اتعرفي معانا على موضة البوي فريند بليزر 2016

بقلمريهام محمود فيموضة وأزياء visibility6543

اتكلمنا في موضة 2016 قبل كده عن موضة البنطلون البوفريند وبعد نجاحه الساحق وانتشاره دلوقتي ظهرت موضة جديدة وهي موضة  البليزر البوي فريند..

البليزر بشكل عام من القطع اللي نازلة موضة اوي بقالها كام موسم ومكملة معانا في موضة 2016 يعني في دولاب كل واحدة فينا لازم يكون عندها واحد او اتنين منه لانه بيبقى شيك جدا في اللبس وبيتلبس باكتر من استايل, ودلوقتي نزلت موضة البوي فريند بليزر وهو اللي احنا هنعرفكم عليه من خلال مقالنا النهاردة.

البوي فريند بليزر بيكون موديلة مختلف شوية عن البليزر العادي, بيكون اطول واوسع شوية مش زي البليزرات العادية اللي بتكون قصتها على شكل الجسم اكتر.

والبليزر البوي فريند في 2016 نازل منه استايلات والوان مختلفة نازل منه الالوان الغامقة التقليدية زي الاسود والرمادي ونازل منه الالوان الفاتحة زي الازرق الفاتح والوان الباستيل بتبقى حلوة جدا في اللبس وكمان نازلة موضة اوي الموسم ده.

وممكن تنوعي في لبسه وتلبسيه على الجينز سواء السكيني او الجينز البوي فريند او البنطلونات الجلد, وممكن تلبسيه على الجيبات او على الفساتين, وممكن يتلبس تحتيه بلوزة او تيشرت عادي او بادي او ممكن يتلبس تحتيه قميص جينز, يعني تقدري تختاري الستايل اللي بتحبيه اكتر.

وزي ما قدامنا اختيارات كتير في لبسه لكن في حاجات البوي فريند ميفضلش انه يتلبس مع البنطلونات الواسعة اوي لان اللوك هيطلع مش حلو لان هو اصلا موديل البليزر واسع شوية وعشان اللوك يطلع متناسق نبعد عن البنطلونات الواسعة اوي يعني زي ما قولنا كده ياما سكيني او بنطلون جينز بوي فريند هيطلعوا شيك جدا عليه, كمان يفضل انه ميتلبسش مع بوت طويل لانه هيقصر الرجل واللوك هيطلع مش حلو, وبردوا يفضل لو هتلبسيه على فستان يتلبس على فستان قصير لانه مش هيبقى حلو على الفستان الطويل, الفستان الطويل يناسبه البليزر العادي اكتر.

والميزة في البليزر البوي فريند انه مناسب لكل الاوقات ممكن يتلبس الصبح في الشغل او في الجامعة على الجينز مثلا, وممكن يتلبس بعد الضهر بردوا على الجينز او على جيبة او فستان حسب اختيارك.

تعالوا نشوف مع بعض مجموعة استايلات لــ موضة البوي فريند بليزر: