افكار جديدة لعمل الشوربة في رمضان السنة دي

الشوربة من الاطباق الاساسية على اغلب السفرات في شهر رمضان بشكل خاص اغلبنا بيحب يبدأ الاكل بطبق الشوربة لكن الشوربة غير طعمها اللذيذ هي ليها فوايد صحية كتير جدا, وكتير من الدكاترة واخصائيين التغذية بينصحوا ان لازم اننا نبدأ وجبة الفطار بطبق الشوربة وده لفوايدها الكتير اللي احنا هنعرفها مع بعض من خلال المقال ده , وهنديكم افكار جديدة ولذيذة لعمل طبق الشوربة.

– تعالوا نعرف الاول ايه هي فوايد الشوربة:

1- لما نبدأ وجبتنا بطبق الشوربة ده بيساعد انه يدفي المعدة وبيهيئها انها تستقبل باقي الطعام وبالتالي هيمنع المغص او التقلصات اللي ممكن تحصل للمعدة لو اكلنا الاكل على طول, وده بيحافظ على صحة الجهاز الهضمي ويخليه يشتغل بشكل سليم وصحي.

2- بتعوض الجسم بالسوائل اللي فقدها طول فترة الصيام لانها بتحتوي طبعا على نسبة عالية من المية وده كمان بينعكس على البشرة بشكل ايجابي وبيغذيها وبيخليها صحية.

3- تعتبر الشوربة بكل انواعها سواء شوربة الخضار او اللحوم او البقوليات وجبة صحية جدا لانها غنية بالفيتامينات والمعادن اللي بيحتاجها الجسم اللي بتديه طاقة وتخليه يقدر يتحمل فترة الصيام, وكمان لانها بتتطبخ بطريقة بتحافظ على قيمتها الغذائية وبالتالي بتفضل محتفظة بكل الفيتامينات والبروتينات والمعادن اللي فيها.

4- طبق الشوربة وخصوصا شوربة الخضار غني جدا بالالياف الصحية والمعادن والفيتامينات اللي بتحافظ على صحة الجهاز الهضمي وبتمنع انتفاخ المعدة والامساك, وطبق من شوربة العدس غني جدا بفيتامين ج, وشوربة الفراخ والارز غنية بالبروتين والنشويات والحديد, ده غير ان اكل الشوربة في بداية الوجبة بتاعتنا هيخلينا ناكل اقل لانها بتدي شعور بالشبع.

5- وتعتبر الشوربة تاني اهم وجبة بعد التمر بسبب الفيتامينات وكل الفوايد اللي احنا قولنا عليها.

6- واخر نصيحة اننا نعمل الشوربة بالخضار الطازة في البيت ونبعد عن الشوربات المجففة او المحفوظة لانها مافيهاش اي فايدة غذائية ولا اي فيتامينات, ده غير ان بيكون فيها كمية ملح عالية وده هيسبب لنا الشعور بالعطش خلال فترة الصيام.

– تعالوا نشوف مع بعض افكار جديدة لعمل الشوربة:

1- شوربة الطماطم الايطالية:

المقادير:

– 2 معلقة كبيرة زبدة.

– بصلة كبيرة متقطعة صغير.

– 5 حبات طماطم متقطعة صغير.

– 5 كوبايات مرقة.

– جزرة متقطعة.

– حبة بطاطس

– معلقة صغيرة ثوم مفروم.

– معلقة صغيرة اورجانو “من عند العطار” – وممكن نستبدله بالريحان.

– ملح – فلفل.

طريقة التحضير:

هنشوح البصل والثوم في الزبدة لحد ما يدبلوا ولونهم يبقى اصفر فاتح هنضيف الطماطم ونقلبهم مع بعض وبعدين نضيف المرقة والاورجانو والملح والفلفل هنسيبهم على النار شوية وبعدين نضيف الجزر والبطاطس المقطع ونسيبهم على نار متوسطة لحد ما يستوي الجزر والبطاطس, بعد كده هنضرب المكونات كلها في الخلاط ونصفيها ونرجعها تاني على النار هادية نغليها تغلي وبعدين تتقدم سخنة.

2- شوربة الخضار مع الفراخ:

المقادير:

– 600 جرام فراخ من غير جلد متقطعة مكعبات.

– 2 حبة بطاطس متقطعة مكعبات.

– 2 حبة جزر متقطعة مكعبات.

– حبة كوسة متقطعة مكعبات.

– حبة طماطم متقطعة مكعبات.

– فصين ثوم مفرومين.

– ملح – فلفل.

– 4 كوبايات مية.

