وصفات طبيعية للتخلص من رائحة القدم الكريهة

ريهام محمود
ريهام محمود
في
بشرة
7970

رائحة القدم الكريهة من اكتر المشاكل المحرجة اللي بتقابل كتير من البنات, بيحصل لكتير مننا لما بنلبس الجزمة فترة طويلة او بنقضي اليوم كل بره بنرجع البيت نقلع الجزمة نلاقي ريحة مش حلوة في الرجل, والموضوع ده بيزيد اكتر كمان في فصل الصيف بشكل خاص بسبب حرارة الجو والرطوبة, عشان كده النهاردة هنحل المشكلة دي لكل بنات حوا بوصفات طبيعية بسيطة وسهلة وموجودة في كل بيت.

ياللا نعرف مع بعض وصفات طبيعية للتخلص من رائحة القدم الكريهة:

1- وصفة الكلور:

الوصفة عبارة عن نص كوباية كلور تضيفيهم لطبق فيه مية سخنة وتنقعي فيه رجلك لمدة من 10 لــ 12 دقيقة, وممكن تكرري الوصفة دي مرتين في اليوم, بالنسبة للي بشرتهم حساسة لو حسوا باي تأثير على بشرتهم من الوصفة دي يطلعوا الرجل على طول من المية ويغسلوها عشان متسببش اي تهيج او التهاب في البشرة.

وصفة الكلور
وصفة الكلور

2- وصفة زيت جوز الهند:

هنخلط من معلقة لمعلقتين كبار من زيت جوز الهند مع 5 نقط من زيت خشب الارز, اغسلي رجلك كويس ونشفيهم وبعدين دلكي رجلك بالخليط لحد ما البشرة تتشربه كويس, وكرري الوصفة كل يوم لحد ما تتخلصي من رائحة القدم, خلطة الزيوت دي بتساعد على قتل البكتيريا اللي بتنمو في الرجل, وفيها خصائص مضادة للفطريات وبالتالي بتقضي على ريحة القدم الكريهة.

وصفة زيت جوز الهند
وصفة زيت جوز الهند

3- وصفة الزيوت العطرية:

هنضيف من 8 لــ 10 نقط من زيت الخزامي او زيت شجرة الشاي لطبق فيه مية دافية ونقلب الخليط وبعدين تنقعي رجلك في الخليط لمدة 20 دقيقة, كرري الوصفة مرتين ف اليوم لحد ما تقضي على الريحة خالص, لان الزيوت العطرية ليها خصائص مطهرة ومضادة للميكروبات والفطريات اللي بتسبب رائحة القدم الكريهة, وغير انها هتخلصك من ريحة القدم كمان هتدي رجلك ريحة حلوة وهتنعم الجلد.

وصفة الزيوت العطرية
وصفة الزيوت العطرية

4- وصفة الملح الانجليزي:

هنملى طبق بمية سخنة ونضيف لها نص كوباية ملح انجليزي ونقلبهم كويس وننقع فيها الرجل من 20 لــ 30 دقيقة وبعدين نغسلها بالمية العادية , كرري الوصفة مرتين في اليوم, الخلطة بتمتص الرطوبة الزيادة من الجلد وبتقتل البكتيريا اللي بتسبب الريحة الكريهة, وفيها كمان خصائص فعالة مضادة للالتهابات للتخلص من الم القدمين وتنعيم البشرة.

وصفة الملح الانجليزي
وصفة الملح الانجليزي

5- وصفة عصير الليمون:

هنملى طبق بمية سخنة ونضيف لها كوباية ونص عصير ليمون ونقلبهم كويس وننقع الرجل في الخليط ده لمدة ربع ساعة وبعدين نغسلها بالمية العادية, كرري الوصفة مرتين في اليوم, الليمون بيحتوي على حمض الستريك اللي بيساعد على قتل البكتيريا اللي بتسبب الريحة الكريهة, ده غير انه الليمون يعتبر مادة قابضة بتساعد على تقليل مسام الجلد وبالتالي بيمنع العرق الزايد اللي ممكن يسبب الريحة الكريهة.

وصفة عصير الليمون
وصفة عصير الليمون

6- وصفة الماء المالح:

هنحط 8 كوبايات مية سخنة في طبق ونضيف عليهم من 1 لــ 2 كوباية ملح ونقلبهم لحد ما يدوب الملح في المية وبعدين ننقع الرجل فيها لمدة 20 دقيقة, كرري الوصفة مرتين في اليوم, الملح هيمتص الرطوبة الزيادة من البشرة ويمنع نمو البكتيريا اللي بتسبب الريحة الكريهة.

وصفة الماء المالح
وصفة الماء المالح

7- وصفة صودا الخبز او الكربوناتو:

هنحط 8 كوبايات مية سخنة في طبق ونضيف عليهم من معلقة ونص لمعلقتين كربوناتو ونقلبهم كويس وننقع الرجل لمدة ربع ساعة, كرري الوصفة مرتين في اليوم, الكربوناتو فيها خصائص مضادة للجراثيم بتقضي على الريحة الكريهة وبتنعم البشرة.

وصفة صودا الخبز
وصفة صودا الخبز

8- وصفة اكياس الشاي:

هنملى طبق صغير بمية سخنة ونضيف لها من 4 لــ 5 كيس شاي هنسيب الشاي لمدة دقايق وبعدين نشيله من المية وننقع الرجل من 10 لــ 15 دقيقة, كرري الوصفة مرتين في اليوم, الشاي فيه مضادات للاكسدة وخصائص مضادة للجراثيم بتقضي على الريحة الكريهة.

وصفة اكياس الشاي
وصفة اكياس الشاي

– ازاي نمنع رائحة القدم الكريهة والعرق ؟

1- لازم نحرص على نضافة الرجل يوميا ونغسلها كويس اول ما نرجع البيت.

2- نقشر الرجل بانتظام باي مقشر.

3- الافضل انك تلبسي الشرابات القطن لانها بتمتص الرطوبة من الرجل.

4- غيري الشرابات بشكل يومي, وحافظي دايما على نضافة الشرابات.

5- اول ما ترجعي البيت حطي الشوز بتاعك في مكان مفتوح عشان الهوا يدخل فيه ويضيع اي روايح ويمتص منه الرطوبة.

6- متلبسيش نفس الشوز كل يوم, يعني حاولي تبدلي بين اكتر من شوز.

وصفات طبيعية للتخلص من رائحة القدم الكريهة
وصفات طبيعية للتخلص من رائحة القدم الكريهة

شوفي وصفة سريعة تنعم رجلك وتبقى حرير

وصفة تنعيم الرجلين
وصفة تنعيم الرجلين

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

3 علاجات للقدمين لتنعيمها تعمليهم بنفسك في البيت

3 علاجات للقدمين لتنعيمها تعمليهم بنفسك في البيت

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي