27 تسريحة تجنن لشعرك في الصيف

بقلمريهام محمود فيشعر visibility12279

كلنا في الصيف بنحتار في شعرنا وبنبقى عايزين نعمل فيه تسريحات تريحنا وفي نفس الوقت يكون شكلها حلو وجديد, عشان كده احنا النهاردة جيبنا لكل بنات حوا مجموعة تسريحات تجنن لشعرك في الصيف, سهلة وشكلها حلو ومناسبة جدا لجو الصيف.

تعالوا نشوف مع بعض مجموعة تسريحات تجنن لشعرك في الصيف:

1- ديل الحصان المعقود:

التسريحة دي سهلة جدا وبيبقى شكلها حلو اوي, اول حاجة هتعمليها هتدهني شعرك موس عشان يثبت تسريحة الشعر وبعدين هنجيب الشعر كله على جنب واحد ونقسمه خصلتين وتربطي الخصلتين في بعض على شكل عقدة  زي ما هو باين في الصورة كده اعملي عقدتين تحت بعض وحطي استك تحت العقدتين وبنسه عشان تثبيتهم وميتفكوش, وسيبي باقي الشعر سايب وممكن تسرحيه بالمشط بشكل عكسي عشان تخلي شكله منفوش شوية, وكده نبقى خلصنا التسريحة بتاعتنا في خطوات سريعة وبسيطة جدا.

ديل الحصان المعقود
ديل الحصان المعقود

2- تسريحة الفيونكة:

التسريحة دي كمان سهلة جدا هناخد خصلة شعر رفيعة من كل جنب ونرجعم الاتنين على ورا وبعدين هنربطهم في بعض ونعملهم فيونكة ونشبكهم بالبنسة عشان نثبتهم, وممكن تكبري الخصلة لو عايزة الفيونكة اكبر شوية حسب اختيارك.

تسريحة الفيونكة
تسريحة الفيونكة

3- رفع الشعر:

التسريحة دي محتاجة ان الشعر يكون كيرلي عشان تبان ويطلع شكلها احلى, اول خطوة هنعملها هنقسم الشعر جزئين الجزء اللي تحت هنعمله كحكة فوضوية منخفضة تبقى على الرقبة على طول, الجزء اللي فوق هناخد من كل جنب خصلة خصلة نبرمها ونثبتها مع الكحكة بالبنس, والجزء بتاع القصة هنسرحة بالمشط بشكل عكسي عشان ننفش الشعر ونبرمه ونلمه مع باقي الشعر ونشبكه في الكحكة بالبنس.

رفع الشعر
رفع الشعر

4- ضفيرة مع ديل الحصان:

هنسيب جزء صغير من الشعر من تحت خالص ونضفره ونشبكها بالاستك, وباقي الشعر هنعمله ديل حصان ونربطة بالتوكة وبعدين هناخد الخصلة اللي احنا ضفرناها نلفها على ديل الحصان ونثبتها بالبنس وممكن نحط عليها توكة فيها وردة مثلا او قلب عشان تديها شكل حلو.

ضفيرة مع ديل الحصان
ضفيرة مع ديل الحصان

5- كحكة مضفرة:

هتعملي الشعر ديل حصان عالي, وبعدين تقسمي ديل الحصان جزئين وتضفري كل جزء لوحدة وتشبكية باستك يعني هيبقى عندك ضفيرتين, وبعدين هتلفي الضفيرتين عكس بعض على شكل كحكة وتثبتيهم بالبنس, وفي الاخر ممكن ترشي مثبت شعر عشان تثبتي التسريحة اطول فترة, وممكن تحطي توكة فيونكة تحت الكحكة هتدي التسريحة شكل حلو اوي.

كحكة مضفرة
كحكة مضفرة

شوفي من هنا اكتر من 20 طريقة جديدة لعمل كحكة الشعر.

6- كحكة فوضوية مع ديل حصان:

طريقة الشعر الفوضوية او اللي بتكون مش مترتبة دي طالعة موضة اوي يعني شكل التسريحة بيكون منكوش شوية بس بيطلع في الاخر شكلها حلو, وفي التسريحة دي هنعمل كحكة فوضوية مع ديل حصان هتقلبي شعرك كله على قدام وهتعملي ديل حصان عالي وتشبكيه بتوكة استك وبعدين هتاخدي خصلتين من الشعر من كل جنب تلفيهم على التوكة.

كحكة فوضوية مع ديل حصان
كحكة فوضوية مع ديل حصان

7- ضفيرة مع كحكة راقصة البالية:

هتقلبي شعرك كله على قدام وتضفيريه من تحت وتشبكيه باستك وبعدين تلميه مع باقي الشعر تعمليه ديل حصان وبعدين تعملي الشعر كله كحكة وتثبتيه بالبنس.

