فكرة هدية سهلة وجديدة تعمليها بنفسك للناس اللي بتحبيهم
اوقات كتير اما بنبقى عايزين نجيب هدايا للناس اللى بنحبهم سواء قرايبنا او اصحابنا او حتى خطيبك او جوزك بنبقى محتارين و مش عارفين نجيب ايه ، و بنقعد نفكر ايه الهدية اللى ممكن تكون جديدة وفى نفس الوقت فيها معنى حلو و ليها قيمة ، بس خلاص متحتاريش تانى ، فى المقال ده “بنات حوا” هتقولك على فكرة حلوة جدا و فى نفس الوقت فكرة هدية سهلة و جديدة للى بتحبيهم ، و بأدوات تقريبا مالهاش اى تكلفة و فى 4 خطوات بس بنفسك فى البيت ، و مش هتاخد منك اى وقت ولا مجهود ..
فكرة هدية سهلة وجديدة للناس اللي بتحبيهم
الادوات اللى هتحتاجيها :
-ورقة رقيق او خفيف ” ممكن ورق شفاف تقيل شوية ” .
عبوات زجاجية شفافة مقيش عليها اى رسومات و ممكن برطمانات او كاسات .
-لمبات صغيرة اوى من بتاعة الفوانيس او ممكن شمع صغيرو ممكن تستخدمى شمع عطرى .
-شريط لزق مزدوج ” بيلزق على الجنبين ” .
-طابعة.
-مقص.
الخطوة الاولى :
فى الخطوة دى هتفتحى الكمبيوتر بتاعك و تختارى الصور اللى انتى حابة تستخدميها و تطبيعها ، بس مهم جدا تقيسى البرطمان او العبوات الزجاجية اللى الصور هتتلزق عليها و تختارى مقاس الصور المناسب قبل ما تطبعى
الخطوة الثانية :
الزقى شرايط من اللزق المزدوج على البرطمان او الوعاء اللى هتلزقى الصور عليه ، و خدى بالك يكون مفرود كويس علشان الصورة متقعش ، قطعتين من شريط اللزق بحيث يبقى واحد على اول الصورة و واحد على اخرها كفاية .
الخطوة الثالثة :
علشان تضمنى انه الصورة ثابته اكتر و مش هتفك مع الوقت ، ممكن تستخدمى شريط لزق مزخرف او شفاف و تثبتى بيه الصورة من عند اولها و من عند اخرها ” الخطوة دى اختيارية ” .
الخطوة الرابعة :
و دى الخطوة الاخيرة ، حطى لمبة الفانوس او الشمع اللى هتستخدميه حسب اختيارك فى الوعاء الزجاجى و ممكن تثبتيه بصمغ ابيض او شمع لزق لو حسيتى انه هيقع او بيتقلب .
يلا جربى الهدية دى و قوليلنا ايه رايك فيها :) و شوفى معانا كمان افكار هدايا لخطيبك او زوجك .. تجنن