10 وصفات فعالة لزيادة الوزن
زي ما في بنات كتير بتدور دايما على وصفات التخسيس والجسم الرشيق في بنات تانية بردوا بتعاني من مشكلة النحافة الزيادة وبتدور على وصفات لزيادة الوزن وكمان مشكلة اكتساب الوزن بتكون اصعب كتير من التخسيس, عشان كده احنا النهاردة جيبنا لكل بنات حوا اللي عايزين يزودوا وزنهم 10 وصفات فعالة لزيادة الوزن, وكل وصفة من الوصفات دي هتدي الجسم تقريبا 800 سعرة حرارية للوصفة الواحدة وكمان بتقوي عضلات الجسم, والميزة في الوصفات غير انها مغذية جدا طبعا انها لذيذة اوي وطعمها حلو وهتحبوها.
تعالوا نعرف مع بعض 10 وصفات فعالة لزيادة الوزن:
1- مشروب كريمة البرتقان:
المكونات:
– كوباية كبيرة لبن كامل الدسم “فيها 164 سعرة حرارية – 7.9 جرام بروتين – 7.9 جرام دهون – 12.8 جرام كربوهيدرات”.
– نص كوباية كريمة “413 سعرة حرارية – 2.5 جرام بروتين – 44.3 جرام دهون – 3.3 جرام كربوهيدرات”.
– كوباية عصير برتقان “112 سعرة حرارية – 1.7 جرام بروتين – 0.5 جرام دهون – 25.8 جرام كربوهيدرات”.
– 6 معالق كبيرة بروتين نكهة البرتقان او الفانيليا “240 سعرة حرارية – 50 جرام بروتين – 2 جرام دهون – 4 جرام كربوهيدرات”.
الطريقة:
هنحط المكونات كلها مع بعض في الخلاط ونضربها كويس جدا لحد ما البروتين يدوب خالص وكل المكونات تمتزج مع بعضها كويس, ويتشرب كل يوم من مرة لمرتين, ممكن يتشرب بعد الفطار وبعد الغدا.
2- مشروب الشوكولاتة وزبدة اللوز:
المكونات:
– 2 كوباية كبيرة لبن كامل الدسم “292 سعرة حرارية – 15.7 جرام بروتين – 15.8 جرام دهون – 25.6 كربوهيدرات”.
– 50 جرام شوكولاتة سايحة “340 سعرة حرارية – 4.4 جرام بروتين – 24.2 جرام دهون – 26.1 جرام كربوهيدرات”.
– 2 معلقة كبيرة زبدة اللوز وممكن نستبدلها بزبدة فول السوداني “203 سعرة حرارية – 4.8 جرام بروتين – 18.9 جرام دهون – 6.8 جرام كربوهيدرات”.
– 6 معالق كبيرة بروتين نكهة الشوكولاتة “220 سعرة حرارية – 50 جرام بروتين – 0 جرام دهون – 2 جرام كربوهيدرات”.
الطريقة:
هنسيح الشوكولاتة في حمام مية سخنة لحد ما تسيح خالص, وبعدين هنحط الشوكولاتة مع باقي المكونات في الخلاط ونضربهم لحد ما يمتزجوا مع بعض كويس.
3- مشروب الآيس كريم والنعناع:
المكونات:
– كوباية كبيرة لبن كامل الدسم “146 سعرة حرارية – 7.9 جرام بروتين – 7.9 جرام دهون – 12.8 جرام كربوهيدرات”.
– كوباية ايس كريم فانيليا او شوكولاتة “460 سعرة حرارية – 8 جرام بروتين – 28 جرام دهون – 46 جرام كربوهيدرات”.
– ربع معلقة صغيرة خلاصة النعناع “ممكن تلاقوه عند العطار ولو مش موجود ممكن تحطوا ورق نعناع “.
– 6 معالق كبيرة بروتين فانيليا او شوكولاتة “230 سعرة حرارية – 48 جرام بروتين – 3 جرام دهون – 4 جرام كربوهيدرات”.
