكهاني وتبشريها وتحطيها في الخلاط وتضيفي عليها 4 كوبايات مية سخنة وتضربيهم مع بعض وبعدين تحطي شاشة على مصفى وتصفي الخليط كويس هيطلع عندك اللبن فضيه في ازازة واحتفظي بيه في التلاجة لحد ما تيجي تستخدميه.

وصفة حليب جوز الهند
وصفة حليب جوز الهند

2- وصفة اللبن والعسل:

هنجيب كوباية لبن عادي ونضيف عليه عسل نحل لحد ما يبقى الخليط سميك شوية زي العجينة يعني ميبقاش سايل وممكن نضيف عليه موزة عشان نخلي الخليط سميك وكمان الموز مفيد ومغذي جدا للشعر, هنخلطهم كويس مع بعض وهنحط الخليط ده على الشعر ونسيبه ساعة على الاقل يعني ممكن تسيبيه اكتر لحد ما تلاقي الخليط نشف على الشعر خالص, وبعدين اغسلي شعرك كويس بالشامبو والبلسم.

وصفة اللبن والعسل
وصفة اللبن والعسل

3- وصفة اللبن:

اللبن من الحاجات الفعالة جدا في فرد الشعر, هنحط اللبن من غير اضافات في ازازة ببخاخ , ونرش الشعر كله وهو ناشف باللبن ونسيبه من 20 لــ 30 دقيقة, وبعد كده نغسله بالمية بس.

وصفة اللبن
وصفة اللبن

4- وصفة زيت الزيتون:

هنحط بيضتين في طبق ونضيف عليهم كمية مناسبة من زيت الزيتون نقلبهم مع بعض كويس, هنحط الخليط على الشعر كله ونغطيه بكيس بلاستيك ونسيبه 45 دقيقة وبعدين نغسله بالشامبو, ممكن تكرري الوصفة دي من مرتين لتلات مرات في الاسبوع وهتلاحظي النتيجة خلال شهر من الاستخدام.

وصفة زيت الزيتون
وصفة زيت الزيتون

5- وصفة زيت جوز الهند:

تدليك الشعر بخليط الزيوت من الحاجات الفعالة جدا في ترطيب الشعر وتغذيته وفرده مع الاستمرار في الاستخدام, هنخلط كميات متساوية من زيت جوز الهند وزيت الزيتون ونحط الخليط على الشعر ونغطيه وننام بيه ونغسله الصبح بالشامبو ولو مش هتقدري تنامي بيه ممكن تغطية بفوطة سخنة وتخليه لمدة ساعة على الاقل وبعدين تغسليه بالشامبو, وممكن بعد فترة من تستبدلي زيت الزيتون بزيت اللوز الحلو.

وصفة زيت جوز الهند
وصفة زيت جوز الهند

6- وصفة زيت الخروع:

زيت الخروع من انواع الزيوت اللي بتساعد على فرد الشعر لانه غني بالفيتامينات والمعادن وكمان ليه خصائص مضادة للبكتيريا والفطريات, هنسخن زيت الخروع ونسيبه لحد ما يبقى دافي ونحطه على الشعر وندلك بيه فروة الراس كويس ونغطي الشعر بفوطة سخنة ونسيبه نص ساعة وبعدين نغسله بالشامبو والبلسم.

وصفة زيت الخروع
وصفة زيت الخروع

7- وصفة عصير الكرفس:

الكرفس غني بالفيتامينات والمعادن والمغذيات النباتية اللي بتساعد على فرد الشعر وتغذيتة, هناخد كمية من الكرفس ونضيف عليه مية ونضربه في الخلاط كويس ونصفيه وناخد العصير نحطه في ازازة ونخليه في التلاجة من بالليل للصبح, وبعدين هنحط الخليط على الشعر وفروة الراس ونسرح الشعر ونغطيه بكيس بلاستيك ونسيبه لمدة نص ساعة وبعدين نغسله.

وصفة عصير الكرفس
وصفة عصير الكرفس

8- وصفة الخل:

الخل بيساعد على فرد الشعر مع الاستمرار في استخدامه وكمان بيدي لمعة للشعر, بعد ما نغسل شعرنا هنضيف معلقة خل لكوباية مية ونشطف بيها الشعر بس متحطيهوش على فروة الراس اغسلي بيه خصل الشعر بس سيبيه على الشعر من 5 لــ 10 دقايق, وبعدين اشطفيه بمية نضيفة.

وصفة الخل
وصفة الخل

فرد الشعر بالمكوى بطريقة صحيحة:

فرد الشعر بالمكوى دي الطريقة التقليدية لفرد الشعر لكن كتير من البنات بيخافوا منها بسبب انها ممكن تضر الشعر لكن لو استخدمنا المكوى بالطريقة الصح مش هتضر الشعر خالص, اولا لازم نستخدم نوع مكوى كويس زي مثلا فيليبس او براون دي من الماركات الكويسة, ولما نيجي نعمل الشعر نخلي بالنا من درجة الحرارة نظبطها حسب احتياج الشعر يعني لو شعرك ناعم ومش مجعد اوي وسمكه متوسط  خلي درجة الحرارة ما بين 250 – 350 درجة وممكن تخليها ما بين 300 – 350 درجة.

قبل ما نعمل الشعر لازم ناخد بالنا من شوية حاجات:

1- اننا نغسل الشعر وننشفه كويس قبل المكوى منعملش المكوى على شعر مبلول خالص لانه ممكن يحرقه.

2- رشي قبل المكوى سيروم او رذاذ حماية الشعر من الحرارة.

 3- قسمي الشعر خصل صغيرة عشان تقدري تتحكمي فيها وتفرديها كويس.

 4- سخني المكوى زي ما قولنا على درجة الحرارة المناسبة لشعرك.

 5- نبدأ فرد الشعر من الخصل اللي تحت خالص اللي فوق الرقبة ونخلص خصلة خصلة وبعدين نعمل اللي بعدها لحد مانخلص الشعر كله.

 6- بعد ما نخلص الشعر خالص ممكن تدهني شعرك بكمية بسيطة جدا باي منتج تصفيف شعر او مثبت الشعر.

لو مشينا على الخطوات دي المكوى مش هتضر الشعر خالص.

فرد الشعر بالمكوى بطريقة صحيحة
فرد الشعر بالمكوى بطريقة صحيحة

7 ماسكات بزيت الزيتون لحل كل مشاكل الشعر

ماسكات بزيت الزيتون لجمال شعرك
ماسكات بزيت الزيتون لجمال شعرك

مقالات متعلقه

افضل زيوت للشعر الخفيف هتساعدك على تكثيفه

افضل زيوت للشعر الخفيف هتساعدك على تكثيفه

5 علاجات طبيعية للشعر لمشاكل شعرك المختلفة

5 علاجات طبيعية للشعر لمشاكل شعرك المختلفة

6 طرق تستخدمي بيهم خل التفاح لعلاج القشرة

6 طرق تستخدمي بيهم خل التفاح لعلاج القشرة