وصفة سريعة تنعم رجلك وتبقى حرير
مشكلة الجلد الميت وخشونة الرجل والكعبين من المشاكل اللي في كتير مننا بيعاني منها وخصوصا دلوقتي في فترة الصيف معظمنا بيحب يلبس صنادل وحاجات مفتوحة وطبعا لازم الرجل يكون شكلها حلو وناعمة, عشان كده احنا النهاردة هنحل لكل بنات حوا المشكلة دي وجايبينلكم طريقة سهلة وسريعة هتخلصك من كل الجلد الميت في الرجل وهترطبها وتنعمها وتخليها زي الحرير.
تعالوا نشوف مع بعض وصفة تنعيم الرجلين وتخليها حرير:
– الحاجات اللي محتاجينها:
– طبق كبير فيه مية سخنة.
– طبق صغير.
– اسبرين “ممكن نستخدم ريفو”.
– عصير ليمون.
– ملح انجليزي “من السوبر ماركت”.
– شراب قطن.
– كريم مرطب.
– غلاف بلاستيك.
– الطريقة:
1- اول حاجة هنجيب الطبق الكبير اللي مليان مية سخنة هنحط فيه الملح وهتحطي رجلك في المية دي لمدة نص ساعة على الاقل يعني ممكن تزودي الوقت عن كده كمان يعني سيبي رجلك فيها على قد ما تقدري لان ده هيسهل ازالة الجلد الميت من الرجل.
2- تاني خطوة هنجيب طبق صغير نحط فيه الاسبرين وزي ما قولنا ممكن نستخدم اسبرين ريفو وبالنسبة للكمية حطي من 15 لــ 20 حباية اسبرين هنطحنهم كويس لحد ما يبقوا ناعمين خالص زي البودرة وبعدين نضيف عليهم عصير الليمون لحد ما الخليط عندك يبقى عجينة سميكة شوية مش سايلة.
3- هتطلعي رجلك من المية بعد ما تسيبيها الفترة اللي احنا قولنا عليها وافركيها بفوطة ونشفيهم كويس.
4- هنجيب خلطة الاسبرين والليمون وندهن بيها الرجل كلها من تحت, ونلف الرجل بالغلاف البلاستيك والغلاف ده اللي هو الخفيف اللي بنستخدمه في لف الاكل او في اللف التنحيفي هنلاقيه في السوبر ماركت.
5- بعد ما نلف رجلنا هنلبس الشراب على الغلاف البلاستيك ونخليهم ملفوفين من 4 لــ 6 ساعات, وبعد ما تخلص المدة هنفك الرجل ونغسلها بالمية والصابون هنلاقي كل الجلد الميت نزل من الرجل وبقت ناعمة جدا.
6- اخر حاجة هندهن الرجل بكريم مرطب ونلبس الشراب وننام بيه طول الليل, وكده نكون خلصنا الطريقة بتاعتنا سهلة وبسيطة ومش مكلفة.
ولو عايزة نتيجة اكتر ومبهرة اوي بقى ممكن تعملي الطريقة دي كل يوم لمدة اسبوعين, هتبقى رجلك ناعمة جدا زي رجل الاطفال.