احلى الوان للايشادو ممكن تدمجيها مع بعض
الايشادو من الحاجات المهمة جدا في خطوات مكياجنا لانه بيظهر العين وبيديها لوك حلو, لكن المشكلة اللي بتقابلنا هي ازاي ندمج الالوان مع بعض لانه لو دمجنا لونين مش لايقين على بعض هيبوظ مكياجنا كله, عشان كده احنا النهاردة جايبين لكل بنات حوا مجموعة من الوان الايشادوا وازاي ممكن ندمجها مع بعض.
تعالوا نتعرف مع بعض على احلى الوان للايشادو ممكن تدمجيها مع بعض:
1- ايشادو بني مع دهبي:
من الالوان اللي بتطلع حلوة جدا مع بعض هما اللونين الدهبي والبني بيدوا لوك سموكي خفيف للعين وهيبقى مناسب اوي للبنات اللي مش بيحبوا السموكي التقيل اوي, ونحاول نقلل في اللوك ده من الايشادو الاسود او الايلاينر لان اللوك هيطلع احلى, نركز فيه على اللون البني الغامق نحطه الزاوية الخارجية للعين وعلى تنية الجفن وندمجه مع الدهبي, ومادام هنرسم سموكي للعين الافضل اننا نعمله قبل ما نحط الميك اب بتاعنا عشان منبوظش المكياج بعد ما نحطه.
2- ايشادو برتقالي غامق مع ازرق:
البرتقالي الغامق مع الازرق بيبقوا حلوين جدا مع بعض وبيظهروا العين اوي, هنحط اللون البرتقالي الغامق على الجفن المتحرك كله واللون الازرق نحطه بس على خط الرموش من فوق ومن تحت, اللونين مع بعض هيظهروا بعض جدا وهيدوا شكل حلو للعين, وممكن نحط اللون الازرق بفرشة الكونسيلر لانها هتوزعه بشكل احسن على العين.
3- ايشادو اوف وايت مع رمادي غامق:
اللوك ده كلاسيك اوي هندمج فيه اللون الاوف وايت مع الرمادي الغامق مع بعض, والميزة فيه انه مناسب لكل الاوقات يعني الصبح وبالليل هيبقى حلو اوي, واحسن طريقة عشان اللونين دول يطلعوا حلوين مع بعض هنحط اللون الاوف وايت على الجفن المتحرك كله واللون الرمادي الغامق هنحطه عند تنية الجفن ونفرده عند الزاوية الخارجية للعين, هيطلع العين شكلها تحفة اوي.
4- ايشادو بينك مع اوف وايت او شامبين:
اللونين دول مبهجين جدا ومناسبين اوي للصيف, واللوك رقيق وبسيط جدا, هنحط اللون الاوف وايت او الشامبين على الجفن المتحرك كله واللون البينك هنحطه عند تنيه الجفن وعند الزاوية الخارجية للعين وندمج اللونين كويس مع بعض.
5- ايشادو ازرق واخضر بدرجات النيون:
اللوك ده جريء والوانه كمان من الالوان المناسبة اوي لجو الصيف , وممكن تستخدمي خليط الالوان ده بطريقتين, الطريقة الاولى ممكن تحطيهم كايلاينر يعني ترسمي بيهم على خط الرموش بس حطي الاخضر على طول خط الرموش اللي فوق, واللون الازرق على خط الرموش اللي تحت, والطريقة التانية اننا نفرد اللون الاخضر على الجفن المتحرك كله والازرق نحطه بس عند الزاوية الخارجية للعين وندمجهم كويس مع بعض.