8 نصايح مهمين لو عندك قوصة او نفسك تعملي واحدة

بقلمريهام محمود فيشعر visibility8720

كتير من البنات بيحبوا يعملوا قوصة بس بتبقى مشكلتهم ازاي يهتموا بيها عشان يفضل دايما شكلها حلو, حتى اللي معندهمش قوصة بيبقوا خايفين يقصوها عشان نفس المشكلة, لكن القوصة بتدي شكل حلو جدا للوش وبتدي شكل اصغر وكمان بتداري منطقة الجبهة لو عريضة شوية, وعشان كده احنا النهاردة هنقول لكل بنات حوا 8 نصايح هتساعدكم تخلوا شكل القوصة حلو ومظبوط.

تعالوا نعرف سوا 8 نصايح مهمين لو عندك قوصة او نفسك تعملي واحدة لازم تكوني عرفاهم:

1- استخدمي السيشوار والشعر مبلول:

اول حاجة عشان شكل القوصة بتاعتك يطلع حلو انك تعمليها سيشوار وهي لسه مبلولة يعني تعمليها بعد ما تغسلي شعرك على طول متستنيش لما تنشف عشان لما هتعمليها وهي مبلولة هتنشف معاكي بشكل اسرع بالسيشوار وهتديكي نتيجة احسن وهيطلع شكلها مظبوط.

استخدمي السيشوار والشعر مبلول
استخدمي السيشوار والشعر مبلول

2- استخدمي الفرشة المناسبة والسيشوار بطريقة صح:

لما تيجي تعملي سيشوار للقوصة استخدمي الفرشة المدورة الصغيرة اللي شعرها خشن لانها هتطلع لك نتيجة احسن للشعر, وبالنسبة لطريقة ماسكة السيشوار عليها عامل كبير اوي في ان القوصة تطلع مظبوطة والطريقة هي انك تمسكي السيشوار فوق الراس يعني يكون فوق القوصة مش تحتها والفتحة بتاعته متوجهة ناحية الجبين وتنزلي راسك لتحت وتبدأي تمشي الفرشة كذا مره على القوصة لحد ما تتفرد معاكي.

استخدمي الفرشة المناسبة والسيشوار بطريقة صح
استخدمي الفرشة المناسبة والسيشوار بطريقة صح

3- استخدمي مكوى فلات:

لو هتستخدمي المكوى يبقى الافضل انك تستخدمي المكوى الفلات, قسمي القوصة خصل صغيرة وتبدأي تاخدي خصلة خصلة تعمليها لحد ما تخلصي القوصة كلها.

استخدمي مكوى فلات
استخدمي مكوى فلات

4- لفي القوصة لو مش هتستخدمي سيشوار:

لو انتي مش عايزة تستخدمي سيشوار على القوصة وفي نفس الوقت عايزاها تبقى مفرودة ممكن بعد ما تغسليها تقسميها خصلتين وتلفيهم عكس بعض زي ما بنلف الشعر طاقية كده بس هنلف القوصة بس وسيبيها متفكيهاش لحد ما تنشف خالص لما تنشف فكيها هتلاقيها مفرودة.

لفي القوصة لو مش هتستخدمي سيشوار
لفي القوصة لو مش هتستخدمي سيشوار

5- استخدمي كمية قليلة من منتجات تصفيف الشعر:

لما تيجي تستخدمي اي منتج من منتجات الشعر حطي كمية قليلة على القوصة متكتريش منه, يعني لما تيجي تحطي المنتج على شعرك حطيه على ايدك وادهني الشعر كله الاول واللي هيفضل باقي في ايدك منه مشيه على القوصة ده هيبقى كافي جدا ليها لان لو كترتي هيبقى شكل القوصة دهني وملزق وهيطلع شكلها مش حلو.

استخدمي كمية قليلة من منتجات تصفيف الشعر
استخدمي كمية قليلة من منتجات تصفيف الشعر

6- استخدمي منتج تصفيف الشعر المناسب لشعرك:

مهم جدا اننا نختار منتج تصفيف الشعر المناسب لنوع شعرنا يعني مش نستخدم اي منتج وخلاص لان اللي يناسب الشعر الدهني غير الجاف غير العادي كل شعر وليه اللي يناسبه.

استخدمي منتج تصفيف الشعر المناسب لشعرك
استخدمي منتج تصفيف الشعر المناسب لشعرك

7- خلي القوصة دايما نضيفة:

حافظي دايما على نضافة القوصة بشكل مستمر لانها بيبقى شكلها دهني اسرع من باقي الشعر عشان كده لازم نهتم بنضافتها على طول ممكن نغسلها هي بس بالشامبو مش لازم نغسل الشعر كله, او لو مش حابة تغسليها ممكن تستخدمي عليها الشامبو الجاف زي ما اتكلمنا قبل كده عن استخدام الشامبو الجاف واننا ممكن نستخدمه كبديل لغسيل الشعر وقولنا كمان ازاي نعمل الشامبو الجاف بنفسنا في البيت.

خلي القوصة دايما نضيفة
خلي القوصة دايما نضيفة

8- خلي بالك من تأثير كريمات البشرة على الشعر:

في حاجة بنعملها ويمكن مناخدش بالنا منها او بنفتكر انها مش مؤثرة اوي وهي اننا ندهن بشرتنا بكريم مرطب وننزل القوصة على وشنا في الحالة دي كريم البشرة هيتنقل للقوصة ويخلي شكلها دهني عشان كده لما تحطي الكريم المرطب على بشرتك استني عشر دقايق لحد ما البشرة تتشرب الكريم خالص وبعدين نزلي القوصة عادي.

خلي بالك من تأثير كريمات البشرة على الشعر
خلي بالك من تأثير كريمات البشرة على الشعر

شوفي كمان ازاي تقصي شعرك بنفسك في البيت ؟

ازاي تقصي شعرك بنفسك
ازاي تقصي شعرك بنفسك