طريقة التحضير:

هنسلق الفراخ في المية ونضيف عليها الثوم والملح والفلفل هنسيبها خمس دقايق كده ويعدين هنضيف كل الخضروات ماعدا الطماطم ونسيبها لحد ما الفراخ والخضار كله يستوي ولما يقرب يستوي خالص في الاخر هنضيف مكعبات الطماطم, وتتقدم سخنة.

3- شوربة العدس:

المقادير:

– بصلة حجمها متوسط متقطعة.

– جزرة متوسطة الحجم متقطعة.

– حبة بطاطس متقطعة مكعبات صغيرة.

– كوباية عدس احمر.

– 6 كوبايات مية.

– معلقة صغيرة كمون – فلفل احمر – نعناع.

– ملح – فلفل.

– 2 معلقة كبيرة زيت زيتون.

– معلقة ونص معلقة كبيرة زبدة.

– معلقة كبيرة دقيق.

طريقة التحضير:

هنسخن الزيت ونشوح فيه البصل والجزر والبطاطس لحد ما يدبلوا شوية, هنغسل العدس ونصفيه كويس من المية ونضيفة مع الخضار اللي على النار ونقلبه معاهم لمدة 3 دقايق مع التقليب المستمر وبعدين هنضيف لهم المية ونضيف كل التوابل ونقلبهم كويس مع بعض ونسيبهم على النار لحد ما تستوي كل الخضار والعدس تقريبا هتاخد نص ساعة ومنغطيش الحلة خلال الطبخ عشان متفورش مننا,  وفي خلال ما احنا سايبنها تستوي في طاسة تانية هندوب الزبدة ونضيف لها معلقة الدقيق ونقلبهم مع بعض كويس لحد ما يبقى كثيف شوية وبعدين نضيفه لشوربة العدس اللي هتكون جهزت عندنا هنطحن الشوربة في الخلاط وبعدين نحطها على النار لمدة خمس دقايق كمان وكده تبقى الشوربة جاهزة عندنا, نقدمها سخنة وممكن نعصر عليها ليمون عند التقديم.

4- شوربة التورتيلا المكسيكية:

المقادير:

– كوباية ونص بصل مفروم.

– 2 معلقة كبيرة ثوم مفروم.

– 4 حبات طماطم  متقطعة مكعبات صغيرة.

– 2 حبة فلفل اخضر حار.

– 4 كوبايات مرقة.

– 3 من خبز التورتيلا متقطع مكعبات “موجود في الهايبر ماركت”.

– 2 معلقة كبيرة زيت زيتون.

– معلقة صغيرة كمون- كزبرة مطحونة – زعتر مجفف .

– نص معلقة صغيرة فلفل احمر حار.

– 2 كوب فراخ مسلوقة متقطعة مكعبات.

– كوباية ونص ذرة حلوة.

– نص كوباية كريمة طبخ.

– كوباية جبنة شيدر مبشورة.

– 2 معلقة كبيرة عصير ليمون.

– ملح – فلفل.

طريقة التحضير:

سخني الزيت وضيفي عليه البصل والثوم وقلبيهم لحد ما يدبلوا لمدة 3 دقايق وبعدين ضيفي عليهم خبز التورتيلا المتقطع وقلبيهم لحد ما التورتيلا تطرى وبعدين ضيفي عليهم المرقة ومكعبات الطماطم والفلفل الاخضر والتوابل وقلبيهم لحد ما يغلي وبعدين ارفعي الشوربة من على النار وسيبيها تبرد وبعدين اهرسيها في الخلاط  لحد ما تبقى ناعمة خالص وبعدين رجعيها تاني على النار وضيفي عليها الفراخ المسلوقة وحبوب الذرة وكريمة الطبخ وقلبيهم مع بعض وسيبيها على نار هادية لمدة خمس دقايق او لحد ما تبقى الشوربة قوامها سميك, واخر حاجة هتضيفي الجبنة المبشورة وعصير الليمون والملح والفلفل, ممكن لما تيجي تقدمي الشوربة تجيبي شرحتين تورتيلا تقطعيهم شرايح طويلة زي البطاطس كده وتحمريهم في الزبدة او في الزيت لحد ما يبقى لونهم دهبي وبعدين شيليها على ورق مطبخ عشان تصفي الزيت منها وحطيها على وش طبق الشوربة من فوق.

5- شوربة السي فود:

المقادير:

– ربع كيلو جمبري حجم متوسط.

– ربع كيلو كاليماري.

– ربع كيلو سبيط.

– ربع كيلو سمك فيليه.

– 4 كابوريا.

