7 ماسكات بزيت الزيتون لحل كل مشاكل الشعر
بنسمع دايما عن فوايد زيت الزيتون للشعر لكن مش بنعرف نستخدمه ازاي للشعر, او ندخله ازاي في ماسكات الشعر عشان نقدر نستفاد منه كويس, عشان كده احنا النهاردة جايبين لكل بنات حوا 7 ماسكات بزيت الزيتون لشعر ناعم وصحي, لعلاج تكسر الشعر, لترطيبه, لعلاج التلفان والتساقط وكمان عشان نمو الشعر. وكلها ماسكات سهلة وبسيطة ومكوناتها موجودة في مطبخنا.
– تعالوا نعرف الاول ليه زيت الزيتون مفيد للشعر ؟
1- زيت الزيتون غني جدا بالمواد المضادة للاكسدة, وفيتامين A, و E المفيدة جدا في تسريع نمو الشعر.
2- ليه قدرة انه يتغلل في فروة الراس وده بيساعد على ترطيب الشعر بشكل عميق.
3- مغذي للشعر جدا وبيمنع تكسره وتقصفه.
4- بيحمي الشعر من الجفاف وبيحافظ على رطوبته.
5- بيعالج الشعر المجعد والجاف والتالف.
6- بيساعد ان الشعر ينمو بشكل اقوى وبالتالي بيحميه من التساقط.
– تعالوا نشوف 7 ماسكات بزيت الزيتون لجمال شعرك:
1- ماسك زيت الزيتون والعسل “للشعر الجاف والمجعد”:
الماسك ده بيساعد على ترطيب الشعر جدا, وبيمنع تكسره, وبيديه لمعان, وبيقلل من جفاف وتجعد الشعر.
المكونات:
– من 2 لــ 3 معالق كبيرة زيت زيتون.
– من 1 لــ 2 معلقة كبيرة عسل.
– كوباية زيت جوز هند.
طريقة التحضير والاستخدام:
نضيف زيت الزيتون والعسل وزيت جوز الهند مع بعض ونخلطهم كويس, هنغسل الشعر عشان يبقى نضيف وبسيبه ينشف وبعدين نحط الخليط على الشعر كله ونركز على الاطراف وندلك بيه فروة الراس كويس لمدة 3 دقايق, ونسيبه ساعة على الشعر, وبعدين نغسل الشعر بالشامبو والبلسم, كرري الوصفة مرة واحدة في الاسبوع.
2- ماسك زيت الزيتون والافوكادو “لعلاج تكسر الشعر”:
الماسك ده بكل مكوناته غني بالبروتينات وبفيتامين B , و E وده بيساعد على احياء الشعر, وعلاج الجفاف, وبيحفز نموه وبيخليه ينمو بشكل كثيف, بيحمي الشعر من القشرة, بيقلل من تجعد الشعر, وبيخلي شكل الشعر صحي وبيلمع لانه غني بفيتامين A, و E وكمان المواد المضادة للاكسدة اللي بتساعد على تغذية الشعر, والماسك يعتبر كمان مطهر للشعر,وبيحفظ الرطوبة في فروة الراس.
المكونات:
– ثمرة افوكادو.
– من 2 لــ 3 معالق كبيرة زيت زيتون.
– معلقة كبيرة عسل.
– معلقة كبيرة زبادي “اختياري”.
طريقة التحضير والاستخدام:
هنقطع الافوكادو قطع صغيرة ونحطه في الخلاط ونضيف له زيت الزيتون والعسل والزبادي, هنضربهم كويس في الخلاط لحد ما يبقى الخليط عندنا ناعم خالص, هنغسل الشعر ونحط الماسك عليه على طول وهو مبلول من الجذور للاطراف, وهنسيبة 45 دقيقة وبعدين نغسله بالشامبو والبلسم, نكرر الوصفة مرة في الاسبوع.
3- ماسك زيت الزيتون وزيت جوز الهند ” للترطيب العميق للشعر”:
الماسك بيغذي وبيرطب الشعر بعمق, بيكثف الشعر وبيديه لمعة.
المكونات:
– من 2 لــ 3 معالق كبيرة زيت جوز الهند.
– 2 معلقة كبيرة زيت زيتون.
– 2 معلقة كبيرة عسل.
طريقة التحضير والاستخدام:
هنخلط زيت جوز الهند وزيت الزيتون في طبق ونحطهم في حمام مية سخنة لحد ما يبقوا دافيين شوية نشيلهم من المية وبعدين نضيف عليهم العسل ونقلب المكونات كلها مع بعض كويس, هنحط الخليط على الشعر من الجذور للاطراف وندلك فروة الراس كويس ونسيبه نص ساعة وبعدين نغسله بالشامبو والبلسم, نكرر الوصفة مرة في الاسبوع.
