شوفي طريقة عمل فقاقيع الشور “bubble bath” بنفسك في البيت
لو نفسك فى شعور مختلف عن كل مرة بتاخدى فيها شاور العادى بتاعك فى المقال ده “بنات حوا ” هتعرفك على مكون جديد جدا فى حمامك و مش هتستغنى عنه بعد كده فى كل شور هتاخديه و تقريبا مش هيكلفك حاجه و بمكونات سيطة من مطبخك و طريقة عمله سهلة جدا . فقاقيع الشور أو ال bubble bath هنعرف سوا ازاى تعمليها بنفسك فى البيت فى وقت قليل ميعديش الـ 5 دقايق وتعمليها بالريحة المفضلة ليكي عشان تبقي طالعه من الشور ريحتك حلوة و مختلفة و تنسيكى اى تعب …
المكونات اللى هتحتاجيها:
-كوباية من البيكنج صودا .
-4/3 كوباية من حمض الستريك ” هتلاقيه فى الصيدلية ” .
-4/3 كوباية من ملح ابسوم ” الملح الانجليزى” .
-4/3 كوباية من نشا الذرة .
– مقدار مناسب من الاعشاب العطرية ” اختيارى علي حسب الريحة اللي بتحبيها” .
– حوالى 20 نقطة من اى زيت عطرى ” اختيارى علي حسب الريحة اللي بتحبيها” .
– ربع كوباية من زيت جوز الهند .
– اربع ملاعق اكل مياة .
طريقة التحضير :
الخطوة الاولى :
فى طبق او حلة كبيرة امزجى البيكنج صودا و حمض الستريك مع الملح الانجليزى و نشا الذرة، و كمان ضيفى عليهم الاعشاب الجافة لو عايزة.
الخطوة الثانية :
امزجى المكونات دى مع بعض كويس اوى لحد ما يبداوا يكونوا حاجه شبه العجينة كده، و بعدينر ضيفى الزيت العطرى و زيت جوز الهند و امزجيهم مع بعض ” اعجنيهم ” مرة تانية .
الخطوة الثالثة :
فى الخطوة دى هتضيفى المياة ببطء شوية بشوية ، و بعد كل معلقة مياة ارجعى اعجنى المكونات كلها مع بعض لحد ما يمتزجوا مع شوية المياة اللى ضفتيهم ، و هكذا لحد ما باقى كمية المياة تخلص .
الخطوة الرابعة :
فى الخطوة دى ممكن تقسمى المزيج فى قالب تلج او تشكليهم على شكب كور علشان تطلعى شكلهم حلو و منتظم .
اخر خطوة هى انك لما تيجى تاخدى حمام هتملى البانيو بالمياة حسب درجة حرارة المياة االمناسبة ليكى و تحطى كورة شور او اتنين بالكتير و تسيبيها تدوب فى المياة ، و بعدين استمتعى بشور جديد و مختلف و هيخليكى مرتاحة و ريحة جسمك حلوة جدا .