ازاي تستخدمي العسل لتخسيس الوزن !
كلنا دايما بندور على الرشاقة والجسم المثالي وبنجرب انظمة غذائية كتير ورياضة عشان نخس, النهاردة احنا جايبين لكل بنات حوا طريقة جديدة لتخسيس الوزن بمكون واحد بس هو العسل, كلنا عارفين فوايد العسل الصحية وحتى فوايدة للبشرة والشعر لكن النهاردة هيزيد على الفوايد دي تخسيس الوزن, تعالوا نعرف مع بعض ازاي نستخدم العسل لتخسيس الوزن ؟
– ايه هي فوايد العسل الصحية وليه بيساعد في تخسيس الوزن ؟
1- نسبة السكر في الدم اللي بياخدها الجسم من العسل هي 55 Gl, وده بيساعد على توفير طاقة بشكل سريع للجسم.
2- العسل بيساعد على تحطيم الدهون اللي مخزنة في الجسم.
3- العسل بيساعد الكبد على افراز الجلوكوز, وده اللي بينبه الدماغ انها تنتج هرمونات حرق الدهون.
4- بيزود نسبة الكوليسترول الجيد في الجسم وده بيقلل من الاجهاد على القلب والاوعية الدموية, وبالتالي بيحميه من خطر الاصابة بالنوبات القلبية.
5- العسل بيحتوي على 22 من الاحماض الامينية والاحماض دي بتساعد على تحويل الدهون لطاقة.
6- بيحسن اداء الجهاز الهضمي.
7- لو اخدتي معلقة عسل قبل النوم ده بيحسن النوم جدا وبيقلل من هرمونات التوتر اللي بتكون مسئولة عن زيادة الوزن.
8- العسل بيحتوي على فيتامينات B6, والثيامين, والنياسين, الريبوفلافين, وحامض البانتوثنيك وكل الفيتامينات والاحماض دي بتعزز من عملية الايض في الجسم.
9- بيحتوي كمان على المعادن زي الكالسيوم, والمغنسيوم, والنحاس, والحديد, والفوسفور, والزنك, والبوتاسيوم, والصوديوم, وكل المعادن دي بتقوي جهاز المناعة.
10- بيحتوي على مضادات الاكسدة وخصائص مضادة للبكتيريا, وده بيساعد الجسم انه يفضل دايما في حالة صحية كويسة, وبيحارب وبيقي الجسم من كتير من الامراض زي السرطان وغيره من الامراض الخطيرة.
11- الانزيمات الموجودة في العسل بتساعد على تقليل الشهية, ومنع الجسم من الافراط في الاكل.
– ازاي نستخدم العسل لتخسيس الوزن ؟
1- وصفة العسل:
– كل يوم قبل النوم على طول ناخد معلقة عسل صغيرة, ده بيساعد كمان على ازالة السموم من الجهاز الهضمي والكبد.
– او ناخد معلقة الصبح على الريق ونشرب وراها كوباية مية دافية.
– او ندوب معلقة عسل صغيرة في كوباية مية دافية ونشربها على الريق.
2- وصفة العسل الليمون:
الخليط ده بينقي الامعاء والكبد وبيقلل من الدهون.
– هنضيف عصير نص ليمونة ومعلقة عسل صغيرة لكوباية مية دافية وندوبهم فيها كويس ونشربها على الريق.
– او نخلط معلقتين كبار من عصير الليمون معلقة كبيرة عسل وناخدهم على الريق.
3- وصفة العسل والقرفة:
– هنغلي كوباية مية ونحط فيها قطعتين من عيدان القرفة الخشب ونسيبها تغلي في المية لمدة ربع ساعة, وبعدين نرفعها من على النار ونسيبها تبرد شوية لحد ما تبقى دافية بس ونضيف لها معلقة صغيرة عسل ونقلبها ونشربها على الريق, وتتكرر الوصفة كل يوم, او ممكن نضيف نص معلقة صغيرة قرفة مطحونة للمية المغلية بدل عيدان القرفة, ونخليها تغلي وبعدين نضيف لها العسل.
– وفي طريقة تانية اننا نضيف نص معلقة قرفة مطحونة ومعلقة صغيرة عسل لكوباية مية دافية ونقلبهم كويس فيها ونشربه.