4- ماسك زيت الزيتون والموز “لعلاج الشعر التالف”:
الماسك بيرطب الشعر وبيعالج تلف وجفاف الشعر, بيقلل من تجعد الشعر وبينعمه, الماسك غني جدا بالبوتاسيوم وده بيحمي الشعر من التكسر, وبيعالج اطراف الشعر المنقسمة والمقصفة, وبيعالج قشرة الشعر, بيساعد على تكثيف الشعر وبيحفز نموه.
المكونات:
– من 1 لــ 2 ثمرة موز “حسب كثافة وطول الشعر”.
– 2 معلقة كبيرة زيت زيتون.
– من 2 لــ 3 معالق كبيرة زبادي.
طريقة التحضير والاستخدام:
هنحط الموز وزيت الزيتون والزبادي في الخلاط ونضربهم كويس لحد ما يبقى عندنا خليط ناعم زي الكريم, هنغسل الشعر وهو مبلول شوية هنبدأ نحط عليه الخليط من فروة الراس للاطراف ونركز على الاطراف التالفة والمقصفة, هنسيبه نص ساعة وبعدين نغسله بالشامبو والبلسم, نكرر الوصفة مرة في الاسبوع.
5- ماسك زيت الزيتون والمايونيز “بروتين طبيعي للشعر”:
كلناعارفين البروتين قد ايه مكلف وغالي في صالونات التجميل دلوقتي تقدري تعمليه في البيت باقل التكاليف وابسط الحاجات بماسك زيت الزيتون والمايزنيز هينعم الشعر, ويقلل من التجعد, وهيخليه بيلمع.
المكونات:
– كوباية مايونيز.
– من 2 لــ 3 معالق كبيرة زيت زيتون.
– الافوكادو – زيت اللوز الحلو – العسل “المكونات دي اختياريه”.
طريقة التحضير والاستخدام:
هنخلط المايونيز وزيت الزيتون كويس مع بعض, هنغسل الشعر وبعدين وهو مبلول شوية نحط الماسك على الشعر كله ونركز على اطراف الشعر, هنسيب الماسك نص ساعة وبعدين نغسله بالشامبو والبلسم, نكرر الماسك مرة واحدة في الاسبوع.
6- ماسك زيت الزيتون وصفار البيض “لعلاج تساقط الشعر”:
كتير مننا بيعاني من مشكلة تساقط الشعر, لكن الماسك ده هيخلصك من المشكلة لانه غني بالبروتين المغذي للشعر اللي هيساعد تحفيز بصيلات الشعر ومنعه من التساقط , وبيساعد على اصلاح الشعر التالف, وبيقوي الشعر وبيرطبه لانه غني بفيتامين A, وE, وD.
المكونات:
– صفار بيضة.
– 2 معلقة كبيرة زيت زيتون.
– معلقة كبيرة عصير بصل.
طريقة التحضير والاستخدام:
هنخلط زيت الزيتون وصفار البيض وعصير البصل مع بعض كويس, وهنبدأ نحط الماسك على الشعر كله ممكن نحطه بايدينا او نستخدم فرشة الصبغة هتبقى اسهل لان الماسك هيكون سايل هندلك فروة الراس والشعر كويس بالخليط لمدة دقيقتين ونسيبه نص ساعة وبعدين نغسله بالشامبو والبلسم, نكرر الماسك مرتين في الاسبوع.
7- ماسك زيت الزيتون والبيض “لنمو الشعر”:
الماسك ده غني بالبروتينات جدا وبالاحماض الدهنية وفيتامين E وده بيساعد على تقوية الشعر وبيسرع نموه , بيمنع تساقط الشعر, وبيمنع التقصف وبيعالج تلف وجفاف الشعر وبيرطبه, وكمان بيمنع شيب الشعر.
المكونات:
– بيضة كاملة.
– 2 معلقة كبيرة زيت زيتون.
– 2 معلقة كبيرة لبن.
– 2 كبسولة فيتامين E.
طريقة التحضير والاستخدام:
هنخلط البيضة مع زيت الزيتون واللبن والفيتامين كويس جدا “لو شعرك دهني استخدمي بياض البيض بس”, هنغسل الشعر ونسيبه ينشف وبعدين نحط الخليط على الشعر كله من فروة الراس للاطراف, هنسيب الخليط على الشعر لمدة 40 دقيقة وبعدين نغسله بالشامبو والبلسم, نكرر الماسك من مرة لمرتين في الاسبوع.
اعرفي 12 حيلة ونصيحة عشان تتجنبي الشعر الهايش
