افضل طرق لم الشعر اللي تريحك تحت الحجاب
كتير من البنات بتقابلهم مشكلة لم الشعر تحت الحجاب في اوقات كتير مش بنعرف نلمه بطريقة صح وبيتفك مننا تحت الطرحة وبيسبب لنا مشكلة واحراج وبنبقى مش مرتاحين وقلقانين انه كل شوية ممكن يتفك مننا, عشان كده احنا النهاردة جايبين لكل بنات حوا افضل طرق لم الشعر اللي تريحك تحت الحجاب.
تعالوا نشوف مع بعض ايه هي افضل طرق لم الشعر اللي هتريحك تحت الحجاب:
1- لم الشعر ديل حصان او كحكة:
لم الشعر ديل حصان او كحكة هي انسب حاجة للشعر الطويل او الشعر اللي طولة متوسط عند الكتف, ممكن تعملي ديل حصان منخفض او تعمليه كحكة وتثبتيه كويس بالبنس عشان ميقعش طبعا دول اكتر تسريحتين هيريحوكي جدا من مشكلة ان الشعر ممكن يتفك تحت الطرحة.
2- لم الشعر بالبنس والكلبسات:
الطريقة دي مناسبة للشعر القصير اوي, وعشان الشعر القصير مش محتاج مجهود في لمه فالطريقة سهلة وبسيطة جدا بس تلمي الشعر على ورا بالبنس والكلبسات, مش محتاجة اكتر من كده لان هو من ورا هيبقى قصير مش محتاج يتلم ومش هيضايقك بس هو كل اللي هتبقي محتاجة تعمليه انك تلميه من قدام بس وتبعديه عن وشك وتثبتيه كويس بالبنس والكلبسات.
3- الضفيرة التقليدية:
الطريقة دي مناسبة للشعر المتوسط اللي عند الكتف او يكون اطول شوية هتناسبوا بردوا, الضفيرة التقليدية اللي هي العادية جدا اللي كلنا عارفينها اللي بنقسم فيها الشعر تلات خصل وبنضفرهم مع بعض واشبكيها باستك من تحت عشان متتفكش.
4- الضفيرة الفرنسية:
بردوا مناسبة للشعر المتوسط عند الكتف او الاطول شوية, والضفيرة الفرنسية مختلفة شوية عن الضفيرة التقليدية بتاعتنا وهي بتكون واخدة الشعر من فوق خالص من اول القصة وبعدين بتنزل لتحت واخدة شكل الضفيرة العادية, والطريقة دي تعتبر انسب تسريحة هتريحك جدا تحت الحجاب لانها بتبقى لمه الشعر كله بطريقة محكومة حتى بعد ما ترجعي البيت وتقلعي الطرحة هتلاقيها زي ما هي ومش هيحصلها اي حاجة ولا هتتنكش ولا هتتفك.