الطريقة:
هنخلط المكونات كلها مع بعض في الخلاط نفس الطرق اللي فاتت بالظبط.
4- مشروب الموز والفراولة:
المكونات:
– كوباية ونص لبن كامل الدسم “293 سعرة حرارية – 15.7 جرام بروتين – 15.9 جرام دهون – 25.7 جرام كربوهيدرات”.
– نص كوباية كريمة “413 سعرة حرارية – 2.5 جرام بروتين – 44.3 جرام دهون – 3.3 جرام كربوهيدرات”.
– موزة كبيرة “15 سعرة حرارية – 0.3 جرام بروتين – 0.1 جرام دهون – 3.7 جرام كربوهيدرات”.
– 6 معالق كبيرة بروتين موز او فانيليا “240 سعرة حرارية – 48 جرام بروتين – 2 جرام دهون – 8 جرام كربوهيدرات”.
الطريقة:
هنخلط كل المكونات في الخلاط.
5- مشروب الاناناس وجوز الهند والقرفة:
المكونات:
– كوباية ونص لبن كامل الدسم “219 سعرة حرارية – 11.8 جرام بروتين – 11.9 جرام دهون – 19.2 جرام كربوهيدرات”.
– ربع كوباية كريمة “205 سعرة حرارية – 1.2 جرام بروتين – 22 جرام دهون – 1.7 جرام كربوهيدرات”.
– ربع كوباية حليب جوز هند “111 سعرة حرارية – 1.1 جرام بروتين – 12 جرام دهون – 1.6 جرام كربوهيدرات”.
– 3/4 كوباية اناناس “43 سعرة حرارية – 0.5 جرام بروتين – 0.1 جرام دهون – 11.2 جرام كربوهيدرات”.
– ربع معلقة صغيرة قرفة “3 سعرات حرارية – 0 جرام بروتين – 0 جرام دهون – 0.9 جرام كربوهيدرات”.
– 6 معالق كبيرة بروتين نكهة القرفة او الفانيليا “240 سعرة حرارية – 48 جرام بروتين – 2 جرام دهون – 8 جرام كربوهيدرات”.
الطريقة:
كل المكونات نضربها في الخلاط مع بعض.
6- مشروب كريمة الكراميل والقهوة:
المكونات:
– كوباية لبن كامل الدسم “146 سعرة حرارية – 7.9 جرام بروتين – 7.9 جرام دهون- 12.8 جرام كربوهيدرات”.
– نص كوباية كريمة “413 سعرة حرارية – 2.5 جرام بروتين – 44.3 جرام دهون – 3.3 جرام كربوهيدرات”.
– نص كوباية قهوة “1 سعرة حرارية – 0.1 جرام بروتين – 0 جرام دهون – 0 جرام كربوهيدرات”.
– 2 معلقة كبيرة كراميل “103 سعرة حرارية – 0.6 جرام بروتين – 0 جرام دهون – 27 جرام كربوهيدرات”.
– 6 معالق كبيرة بروتين بنكهة الكراميل “240 سعرة حرارية – 48 جرام بروتين – 2 جرام دهون – 8 جرام كربوهيدرات”.
الطريقة:
نفس طريقة المشروبات اللي فاتت.
7- مشروب شوكولاتة مالتزر:
المكونات:
– كوباية ونص لبن كامل الدسم “219 سعرة حرارية – 11.8 جرام بروتين – 11.9 جرام دهون – 19.2 جرام كربوهيدرات”.
– ربع كوباية كريمة “205 سعرة حرارية – 1.2 جرام بروتين – 22 جرام دهون – 1.7 جرام كربوهيدرات”.
– 10 قطع شوكولاتة مالتزر موجودة في الهايبر ماركت “100 سعرة حرارية – 0.5 جرام بروتين – 3.5 جرام دهون – 16 جرام كربوهيدرات”.