ضفيرة مع كحكة راقصة البالية
ضفيرة مع كحكة راقصة البالية

8- ديل الحصان مع شعر منفوش:

اول حاجة هنعمل الشعر كيرلي, بعدين هنقسمة اربع اجزاء جزء فوق وجزء تحت وجزء من الجنب اليمين وجزء في الجنب الشمال, هنعمل الجزء اللي تحت ديل حصان منخفض, والجزء اللي فوق هنسرحة بالمشط بشكل عكسي عشان ننفشه وبعدين نبرمه ونشبكه بالبنس مع ديل الحصان, وهنعمل نفس الطريقة في الجزئين اللي في الشمال واللي في اليمين ونبرمهم ونلمهم على ورا مع باقي الشعر ونثبتهم بالبنس.

ديل الحصان مع شعر منفوش
ديل الحصان مع شعر منفوش

9- ضفيرة مع شعر مرفوع:

هنرش مثبت شعر, هنقسم الشعر نصين هناخد الجزء اللي فوق نسرحه بالمشط بالعكس عشان ننفشه, وبعدين نثبته بالبنس على ورا, وباقي الشعر هنقسمه اتنين ونعمله ضفيرتين ضفيرة في كل جنب, وبعدين هنلف الضفيرتين عكس بعض على الشعر من قدام.

ضفيرة مع شعر مرفوع
ضفيرة مع شعر مرفوع

10- كحكة مع ضفيرة:

هنعمل الشعر كله ديل حصان, وبعدين هنطلع خصلة من الشعر ونعمل باقي الشعر كحكة, وبعدين الخصلة اللي احنا طلعناها هنضفرها ونلفها على الكحكة ونثبتها بالبنس.

كحكة مع ضفيرة
كحكة مع ضفيرة

11- ديل السمكة الفرنسي:

هنبدأ بالشعر من فوق نقسمه خصلتين ونجيبهم عكس بعض, وبعدين تاخدي خصل شعر من كل جنب وتعمليهم عكس بعض وطول ما انتي نازلة تاخدي خصل وتعمليها بنفس الطريقة لحد ما يخلص الشعركله, وممكن تسيبيها او تلميها في الاخر كحكة.

ديل السمكة الفرنسي
ديل السمكة الفرنسي

12- كحكة مع اكسسوارات الشعر:

هنعمل كحكة عالية بالطريقة العادية, وبعدين نحط عليها اكسسوارات زي ما احنا عايزين يعني ممكن نلف عليها باندانا ونعملها فيونكة, او نلبس على الشعر من قدام توكة طوق, ممكن نلف الباندانا على الكحكة ونعملها عقدتين فوق بعض, ممكن نحط فيها توكة وردة او فيونكة او اي شكل احنا عايزينه, او نلف عليها شريط رفيع ونعمله فيونكة, يعني قدامك اختيارات كتير تنوعي وتختاري منها اللي تحبيه اكتر.

 كحكة مع اكسسوارات الشعر
كحكة مع اكسسوارات الشعر

13- التوكة الضفيرة:

التسريحة دي هنعمل فيها توكة ضفيرة بالشعر نفسه, هناخد خصلة من الشعر من تحت خالص من اخر الشعر من ورا الودن هنضفرها وبعدين هنلف الضفيرة على الشعر من قدام ونثبتها بالبنس.

التوكة الضفيرة
التوكة الضفيرة

14- ضفيرة فرنسية مع كحكة فوضوية:

هنجيب الشعر كله في جنب واحد هنعمله ضفيرة فرنسية اللي هي بتكون بخصلتين بس نبرمهم على بعض, وبعدين هنلمه ديل حصان, ونسرح الشعر بالمشط بالعكس, وبعدين نعمله كحكة جانبية ونثبتها بالبنس.

ضفيرة فرنسية مع كحكة فوضوية
ضفيرة فرنسية مع كحكة فوضوية

15- ضفيرة جانبية:

هناخد خصلة من الشعر من قدام نضفرها وطول ما احنا بنضفر ناخد خصل من الشعر ندخلها مع الشعر ونضفرها لحد ما تخلص خصلة الشعر ونشبكها بالاستك.

ضفيرة جانبية
ضفيرة جانبية

16- كحكة مبرومة:

التسريحة دي سهلة جدا هنقسم الشعر اربع اجزاء ونمسك كل جزء نبرمه ونعمله كحكة ونثبته بالبنس, وفي الاخر ممكن نحط توكة وردة في جنب الشعر عشان تدي التسريحة شكل احلى.

كحكة مبرومة
كحكة مبرومة

17- الضفيرة الشلال للشعر الطويل:

هناخد خصلة من الشعر من قدام نقسمها تلات اجزاء ونبدأ نضفرها نضفر مرة وناخد معاها خصلة من الشعر من ورا ندخلها مع الضفيرة, وبعدين نضفر مرة كمان وناخد خصلة تانية من الشعر من ورا ندخلها مع الضفيرة وهكذا لحد ما تخلص خصلة الشعر وبعدين نشبكها على ورا باستك.