4- وصفة العسل والقرفة وزيت جوز الهند:
اخلطي معلقة صغيرة قرفة مطحونة مع معلقة كبيرة عسل ومعلقة كبيرة زيت جوز هند او زيت سمسم, وتاكليها على الريق, وتكرريها كل يوم.
5- وصفة العسل والليمون وخل التفاح:
هنضيف معلقتين كبار من خل التفاح, ومعلقة كبيرة عسل, ونص معلقة صغيرة قرفة مطحونة لكوباية مية دافية ونقلبهم كويس ونشربهم على الريق, كرري الوصفة من 3 لــ 5 مرات في الاسبوع.
6- وصفة العسل والزنجبيل:
الزنجبيل والعسل لما بيتخلطوا مع بعض بيساعدوا على تقوية عملية التمثيل الغذائي وده بيساعد في تسهيل عملية الهضم وتخسيس الوزن.
– هنغلي كوباية مية ونضيف لها معلقة كبيرة من الزنجبيل المفروم ونسيبه يغلي على النار 5 دقايق, وبعدين نرفعه من على النار ونسيبه يبرد شوية وبعدين نضيف له معلقة صغيرة عسل ونقلبه كويس ويتشرب على الريق كل يوم.
– او ممكن نخلط معلقة زنجبيل مفروم مع معلقة عسل وناكلها وبعدين نشرب وراها كوباية مية دافية.
7- وصفة العسل والكركم والزنجبيل:
هنخلط معلقة صغيرة عسل مع معلقة زنجبيل مطحون ومعلقة كركم مطحون ونضيفهم لكوباية مية دافية ونقلبهم كويس ونشربه على الريق.
8- وصفة العسل والشوفان:
الشوفان ليه فوايد صحية كتير جدا ومنها انه بيمتص الكوليسترول السيء او المضر من الجسم, وبيسيطر على مرض السكر, وبيقلل من ارتفاع ضغط الدم, وبيعالج الامساك.
هنطبخ كوباية شوفان مع المية او اللبن ولما يستوي هنسيبه يبرد شوية وبعدين نضيف له معلقة صغيرة عسل ونقلب الخليط كويس, وتاكليها كل يوم كوجبة فطار.
9- وصفة العسل والشاي الاخضر:
هنعمل الشاي الاخضر بالطريقة العادية هنحط باكت الشاي في كوباية مية سخنة ونسيبة ربع ساعة وبعدين نطلعه من الكوباية ونضيف له معلقة عسل صغيرة ونقلبه كويس, ويتشرب كل يوم على الريق.
10- وصفة العسل والزبادي:
هنضيف معلقة صغيرة عسل على كوباية زبادي وناكلها كوجبة خفيفة في اي وقت لو حسينا بالجوع بدل اي وجبة تانية ممكن تزود الوزن, وممكن تضيفي للزبادي اي نوع فاكهة بتحبيه عشان تزودي قيمته الغذائية اكتر.
11- وصفة العسل والفاكهة:
– ضيفي معلقة صغيرة عسل لاي نوع عصير فاكهة انتي بتحبيه واشربيه يوميا على الريق.
– او ممكن تضيفي معلقة صغيرة عسل لكوباية فواكة مقطعة اي انواع متوفرة عندك, وتاكليه يوميا كوجبة خفيفة لو حسيتي بالجوع في اي وقت.
12- وصفة العسل وخل التفاح:
خل التفاح بيساعد في التقليل من الشهية, وبيقوي جهاز المناعة, وبيسرع من عملية التمثيل الغذائي.
– هنخلط معلقة كبيرة من خل التفاح مع معلقة كبيرة عسل وناخدها قبل النوم على طول يوميا.
– او ممكن نضيف خليط خل التفاح والعسل ده لكوباية عصير عنب او كوباية مية دافية وتتشرب يوميا.
13- وصفة العسل مع الفلفل والليمون:
هنخلط 2 معلقة صغيرة من خل التفاح مع 2 معلقة صغيرة عسل ومعلقة صغيرة عصير ثوم هنفرمه وناخد العصير بتاعه ومعاهم قليل من الفلفل الحار او الحراق و2 معلقة كبيرة عصير ليمون ونحط كل المكونات دي في كوباية مية دافية ونقلبهم مع بعض كويس, وتتشرب كل يوم قبل كل وجبة.