– 25 جرام شوكولاتة سايحة “170 سعرة حرارية – 2.2 جرام بروتين – 12.1 جرام دهون – 13 جرام كربوهيدرات”.
– 6 معالق كبيرة بروتين شوكولاتة “240 سعرة حرارية – 50 جرام بروتين – 2 جرام دهون – 4 جرام كربوهيدرات”.
الطريقة:
هنسيح الشوكولاتة في حمام مية سخنة, وبعدين هنحطها مع باقي المكونات في الخلاط ونضربهم مع بعض.
8- مشروب الشوفان والسكر البني:
المكونات:
– كوباية ونص لبن كامل الدسم “219 سعرة حرارية – 11.8 جرام بروتين – 11.9 جرام دهون – 19.2 جرام كربوهيدرات”.
– ربع كوباية كريمة “205 سعرة حرارية – 1.2 بروتين – 22 جرام دهون – 1.7 جرام كربوهيدرات”.
– 1/3 كوباية شوفان “107 سعرة حرارية – 3.7 جرام بروتين – 1.8 جرام دهون – 19.2 جرام كربوهيدرات”.
– 4 معالق صغيرة سكر بني “69 سعرة حرارية – 0 جرام بروتين – 0 جرام دهون – 17.9 جرام كربوهيدرات”.
– 6 معالق كبيرة بروتين فانيليا “240 سعرة حرارية – 50 جرام بروتين – 2 جرام دهون – 4 جرام كربوهيدرات”.
الطريقة:
هنضرب كل المكونات في الخلاط, وممكن الوصفة دي ناخدها كوجبة فطار.
9- مشروب الافوكادو بالشوكولاتة:
المكونات:
– كوباية ونص لبن بالشوكولاتة كامل الدسم “311 سعرة حرارية – 11.9 جرام بروتين – 12.7 جرام دهون – 38.7 جرام كربوهيدرات”.
– 1 ونص ثمرة افوكادو “240 سعرة حرارية – 3 جرام بروتين – 22 جرام دهون – 12.8 جرام كربوهيدرات”.
– 25 جرام شوكولاتة سايحة “170 سعرة حرارية – 2.2 جرام بروتين – 12.1 جرام دهون – 13 جرام كربوهيدرات”.
– 6 معالق كبيرة بروتين شوكولاتة “240 سعرة حرارية – 50 جرام بروتين – 2 جرام دهون – 4 جرام كربوهيدرات”.
الطريقة:
هنسيح الشوكولاتة على حمام مية سخنة, وبعدين نحطها في الخلاط مع باقي المكونات ونضربهم كويس لحد ما البروتين يدوب خالص والافوكادو ينعم ويمتزج كويس مع باقي المكونات.
10- مشروب الموز وزبدة الفول السوداني:
المكونات:
– 2 ثمرة موزة كبيرة.
– كوباية كبيرة لبن.
– بياض 3 بيضات.
– معلقة كبيرة زبدة الفول السوداني.
– 3 معالق كبيرة شوفان.
– 6 معالق كبيرة بروتين فانيليا.
الطريقة:
هنضرب كل المكونات في الخلاط.
– افضل انواع البروتين او المكملات الغذائية:
طبعا لاحظنا انه في كل الوصفات المكون الاساسي فيهم كلهم هو البروتين ده بيبقى عبارة عن بودر بيتباع في الصيدلية وهو مكمل غذائي للي بيعانوا من مشكلة النحافة في نوع ممكن تاخديه لو مش بتلعبي رياضة اسمه “جروث فورميلا”, لكن الانواع اللي هنقولها دلوقتي لازم يتلعب معاها رياضة عشان متسببش اي ضرر للجسم.
1- بروتين True – Mass.
2- بروتين Serious Mass.
3- بروتين Mass Tech.
4- بروتين Platinum Isolate Supreme.
5- بروتين Muscle Juice.
اتعرفي على اهم أكلات زيادة الوزن
