16 نصيحة وحيلة للبنات اللي شعرهم خفيف تخليه اتقل !

ريهام محمود
ريهام محمود
في
شعر
28551

الشعر الخفيف مشكلة بيعاني منها كتير من البنات وبنقعد نجرب حاجات كتير عشان نتقل شعرنا, والمشكلة التانية اللي بتقابل البنات اللي شعرهم خفيف انهم مش بيعرفوا ايه قصة الشعر اللي ممكن تناسبهم عشان الشعر يطلع اتقل وشكله حلو, النهاردة احنا جايبين لكل بنات حوا اللي بيعانوا من مشكلة الشعر الخفيف نصايح وحيل تخلي شعرك اتقل, وكمان انسب قصات الشعر المناسبة للشعر الخفيف.

تعالوا نعرف مع بعض 16 نصيحة وحيلة للبنات اللي شعرهم خفيف:

1- تجنبي تشابك الشعر:

لازم نحرص اننا نسلك شعرنا اول باول عشان نتجنب التشابك لانه لو سبتيه لما هتيجي تسرحيه هيقع وطبعا هيخف وكمان هيتقطع منك ويبوظ وانتي بتسلكيه, عشان كده لازم تحاولي تتجنبي تشابك الشعر عشان تحافظي على شعرك صحي.

تجنبي تشابك الشعر
تجنبي تشابك الشعر

2- سرحي شعرك قبل ما تغسليه:

قبل ما تغسلي شعرك سرحيه عشان تفكي التشابك بتاعه, لان الشعر وهو ناشف بيكون اقوى من وهو مبلول عشان كده لو اتسرح وهو مبلول بيقع وبيخف لانه بيبقى ضعيف, فالافضل تسرحيه وهو ناشف قبل ما تغسليه.

سرحي شعرك قبل ما تغسليه
سرحي شعرك قبل ما تغسليه

3- استخدمي نوع شامبو وبلسم كويس ومناسب لشعرك:

مهم جدا اننا نختار الشامبو والبلسم المناسبين لنوعية شعرنا, لان احتياجات الشعر الجاف غير الدهني غير العادي يعني لازم تختاري النوع المناسب لنوع شعرك, وكمان البلسم بيساعد على فك تشابك الشعر بسهولة لانه بيرطبه وبالتالي هيحافظ عليه ومش هيقع.

استخدمي نوع شامبو وبلسم كويس ومناسب لشعرك
استخدمي نوع شامبو وبلسم كويس ومناسب لشعرك

4- متحطيش البلسم على فروة الراس:

طبعا زي ما قولنا البلسم مهم جدا للشعر ولكن المفروض انه ميتحطش على فروة الراس لانه ممكن يسد المسام بتاعتها, الطريقة الصح انك تحطيه على 2/3 او 3/4 الشعر من تحت بس, ولازم تغسلي شعرك كويس من البلسم وتتأكدي انه نزل كله من شعرك.

متحطيش البلسم على فروة الراس
متحطيش البلسم على فروة الراس

5- استخدمي البلسم الخاص بالشعر الخفيف للتشابك الصعب:

استخدمي الــ Leave – In Conditioner او البلسم الخاص بالشعر الخفيف لفك التشابك القوي او الصعب من شعرك, ممكن تستخدموا تريسميه او غارنييه.

استخدمي البلسم الخاص بالشعر الخفيف للتشابك الصعب
استخدمي البلسم الخاص بالشعر الخفيف للتشابك الصعب

6- متسرحيش شعرك وهو مبلول:

زي ما قولنا قبل كده بردوا ان الشعر وهو مبلول بيكون ضعيف عشان كده الافضل انك تتجنبي انك تسرحيه وهو مبلول, الا في حالة واحدة لو متوفر عندك مشط خشب سنانة واسعة ده النوع الوحيد اللي ممكن تسرحي بيه الشعر وهو مبلول لانه مش بيقطع الشعر وابعدي عن استخدام الفرشة والشعر مبلول.

متسرحيش شعرك وهو مبلول
متسرحيش شعرك وهو مبلول

7- لمي شعرك وانتي نايمة:

عشان تحافظي على شعرك وانتي نايمة سرحيه واعمليه ضفيرة وتكون مش محكومة اوي يعني خليها سايبة شوية عشان الشعر يتنفس, او اعمليه ديل حصان منخفض, لانك كده هتحافظي عليه من التشابك وهتصحي الصبح هيكون سهل عليكي تسرحيه ومش هيتعبك.

لمي شعرك وانتي نايمة
لمي شعرك وانتي نايمة

8- نامي على مخدة ساتان او حرير:

لو بتنامي على مخدة قطن استبدليها بمخدة ساتان او حرير لانها افضل للشعر, لان القطن بيسبب تشابك الشعر وكمان بيسبب جفافه وتقصف الاطراف, لكن الساتان او الحرير بيقلل من احتكاك الشعر وده بيقلل من تكسره وتشابكه وهتصحي الصبح تلاقيه احسن, حتى المخدات الساتان افضل كمان للبشرة مش بس للشعر.