14- وصفة العسل والبابونج:
كوباية من شاي البابونج او الشاي الاخضر هنعملهم بالطريقة العادية وبعدين نضيف 3 معالق صغيرة خل تفاح و2 معلقة صغيرة عسل ونقلبهم مع بعض كويس, ويتشرب 6 مرات في اليوم.
15- وصفة العسل وعصير الثوم:
– هنخلط معلقة صغيرة عسل مع معلقة صغيرة عصير ثوم ومعلقة صغيرة عصير ثوم ومعلقة صغيرة خل التفاح, وناخد الخليط ده كل يوم على الريق قبل الفطار.
– او ممكن نحط المكونات دي كلها في كوباية مية دافية ونشربها على الريق كل يوم.
16- وصفة العسل وعصير الزنجبيل:
هنفرم الزنجبيل ونضغط عليه وناخد من العصير بتاعه معلقة صغيرة ونضيف عليها معلقة صغيرة عسل ومعلقة كبيرة خل تفاح وهنضيف الخليط لكوباية مية دافية وتتشرب كل يوم على الريق.
17- العسل مع التوست:
– ممكن الصبح نفرد العسل على شريحة توست محمص كوجبة فطار.
– او نخلط معلقة كبيرة من العسل مع معلقة كبيرة من زبدة فول السوداني ونفردها على شريحة توست محمص وناكلها كوجبة فطار.
18- وصفة العسل واللبن:
نضيف معلقة كبيرة عسل لكوباية لبن دافي ونشرب منه يوميا.
19- وصفة العسل وجل الالوفيرا:
– نخلط 2 معلقة كبيرة من جل الالوفيرا مع معلقة كبيرة عسل وناخد الخليط ده كل يوم على الريق.
– او نخلط معلقة كبيرة عسل مع كوباية عصير الصبار, وتتشرب كل يوم على الريق.
20- وصفة العسل وزيت جوز الهند:
نضيف معلقة كبيرة من زيت جوز الهند ومعلقة كبيرة عسل لكوباية مية دافية, وتتشرب كل يوم على الريق.
21- وصفة العسل والنعناع:
– نحط في الخلاط 8 كوبايات مية معاهم عصير 6 ليمونات, ونص كوباية عسل, و10 اوراق نعناع , وكام مكعب تلج, نضربهم في الخلاط كويس مع بعض ونحطه في التلاجة ساعتين, ونشرب منه خلال اليوم في نص الوجبات, او على مدار اليوم كذا مره, ويتشرب يوميا.
– او ممكن نغلي كوبايتين مية ونحط فيهم معلقة كبيرة هندباء, ونص قطعة زنجبيل مفروم, ونص عود قرفة خشب, وحباية حبهان, و4 اوراق نعناع ونسيبهم يغلوا على النار 5 دقايق وبعدين نرفعهم من على النار ونسيب الخليط يبرد شوية وبعدين نضيف له معلقة صغيرة عسل, ويتشرب مرتين في اليوم يوميا.
22- وصفة العسل والفلفل الاسود:
نخلط معلقة كبيرة عسل مع معلقة صغيرة فلفل اسود, وناكلهم على الريق ونشرب بعدهم كوباية مية دافية, وممكن نضيف لهم 3 معالق كبيرة عصير ليمون عشان نحسن طعمه شوية, وتتكرر الوصفة يوميا.
23- وصفة العسل والجزر:
نجيب جزر بحجم صغير ونغليه في ميه لحد ما يطرى, بعد كده هنطلعه من المية نهرسه ونضيف عليه العسل, يعني كمية مش محددة اعملي كمية اللي تكفيكي لليوم, وكلي الخليط ده كوجبة فطار وعشا.
24- وصفة العسل والطماطم:
حطي في الخلاط 2 ثمرة طماطم معاهم 5 اوراق نعناع وكوباية مية, ومعلقة كبيرة عسل, ونص معلقة صغيرة فلفل اسود, اضربيهم كويس مع بعض, واشربي منه كل يومعلى الريق قبل الفطار.
