نصايح و وصفات طبيعية للتخلص من حشرات الشعر بسرعة
حشرات الشعر او قمل الشعر من المشاكل اللي بيعاني منها كتير من الاطفال بشكل خاص بسبب الاختلاط بينهم في المدرسة وبتتنقل الحشرات من شعر للتاني, لان من اكتر اسباب ظهور المشكلة دي هو الاختلاط باشخاص كتير في اماكن زحمة وحشرات الشعر سهل جدا تتنقل من شخص لشخص, ومن اسبابها كمان انه ممكن نكون مش بنضف فرش الشعر والامشاط كويس وبالتالي بينمو عليها طفيليات بتسبب حشرات الشعر, او ممكن نكون استخدمنا فرشة او مشط لشخص تاني واتنقل عن طريقهم حشرات الشعر, عشان كده لازم نحافظ دايما على نضافة الفرش وامشاط الشعر ومنستخدمش حاجة اي حد خالص, ونحافظ دايما على نضافة الشعر ونغسله كويس لان وجود حشرات الشعر غير انها حاجة مزعجة جدا ومحرجة هي كمان بتأثر على صحة الشعر, وطبعا في السوق موجود انواع شامبوهات معمولة مخصوص للتخلص من حشرات الشعر وهي فعالة الى حد ما, لكن احنا النهاردة هنقولكم على وصفات طبيعية فعالة جدا للتخلص من حشرات الشعر وكمان مفيدة جدا للشعر.
تعالوا نشوف مع بعض نصايح و وصفات طبيعية للتخلص من حشرات الشعر:
1- وصفة المايونيز:
المايونيز من الحاجات الفعالة جدا في التخلص من حشرات الشعر وكمان مفيد جدا للشعر وبيطريه, هنحط المايونيز على الشعر كله ونسيبه على الاقل ساعة يعني لو قدرتي تسيبيه فترة اطول هيكون احسن بكتير وهيجيب نتايج افضل, وبعد كده اغسلي الشعر كويس, كرري الوصفة دي كل يوم لمدة من اسبوعين لتلات اسابيع هتلاقي الحشرات اختفت من الشعر خالص.
2- وصفة بلسم الشعر:
بلسم الشعر من العلاجات الفعالة في التخلص من حشرات الشعر, اغسلي الشعر بالشامبو وبعدين وهو مبلول قسميه خصل وحطي البلسم على كل خصلة وسرحيها بالفرشة واغسلي الفرشة تحت المية السخنة وبعدين على الخصلة اللي بعدها نفس الطريقة حطي البلسم وسرحي الخصلة بالفرشة وبعدين اغسلي الفرشة تحت المية السخنة وهكذا لحد ما تخلصي الشعر كله الطريقة دي فعالة جدا في قتل حشرات الشعر وكمان البيض بتاعها.
3- وصفة زيت اللوز وزيت الزيتون:
– زيت اللوز وزيت الزيتون من الحاجات المفيدة جدا في التخلص من حشرات الشعر, اخلطي مقادير متساوية من زيت اللوز الحلو وزيت الزيتون, اغسلي الشعر كويس وبعدين حطي الخليط عليه وسيبيه على الشعر طول الليل واغسليه الصبح عشان يديكي افضل النتايج, ممكن تعملي الوصفة دي كل يوم او تلات مرات في الاسبوع لحد ما تتخلصي من المشكلة.
– ممكن نستخدم الزيوت العطرية مفيدة جدا لعلاج المشكلة دي زي زيت شجرة الشاي, وزيت اللافندر, وزيت القرنفل اخلطي اي نوع من الزيوت دي مع زيت جوز الهند او زيت اللوز الحلو او زيت الزيتون, وهنستخدمهم بنفس طريقة زيت اللوز وزيت الزيتون هتساعد جدا في علاج حشرات الشعر وهتمنع انه يرجع للشعر تاني.
– ممكن بعد ما نغسل الشعر نستخدم السيشوار لان الحرارة هتساعد كمان من التخلص من اي حشرات في الشعر.
4- وصفة شامبو طبيعي:
ممكن تعملي بنفسك شامبو بمكونات طبيعية في البيت فعال جدا في علاج حشرات الشعر, هنخلط كميات متساوية من زيت جوز الهند مع زيت اكليل الجبل وزيت الكافور واعصري عليهم كام نقطة ليمون واخلطيهم كويس وحطيهم على الشعر وسيبيه طول الليل واغسليه الصبح.
5- وصفة الخل الابيض:
الخل من الحاجات اللي هتخلصنا من حشرات الشعر ومن البيض بتاعها, يتحط الخل على الشعر ويتساب ساعة او من بالليل لحد الصبح وبعدين يتغسل بالمية والشامبو عادي, وتتكرر الوصفة تلات مرات في الاسبوع.
6- وصفة زيت شجرة الشاي:
– هنحط من 10 لــ 15 نقطة من زيت الشاي على 2 كوب مية ويتغسل الشعر بالخليط ده من 5 لــ 7 مرات في الاسبوع.
– وفي طريقة تانية اننا نضيف زيت شجرة الشاي للشامبو العادي ويتغسل بيه الشعر بالطريقة العادية.
7- وصفة خل التفاح:
خل التفاح من الحاجات الفعالة جدا جدا لعلاج مشكلة حشرات الشعر, يتحط خل التفاح على الشعر ويدلك بيه فروة الراس كويس ويتساب ساعة وبعدين يتغسل, وخلال ايام هتلاقي المشكلة اختفت خالص.
8- وصفة الثوم:
الوصفة دي عبارة عن ثوم مفروم وتخلطي معاه عصير ليمون تعملي بيهم عجينه تتحط على الشعر وتتساب 20 دقيقة وبعدين تتغسل.
9- وصفة عصير البصل:
هنفرم البصل في الخلاط ونصفيه وناخد العصير بتاعه ندلك بيه الشعر وفروة الراس ونغطيه ببونيه او كيس بلاستيك ونسيبه 3 ساعات,وبعدين نغسل الشعر كويس بالشامبو, الكبريت اللي موجود في البصل بيساعد على قتل حشرات الشعر.
10- وصفة صودا الخبز:
اخلطي صودا الخبز”الكربوناتو” مع عصير البرتقان وزيت السمسم وحطي الخليط على الشعر ويتساب طول الليل لحد الصبح يتغسل, وفي كل الوصفات نسرح الشعر بالفرشة واحنا بنغسله عشان ننزل اي حاجة فيه.
11- وصفة زيت النيم:
ممكن تخلطي زيت النيم مع البلسم العادي وتحطيه على الشعر وهو مبلول وتسرحي الشعر بالفرشة عشان تنزلي اي حشرات منه, والوصفة تتكرر من 2 لــ 3 مرات في الاسبوع.
12- غسل الملابس:
من الحاجات المهمة جداعشان نحافظ على نضافة الشعر مش بس بالماسكات والوصفات كمان لازم نحافظ على نضافة كل حاجة بنستخدمها, يعني الهدوم نحافظ على نضافتها ونغسلها, واكياس المخدات نغيرها باستمرار ونغسلها, نستخدم دايما فوط نضيفة, واغسليهم في درجة حرارة عالية عشان تقتل اي جراثيم او اي حاجة فيها.
13- حافظي على صحة الشعر:
زي ما قولنا قبل كده اكتر من مره انه اي حاجة علاجها بيبدأ من جوه قبل بره يعني نحافظ على الجسم صحي وده هينعكس على صحة الشعر وبالتالي ده هيبعد حشرات الشعر.
شوفي 7 ماسكات بزيت الزيتون لحل كل مشاكل الشعر