– بصلة كبيرة متقطعة.

– كوباية لبن.

– 3 معلقة كبيرة دقيق.

– معلقة كبيرة سمنة.

– معلقة صغيرة كمون.

– ملح – فلفل.

طريقة التحضير:

اول حاجة هنحضر السمك بتاعنا ونضفه كويس , وهنسلق السمك الفيليه في مية فيها ملح وفلفل لحد ما يستوي, هنبدأ نجهز الشوربة بتاعتنا هندوب السمنة على النار ونضيف لها البصل ونقلبها لحد ما تدبل شوية وبعد كده هنضيف لها الجمبري والكاليماري والسبيط بعد ما نقطعهم وهنقلبهم مع البصل خمس دقايق وبعد كده هنضيف الدقيق ونقلبهم لمدة دقيقتين وبعدين هنضيف السمك الفيليه المسلوق والمية اللي سلقنا فيها الفيليه هنضيفها بالتدريج ونقلب لحد ما يبقى القوام عندنا سميك نضيف اللبن والتوابل ونقلبهم كويس مع بعض ونرفعه من على النار قبل ما يغلي, وكده تبقى الشوربة خلصت وتتقدم سخنة وتتزين بالشبت والبقدونس, ومش لازم نحط كل انواع السمك اللي احنا كاتبينها يعني ممكن نكتفي بنوعين تلاتة او المتوفر.

6- شوربة لسان العصفور بالطماطم:

المقادير:

– 2 كوب لسان عصفور.

– 2 كوب عصير طماطم.

– 4 كوبايات مرقة.

– حبة بصل متوسطة مفرومة ناعم.

– 3 اوراق ريحان.

– معلقة كبيرة صلصة طماطم.

– معلقة صغيرة كمون – بقدونس.

– ملح – فلفل.

– 2 معلقة كبيرة زبدة.

طريقة التحضير:

هندوب الزبدة ونضيف لها البصل ونقلبه فيها لحد ما يصفر لونه هنضيف عصير الطماطم وصلصة الطماطم والمرقة والملح والفلفل والكمون والبقدونس ونقلبهم كويس مع بعض ونسيبه لحد ما يغلي كويس, وبعدين هنضيف لسان العصفور واوراق الريحان ونقلبه ونغطيه ونسيبه لحد ما لسان العصفور يستوي, وتتقدم.

7- شوربة البطاطس والجزر:

المقادير:

– 5 حبات جزر كبيرة مبشورة.

– 3 حبات بطاطس متوسطة مبشورة.

– بصلة صغيرة متقطعة ناعم.

– فصين ثوم مفرومين.

– نص كوباية كريمة طبخ.

– خمس كوبايات مرقة.

– ملح – فلفل – كمون.

– 2 معلقة كبيرة زيت.

طريقة التحضير:

هنسخن الزيت ونضيف له البصل ونشوحه لحد ما يدبل ومن غير ما يحمروا يادوب يدبل بس وبعدين نضيف عليه الثوم والجزر والبطاطس والملح والفلفل والكمون ونقلبهم مع بعض لحد ما يدبلوا وبعدين هنضيف المرقة, هنسيب الخليط على نار هادية لحد ما يستوي وبعدين نرفعه من على النار ونضربه في الخلاط لحد ما ينعم خالص, وبعدين هنرجع الخليط على النار تاني ونضيف له كريمة الطبخ ونسيبه على نار هادية لمدة 3 دقايق.

8- شوربة البصل الفرنسية:

المقادير:

– 4 بصلة كبيرة مفرومة.

– 60 جرام زبدة.

– معلقة كبيرة دقيق.

– 1 وربع لتر مرقة.

– 1 خبز باجيت متقطع شرايح.

– نص كوباية جبنة شيدر مبشورة.

– ملح – فلفل.

طريقة التحضير:

هندوب الزبدة ونضيف لها البصل ونقلبه لحد ما يدبل ولونه يصفر وبعدين هنضيف له الدقيق ونقلبه كويس ونضيف له المرقة والملح والفلفل ونقلبه لحد ما يغلي وبعدين نسيبه على نار هادية لمدة ربع ساعة, نحمص شرايح الباجيت ونجيب طاجن او صينية ضد الالتصاق ونرص كام شريحة من شرايح الباجيت في القعر ونرش عليها نص كمية الجبنة المبشورة ونصب عليها الشوربة ونحط شريحتين او تلاتة كمان من الباجيت فوق الشوربة ونرش باقي كمية الجبنة ونحطه في الفرن لمدة 10 دقايق لحد ما تدوب الجبنة ونطلعه.