25- وصفة العسل والجريب فروت:
نجيب ثمرة جريب فروت نقطعها شرايح ونملى ابريق مية ونحط فيها شرايح الجريب فروت ومعلقة كبيرة عسل, ونسيبهم منقوعين في المية من بالليل للصبح في التلاجة, وكل يوم على الريق نشرب منه كوباية.
26- وصفة العسل ومية جوز الهند:
نهرس ثمرة فاكهة من اي نوع احنا نختاره ونضيف عليه مية جوز الهند ومعلقة كبيرة عسل, وناخد منه يوميا على الريق.
27- وصفة العسل والحلبة:
– ممكن نضيف نص معلقة صغيرة حلبة لاكلنا العادي اللي احنا بناكله.
– او نحمص شوية من بذور الحلبة في طاسة وبعدين نطحنها في الهون ونخلط معاها معلقة صغيرة عسل, وتاكليها يوميا على الريق.
– او نغلي كوباية مية ونضيف لها نص معلقة صغيرة بذور الحلبة ونسيبها على نار هادية لمدة 5 دقايق وبعدين نرفعها من على النار ونسيبها تبرد شوية وبعدين نضيف لها معلقة صغيرة عسل ونقلب الخليط كويس ونشربه كل يوم على الريق, ولو عايزين فايدة اضافية ممكن نضيف للخليط نص معلقة صغيرة عصير ليمون.
28- وصفة العسل والكمون:
هنضيف 3 جرام كمون مطحون مع معلقة صغيرة عسل لكوباية مية دافية, ونشربه كل يوم على الريق, ولو عايزين فايدة اضافية ممكن نضيف كام نقطة عصير ليمون للخليط.
29- وصفة العسل واوراق الكاري:
الكاري من الحاجات المفيدة جدا اللي بتحافظ على مستويات السكر في الدم, وبيحمي الكبد من التلف.
هنطحن شوية من ورق الكاري وناخد منه معلقة صغيرة ونضيف عليها معلقة كبيرة عسل, وناخده يوميا على الريق, وممكن نستخدم بدل ورق الكاري اوراق كاري مطحونة جاهزة ” موجودة عند العطار”.
30- وصفة العسل والقرع:
هنغلي كوباية من قطع القرع في المية لمدة 10 دقايق لحد ما يطرى وبعدين نهرسه ونضيف عليه كوباية لبن و2 معلقة كبيرة عسل ونقلب الخليط كويس مع بعض, وناكل منه مرتين في اليوم.
وصفات مساج بالعسل لحرق الدهون:
بعد كل الوصفات اللي قولناها تتاكل او تتشرب, هنقولكم على وصفات بالعسل يتعمل بيها مساج للمناطق اللي فيها دهون وعايزين نخسسها هتساعد على حرق الدهون.
ملحوظة : لو حامل او عندك دوالي في الجلد يبقى متعمليش الوصفات دي.
1- مساج العسل مع الزيوت العطرية:
هنخلط 2 معلقة صغيرة عسل مع كام نقطة عصير ليمون, ونقطتين زيت نعناع, ونقطتين من زيت اللافندر, هنغسل المكان اللي فيه دهون عايزين نتخلص منها في اي مكان في الجسم وندلكها بالخليط ده لمدة ربع ساعة, ونسيبها على الجسم نص ساعة كمان, وبعدين نغسل جسمنا عادي, ونكرر المساج ده 3 مرات في الاسبوع.
2- مساج العسل والقهوة:
هنخلط 2 معلقة صغيرة قهوة مع معلقة كبيرة عسل, وزي الطريقة اللي فاتت هنغسل المناطق اللي في دهون كويس وندلكها بالخليط لمدة ربع ساعة ونسيبه 20 دقيقة كمان على الجسم وبعدين نغسله, ونكرر المساج 3 مرات في الاسبوع.
3- مساج العسل والالوفيرا والمايونيز:
الطريقة دي فعالة جدا للتخلص من دهون البطن بشكل خاص.
هنخلط معلقة كبيرة من جل الالوفيرا مع معلقة صغيرة عسل ومعلقة صغيرة مايونيز, ادهني الخليط على منطقة البطن ودليكها في حركات دائرية لمدة 10 دقايق وسيبيها 20 دقيقة وبعدين اغسليها بمية دافية وبعدين مية باردة, وتتعمل مرة واحدة في الاسبوع.
