اعرفي معانا ازاي تلبسي الجمبسوت Jumpsuit ؟
الجمبسوت Jumpsuit من الحاجات اللي في كتير مننا ممكن بيحب شكلها ونفسه يلبسها بس في نفس الوقت بنبقى مترددين ناخد خطوة اننا نشتريه بنخاف يطلع شكله مش حلو علينا لاننا مش بنعرف نلبسه ازاي عشان يطلع بطريقة شيك وانيقة, عشان كده احنا النهاردة هنقولكم ازاي تلبسي الجمبسوت ؟ وجايبين لكم مجموعة مختلفة من استايلات الجمبسوت تقدري تختاري منها اللي يناسبك.
– ازاي تلبسي الجمبسوت Jumpsuit ويطلع بلوك حلو ؟
1- اختيار الجمبسوت المناسب لجسمك:
لما نيجي نشتري الجمبسوت لازم تختاريه مناسب لجسمك, يعني ميبقاش واسع اوي ولا ضيف اوي يكون مناسب لحجم الجسم, لانه لو ضيق اوي هتبقي مش مرتاحة فيه, ولو واسع اوي هيخفي معالم الجسم كلها وهيطلع شكله مش حلو.
2- تحديد الوسط:
اختاري الجمبسوت اللي بيحدد منطقة الوسط في موديلات بيكون هو اصلا ليه وسط, وبالنسبة للموديلات اللي من غير وسط ممكن انتي تضيفي له حزام قماش او تلبسي اي حزام يمشي عليه عشان تحددي بيه منطقة الوسط وتديه شكل انثوي حلو.
3- البسيه مع البليزر او الكارديجان:
البليزر من الحاجات اللي بتطلع حلوة جدا وشيك على الجمبسوت, اختاري بليزر بلون يمشي مع لون الجمبسوت بتاعك هتلاقي اللوك بتاعه اختلف خالص, ممكن تختاري بليزر بنفس لون الجمبسوت او تنسقي معاه لون يمشي عليه وتعملي مزيج حلو بالالوان, يعني مثلا لو لابسة جمبسوت فيه الوان كتير ومطبوع البسي عليه بليزر سادة بلون هادي والعكس لو لابسة جمبسوت بلون واحد سادة البسي عليه بليزر ملون او مطبوع, ممكن تلبسيه كمان مع الكارديجان تنسقي كارديجان مناسب هيطلع شيك ومختلف جدا
4- البسي كعب مع الجمبسوت اللي رجله واسعه:
لو لابسة جمبسوت اللي بيكون موديلة الرجل واسعة يبقى لازم تلبسي عليه جزمة بكعب عالي رفيع, لان الرجل الواسعة بتطلع شكل الرجل اقصر وعشان تبيني طولها ومتطلعش قصيرة يبقى تلبسي كعب عالي عشان يبقى في توازن في اللوك بتاعك, وابعدي خالص عن انك تلبسي الموديل ده مع صندل او جزمة فلات لان الشكل هيطلع مش حلو.
5- ممكن تلبسيها في كل الاوقات ولكل المناسبات:
الجمبسوت من الحاجات اللي ممكن تتلبس في كل الاوقات يعني ممكن تلبسيها في مناسبة رسمية, ممكن تلبسيها في حفلة وتنسقي معاها اكسسوارات عشان تديها لوك مناسب للحفلة, ممكن تلبسي الجمبسوت باللون الابيض مثلا للوك كلاسيكي انيق, ممكن تلبسيها باللون الاسود كسهرة وتنسقي معاها اكسسوارات دهبي وشنطة مناسبة وهيبقى لوك سهرة شيك جدا, يعني مناسبة لكل الاوقات كل المناسبات.
6- اختاري الجمبسوت اللي رجله واسعة:
دايما اختاري موديل الجمبسوت اللي وسطه متحدد ورجله واسعة لانه بيكون اشيك وافضل في اللبس من الموديل الضيق, وغير انه اشيك كمان بيظبط شكل الجسم اكتر وبيداري الديفوهات او العيوب وهيبين وسطك انحف.
تعالوا نشوف مع بعض مجموعة استايلات مختلفة من الجمبسوت Jumpsuit:
اتألقي والبسي السالوبيت الجينز