الضفيرة الشلال
الضفيرة الشلال
الضفيرة الشلال
الضفيرة الشلال

18- الضفيرة الشلال للشعر القصير:

دي نفس طريقة الضفيرة اللي فاتت بالظبط بس للشعر القصير والشعر اللي طولة متوسط.

الضفيرة الشلال للشعر القصير
الضفيرة الشلال للشعر القصير

شوفي من هنا تسريحات للشعر القصير.

19- تسريحة الشعر المبروم:

التسريحة دي مناسبة اوي للشعر القصير والمتوسط , هنبرم الشعر من كل جنب ونلمه على الجنب التاني يعني نبرم الناحية الشمال ونلمها ناحية اليمين ونثبتها بالبنس ونبرم الجنب اليمين ونلمه العكس ناحية الشمال فوق الجزء الاولاني اللي احنا برمناه ونثبت الشعر بالبنس, وممكن في الاخر نحط على الشعر توكة عشان تديه شكل.

تسريحة الشعر المبروم
تسريحة الشعر المبروم

20- ضفيرة مع كحكة جانبية:

هناخد خصلة من الشعر من الجنب نضفرها وبعدين لما نوصل للشعر من ورا ندخله مع الضفيرة ونضفره كله, وبعدين نشبك الضفيرة بالاستك ونعملها كحكة جانبية.

ضفيرة مع كحكة جانبية
ضفيرة مع كحكة جانبية

21- ضفيرة خلفية مع كحكة:

هنقلب الشعر كله على قدام ونضفرة من ورا ونشبكه وبعدين نلم الضفيرة مع باقي الشعر ونشبكه باستك ونعمله كحكة عالية ونثبتها بالبنس.

ضفيرة خلفية مع كحكة
ضفيرة خلفية مع كحكة

22- الباندانا نعملها تربونة شعر:

التسريحة دي مافيهاش اي حاجة خالص وتنفع لو شعرك في يوم مش حلو ومكسلة تغسليه, هنخلي الشعر سايب ونجيب الباندانا نربطها على الشعر بالعكس, يعني خلي اخر الباندانا اللي على شكل مثلت تبقى من قدام واربطيها من قدام وبعدين رجعي الربطة على ورا واربطيها فيونكة.

الباندانا نعملها تربونة شعر
الباندانا نعملها تربونة شعر

23- تسريحة العقدة:

هنعمل الشعر ديل حصان منخفض عادي وبعدين نقسم الشعر من النص ونلف الشعر في النص, وبعدين نبرم باقي الشعر ونثبته بالبنس ونحط توكة عليه من فوق.

تسريحة العقدة
تسريحة العقدة

24- تسريحة العقدة الجانبية:

هنعمل الشعر كيرلي وبعدين هنقسم الشعر خصل من الجنب ونسرحه بالمشط بالعكس ونبرمه ونرجعه على ورا ونثبته بالبنس.

تسريحة العقدة الجانبية
تسريحة العقدة الجانبية

25- ضفيرتين بوهو:

هنقسم الشعر نصين ونبدأ نضفر كل نص لوحده وممكن ندخل مع الضفيرة شريط ملون هيبقى داخل في نص الضفيرة هيديها شكل حلو, وبعدين نرجع الضفيرتين على ورا ونشبكهم مع بعض بالاستك وفي الاخر ناخد خصلة شعر نلفها على الاستك عشان يداريه.

ضفيرتين بوهو
ضفيرتين بوهو

26- الكحكة الدونات:

الكحكة الدونات من التسريحات اللي طالعة موضة اوي وبقى في بنات كتير بيعملوها وهتلاقوا التوكة الدونات متوفرة في محلات الاكسسوارات, هي طريقتها سهلة جدا انتي هتلمي الشعر كله ديل حصان عالي وبعدين تحطي التوكة الدونات وتفردي عليها الشعر لحد ما تغطيها خالص وتجيبي استك رفيع تثبتي بيه الشعر وبعدين تلفي باقي الشعر حوالين الكحكة وتربطيه وتثبتيه بالبنس.

الكحكة الدونات
الكحكة الدونات

27- الكحكة المضفرة السهلة:

هتقسمي الشعر تلات اجزاء, الجزء اللي ورا اعمليه ديل حصان وبعدين ضفيريه واعمليه كحكة, والجزئين اللي في الجناب ابرميهم ولميهم على ورا وثبتيهم مع الكحكة.

الكحكة المضفرة السهلة
الكحكة المضفرة السهلة

شوفي كمان تسريحات تانية ولمي شعرك بطرق شيك وخليكي مختلفة و 11 تسريحة شعر لو معندكيش وقت تغسليه.