4- مساج العسل وكريمة الطبخ Sour Cream:
هنخلط نص معلقة صغيرة من كريمة الطبخ مع نص معلقة صغيرة عسل مع نص معلقة صغيرة كركم, هندلك المناطق اللي فيها دهون لمدة 10 دقايق ونسيبها ربع ساعة كمان, وبعدين نغسله بمية دافية وبعدين مية باردة, تتعمل مرة واحدة في الاسبوع.
5- مساج العسل والليمون وزيت الزيتون:
هنخلط 3 معالق صغيرة عسل مع كام نقطة عصير ليمون وكام نقطة زيت زيتون, هندلك المناطق اللي فيها دهون بالخليط لمدة 5 دقايق ونسيبه 20 دقيقة, وبعدين نغسله بمية دافية وبعدين مية باردة, ونكرر المساج ده مرتين في اليوم لافضل النتايج.
– تعالوا نعرف شوية نصايح وتحذيرات عشان الوصفات تجيب افضل النتايج:
1- الافضل نحاول اننا نستخدم في الوصفات العسل الخام الاصلي, نخلي بالنا لما نيجي نشتريه اننا نجيبه من مكان مضمون.
2- مافيش وصفة معينة من الوصفات اللي احنا قولناها فعالة اكتر من غيرها انتي اختاري الوصفة اللي انتي ترتاحي معاها وتحبيها اكتر, وتختاري واحدة بس تمشي عليها فترة عشان تعرفي اي وصفة هتجيب معاكي نتيجة افضل.
3- لو معندكيش وقت تنتظمي على الوصفات بشكل مستمر حاولي بقدر الامكان تستبدلي السكر العادي في اكلك ومشروباتك بالعسل, لان ده هيساعد على تخسيس الوزن.
4- متطبخيش العسل ابدا في درجة حرارة عالية او مزجه مع مية مغلية, ولو تلاحظوا في كل الوصفات اللي فيها مية مغلية قولنا نسيبها تبرد وبعدين نضيف العسل, لان الحرارة بتضيع القيمة الغذائية اللي فيه.
5- لو انتي عندك حساسية لحبوب اللقاح, يبقى تجنبي العسل ومش هتنفع معاكي الوصفات دي.
6- مع وصفات العسل نحاول طبعا نمشي على نظام غذائي صحي على قد ما نقدر, لان الاكل الصحي مش بس هيساعدك انك تخسي لكن كمان بيحافظ على توازن الجهاز المناعي في الجسم ويخليه يشتغل بشكل سليم.
7- والعسل زي ما هو مفيد لكن زيه زي اي حاجة لو زادت عن حدها مش كويس يعني مش نقول بيخسس يبقى نزود منه ! لا غلط طبعا, العسل بردوا في نسبة سكر وزيادته ممكن تسبب ارتفاع مستويات السكر في الدم ومستويات الانسولين, عشان حد الحد الاقصى المسموح بيه من العسل يوميا هو 6 معالق كبار.
8- لو بنحب اكل الحلويات وطبعا دي اكتر حاجة بتزود الوزن ممكن نستبدل السكر بالعسل في اي نوع حلويات بنعمله.
9- لو حد مصاب بمرض السكر, او الحامل , او الام اللي بترضع يفضل استشارة دكتور قبل استخدام العسل.
10- لو هنستخدم السكر ومنقدرش نستغنى عنه ممكن نحاول نقلل منه على قد ما نقدر ونستخدم كمية صغيرة, وكمان نقلل من كمية الملح في الاكل.
11- نشرب كمية مية كبيرة خلال اليوم, ولازم في نظامنا الغذائي اليومي ندخل الفاكهة والخضار الطازة.
12- نحاول نمشي يوميا مشي سريع لمدة من 20 لـ 30 دقيقة, او نمارس اي تمارين رياضية بشكل يومي.
13- نحاول نتجنب الوجبات السريعة لان كلها دهون, وناكل كميات اكل معقولة بلاش الشراهة في الاكل, ولو في حد بيدخن الافضل انه يبتعد عن التدخين ويتجنبه خالص.
شوفي طريقة هتساعدك على خسارة 4 كيلو في 10 ايام بشرب المية بس !
