11 نصيحة ازاي تلبسي الجزمة الكعب من غير ما توجع رجلك !

ريهام محمود
ريهام محمود
22568

كتير مننا بيحب يلبس الجزمة الكعب لانها بتبقى شيك جدا في اللبس, ده غير ان في استايلات لبس مينفعش عليها غير الكعب, لكن دايما بتقابلنا مشكلة ان الجزم الكعب مش مريحة وبتسبب الم في الرجل, عشان كده احنا النهاردة هنحل لكل بنات حوا المشكلة دي وهنقولكم ازاي تلبسوا الجزم الكعب العالي من غير ما توجع رجلكم.

تعالوا نعرف مع بعض 11 نصيحة ازاي تلبسي الجزمة الكعب من غير ما توجع رجلك:

1- البسي المقاس المناسب لرجلك:

لما تيجي تشتري الجزمة لازم تختاري المقاس المناسب لرجلك ولا تكون ضيقة اوي ولا واسعة اوي لانه ساعات بنشتري جزمة ضيقة ونقول هتوسع مع المشي او نشتريها واسعة ونقول عشان تريحنا لكن ده غلط جدا لانها في الحالتين هتتعب رجلك , وكمان لو لبساها فترة طويلة بره البيت هترجعي تلاقي رجلك وصوابعك منتفخة وهتحسي بألم فيها, عشان كده لازم تختاري المقاس الصح عشان تريح رجلك.

البسي المقاس المناسب لرجلك
البسي المقاس المناسب لرجلك

2- اشتري الجزمة في نهاية اليوم:

لما تنزلي تعملي شوبنج وتتفرجي على المحلات خلي الجزمة اخر حاجة تشتريها, وده لانه الرجل طبيعي بتنتفخ شوية من لبس الجزمة فلما هتجيبي مقاس الجزمة على رجلك وهي منتفخة كده وهتبقى مريحاكي في الحالة دي وانتي لبساها ده يبقى انسب مقاس وتقدري تعتمدي على الجزمة في خروجاتك وتضمني انها هتريح رجلك.

اشتري الجزمة في نهاية اليوم
اشتري الجزمة في نهاية اليوم

3- متلبسيش الكعب العالي طول اليوم:

لو هتقضي يومك كله بره متلبسيش كعب عالي لانك مهما عملتي هيتعبك على اخر اليوم, الافضل انك تختاري جزمة مريحة اللي بيكون نعلها مطاط لان النوع ده بيريح الرجل وتكون ليها قاعدة عالية شوية من قدام عشان يبقى في تناسب في الرجل بين قدام وورا ومتوجعش رجلك.

متلبسيش الكعب العالي طول اليوم
متلبسيش الكعب العالي طول اليوم

4- حطي وسادة اضافية في الجزمة:

حطي جوه الجزمة وسادة اضافية اللي هو الفرش اللي بيتحط جوه الجزمة لانها بتقلل كتير من الم الرجل.

حطي وسادة اضافية في الجزمة
حطي وسادة اضافية في الجزمة

5- امشي بطريقة صح:

ساعات بيكون الم الرجل مش بسبب الكعب بس لكن بيكون بسبب اننا بنمشي بطريقة غلط واحنا لابسين الكعب, عشان كده لما تيجي تمشي بجزمة بكعب ميكونش التحميل على صوابعك وانتي ماشية ومتتنيش ركبك خلي الركب والرجل بشكل مستقيم ومفرودين وانتي ماشية, ولما تيجي تنقلي خطوتك حركي الرجل كلها من منطقة الفخدين متبقيش مركزة في مشيتك على الجزء اللي تحت بس من الرجل لان ده هيتعب رجلك.

امشي بطريقة صح
امشي بطريقة صح

6- خدي فترة راحة:

سواء كنتي لابسة كعب او لا لو مشيتي فترة طويلة او لبستي الجزمة فترة طويلة لازم تريحي رجلك وتقعدي شوية, لان المشي فترات طويلة ده بيسبب الم في الصوابع عشان كده لازم تدي الرجل فترة راحة.

خدي فترة راحة
خدي فترة راحة

7- البسي الكعب الودجز:

ممكن تلبسي الكعب الودجز اللي بيكون عريض من قدام ومن ورا لانه بيخلي الرجل مرتاحة اكتر لان كعب الرجل بيكون في نفس مستوى الرجل من قدام وبالتالي مش بتوجع الرجل وهتبقى اريح من الكعب الرفيع.

البسي الكعب الودجز
البسي الكعب الودجز

8- خربشي نعل الجزمة بالمقص:

الحيلة يمكن تكون غريبة شوية لكن النصيحة دي من السوبر موديل تايرا بانكس, ونصيحتها لكل البنات انك تخربشي نعل الجزمة بالمقص عشان ده هيخليكي متتزحلقيش وانتي لبساها لانك لما تعمليها كده مش هتبقى ناعمة اوي من تحت ومش هتزحلق.

خربشي نعل الجزمة بالمقص
خربشي نعل الجزمة بالمقص

9- حطي الجزمة في القالب:

ممكن كل فترة تحطي الجزمة في قالب عشان توسع المكان اللي عند الصوابع وتريحك وانتي لبساها, بس اكيد القالب مش هيكون موجود عندنا كلنا عشان كده البديل ياما نجمع كام شراب مع بعض ونعملهم كورة ونحطهم جوه الجزمة عند منطقة الصوابع وخليهم يوم كامل جوه الجزمة ده هيساعد انها توسع, او تملي كيس بالمية وتقفليه كويس وتحطيه جوه الجزمة وتحطيها في الفريزر ولما المية تتجمد هتتمدد جوه الجزمة وهتوسعها, او انك تحطي جواها ورق جرايد مبلول وسيبيه لحد ما ينشف وبعدين شيليه.

توسيع الجزمة الضيقة
توسيع الجزمة الضيقة

10- اتأكدي من مكان الكعب:

لما تشتري جزمة بكعب اتأكدي ان الكعب في النص بالظبط تحت مركز كعب رجلك, وميكونش مكانه ورا اوي في الجزمة لان ده هيتعب الرجل.

اتأكدي من مكان الكعب
اتأكدي من مكان الكعب

11- اختاري الجزمة بحزام:

الكعوب بتكون مريحة اكتر في المشي لما يكون في دعم اضافي في الجزمة يساعد ان يبقى في توازن اكتر, عشان كده الافضل انك تلبسي الجزم اللي بحزام او بشريط ملفوف على الرجل لان في الحالة دي الرجل بتكون محكومة جوه الجزمة كويس وده هيخليكي مرتاحة اكتر وانتي لبساها.

اختاري الجزمة بحزام
اختاري الجزمة بحزام

البسي الكعب باللون النيود عشان رجلك تبان اطول

الكعب باللون النيود
الكعب باللون النيود

مقالات متعلقه

5 طرق لتوسيع الجزمة لو ضيقة عليكي وبتوجعلك رجلك

5 طرق لتوسيع الجزمة لو ضيقة عليكي وبتوجعلك رجلك

3 طرق تختاري بيهم ارتفاع الكعب المثالي ليكي عشان تتجنبي الم القدمين

3 طرق تختاري بيهم ارتفاع الكعب المثالي ليكي عشان تتجنبي الم القدمين

وسعي الجزمة الجلد بطريقة سهلة

وسعي الجزمة الجلد بطريقة سهلة