نامي على مخدة ساتان
نامي على مخدة ساتان

9- استخدمي الشامبو الجاف:

الشعر الخفيف بيزيت وبيلزق بسرعة اكتر من الشعر التقيل وعشان متغسليش شعرك كتير انسب حل ليكي هو الشامبو الجاف زي ما اتكلمنا قبل كده هو بديل للشامبو العادي لو مش عايزة تغسليه, حطي شوية منه على جذور الشعر وافركي بيه فروة الراس وبعدين سرحيه بالفرشة عشان توزعي الشامبو على الشعر كله, هينضف الشعر وهيديه ريحة حلوة.

استخدمي الشامبو الجاف
استخدمي الشامبو الجاف

10- سرحي شعرك على قدام ونشفيه بالسيشوار:

في حيلة سهلة وسريعة ممكن تعمليها عشان تدي الشعر حجم اكبر, سرحي شعرك كويس الاول عشان ميبقاش فيه تشابك وبعدين اقلبي شعرك كله لقدام وركزي عليه السيشوار الطريقة دي هتدي شعرك احجم اكبر.

سرحي شعرك على قدام واعمليه بالسيشوار
سرحي شعرك على قدام واعمليه بالسيشوار

11- استخدمي سبراي او موس للشعر:

في طريقة تانية ممكن تعمليها استخدمي سبراي للشعر او موس لو عايزة شعرك كيرلي وجيبي فرشة كبيرة مستديرة ولفي جذور الشعر على الفرشة وركزي عليها بالسيشوار, الطريقة دي بردوا هتدي شعرك حجم اكبر.

استخدمي سبراي او موس للشعر
استخدمي سبراي او موس للشعر

12- استخدمي سبراي ملح البحر:

من الحاجات اللي بتدي حجم اكبر للشعر مرتين اكتر, سبراي ملح البحر موجود في المحلات اللي بتبيع منتجات تصفيف الشعر, رشيه علي على شعرك قبل ما تنشفيه بالسيشوار ده بيديه حجم اكبر.

استخدمي سبراي ملح البحر
استخدمي سبراي ملح البحر

13- ادهنيه بكريم تصفيف الشعر قبل السيشوار:

ممكن تدهني شعرك اي كريم تصفيف متعودة تستخدمية, او تخلطي شوية من كريم تصفيف الشعر مع سبراي الملح وتحطيهم على شعرك كله وتنشفيه بالسيشوار باستخدام الفرشة الكبيرة اللي بتتركب في السيشوار اللي بتنفش الشعر, دي بردوا من الطرق اللي بتدي حجم اكبر للشعر.

ادهنيه كريم لتصفيف الشعر
ادهنيه كريم لتصفيف الشعر

14- تجعيد الشعر:

من الحاجات اللي بتدي حجم كبير للشعر هو طريقة تجعيد الشعر تجعيدات صغيرة ده بيدي حجم اكبر بكتير للشعر, ممكن تجعديه كله, او تسيبي الجزء اللي من قدام ستريت او مفرود وتجعدي باقي الشعر.

تجعيد الشعر
تجعيد الشعر

15- دلكي فروة الراس:

دلكي فروة الراس لان ده بينشط الدورة الدموية وبيساعد على نمو وكثافة الشعر, كل يوم واظبي على عمل مساج لفروة الراس قبل ما تنامي لمدة خمس دقايق هتفرق مع شعرك اوي.

دلكي فروة الراس
دلكي فروة الراس

16- كلي اكل صحي:

التغذية الصحية والسليمة من الحاجات اللي بتأثر على نمو شعرنا ومن اكتر الحاجات اللي بتساعد في نمو الشعر وبتخليه كثيف هو حمض الفوليك, والفيتامينات زي فيتامين A, B, B3, B12, C, E, وH.

كلي اكل صحي
كلي اكل صحي

– طيب ايه هي انسب قصات للشعر الخفيف؟

– بالنسبة للشعرالقصير قصة الكاريه تعتبر من اكتر القصات المناسبة جدا للشعر الخفيف لانه بيديه تقل.

الشعر الكارية القصير
الشعر الكارية القصير

– لو انتي عايزة تحتفظي بشعرك طويل ومش عايزة تقصريه ممكن تدرجي الشعر دي من القصات اللي بتبقى حلوة اوي للشعر الخفيف ومناسبة للشعر الطويل والمتوسط, الشعر فيها بيكون مقصوص طبقات فوق بعض وده بيديه تقل وحجم اكبر عن انه يكون كله طول واحد.

تدريج الشعر
تدريج الشعر

شوفوا كمان وصفات نمو الشعر بمكونات بسيطة من مطبخك !

وصفات نمو الشعر بمكونات بسيطة من مطبخك !
وصفات نمو الشعر بمكونات بسيطة من مطبخك !

مقالات متعلقه

خطوتين بس هيساعدوا على زيادة نمو شعرك بسرعة وتكثيفه

خطوتين بس هيساعدوا على زيادة نمو شعرك بسرعة وتكثيفه

4 مكونات طبيعية للعناية بالشعر للحصول على شعر صحي

4 مكونات طبيعية للعناية بالشعر للحصول على شعر صحي

7 نصايح هتخلي شعرك ينمو بشكل اقوى

7 نصايح هتخلي شعرك ينمو بشكل اقوى