نصايح ووصفات طبيعية لتجنب وعلاج حب الشباب

بقلمريهام محمود فيبشرة visibility18573

معظم البنات بيعانوا من مشكلة حب الشباب وده بيكون ليه اسباب كتير اوي منها زيادة افراز الدهون في البشرة, وتراكم الخلايا الميتة وانسداد مسام البشرة, او ممكن يكون بسبب نظام حياتنا واكلنا مش صحي وده من الحاجات اللي بتسبب ظهور حب الشباب والبثور, ممكن نكون مش بنشرب كمية مية كفاية في اليوم وكلنا عارفين قد ايه المية مهمة للبشرة وقلتها بيخلي شكل البشرة باهت وبيطلع فيها حبوب, وممكن الحبوب بيبقى سببها عوامل وراثية وجينات, وايا كان سبب حب الشباب من الاسباب اللي احنا قولناها دي هنقولكم ازاي تتجنبوا ظهوره وتحافظوا على بشرتكم صحية وكمان وصفات طبيعية لعلاجه.

– تعالوا نعرف الاول نصايح لتجنب ظهور حب الشباب:

1- تجنب لمس البشرة:

كلنا تقريبا عندنا عادة اننا على طول بنلمس وشنا بايدينا او نسند دقننا على ايدنا او نحط ايدنا على خدنا والايد مش بتبقى نضيفة وده بينقل البكتيريا للبشرة وبيسبب ظهور حب الشباب, عشان كده لازم نحاول اننا نبعد تماما عن عادة لمس البشرة, ونحافظ على نضافة ايدينا دايما ونغسلها على طول بالمية والصابون, نحاول بردوا نبعد شعرنا عن وشنا لانه بيكون في تراب من الجو وده بينقل الاتربة دي للبشرة وبيسبب ظهور حب الشباب.

تجنب لمس البشرة
تجنب لمس البشرة

2- اتباع اسلوب حياة صحي:

لازم نلتزم بنظام يومي لنضافة بشرتنا باننا نغسل البشرة بانتظام بالغسول المناسب لبشرتنا عشان ننضفها من اي اتربة او مكياج او اي جلد ميت, تطبيق التونر على البشرة بعد غسلها, ونستخدم المنتجات المناسبة لنوع بشرتنا او المنتجات المعمولة مخصوص للبشرة المعرضة لحب الشباب ودلوقتي في ماركات كتير منزلة المنتجات دي زي نيتروجينا, وغارنييه, ولوريال, وكلين اند كلير.

اتباع اسلوب حياة صحي
اتباع اسلوب حياة صحي

3- مارسي الرياضة بانتظام وكلي اكل صحي:

ممارسة الرياضة من الحاجات المهمة جدا لصحة البشرة, حاولي انك تمارسي الرياضة يوميا لمدة نص ساعة بس ده بيساعد جدا على الحفاظ على مستويات هرمونات الجسم متوازنة وبيخلص الجسم من السموم وبالتالي ده بينعكس على بشرتنا وبيخليها صحية, حاولي تاخدي ساعات كفاية من النوم عشان البشرة تبقى مرتاحة مش مجهدة, كمان النظام الغذائي الصحي بيخلي بشرتنا صحية ونضرة يعني حاولي تقللي من اكل الكربوهيدرات ومنتجات الالبان والسكر , وزودي من اكل الخضار والفاكهة الطازة, واشربي كمية مية كفاية ميقلش عن 2 لتر في اليوم, كل الحاجات دي بتطرد السموم من الجسم وبتخلي البشرة صحية وصافية.

مارسي الرياضة بانتظام وكلي اكل صحي
مارسي الرياضة بانتظام وكلي اكل صحي

4- حافظي على ترطيب البشرة:

معلومة ان البشرة الدهنية او اللي فيها حبوب مش محتاجة ترطيب دي غلط جدا لان اي بشرة محتاجة ترطيب بشكل دايم, لان لو محطتيش كريم مرطب ده هيخلي الغدد الدهنية تفرز دهون اكتر عشان تعمل ترطيب ذاتي للبشرة وده هيسبب زيادة حب الشباب, عشان كده استخدمي المرطب بس يكون مرطب خفيف مناسب للبشرة الدهنية زي مرطب غارنييه, او كلين اند كلير, او مرطب نيتروجينا Oil free.

حافظي على ترطيب البشرة
حافظي على ترطيب البشرة

5- اغسلي وغيري كيس المخدة والفوطة باستمرار:

لازم نحافظ على غسل اكياس المخدات والفوط او تغيرها باستمرار لانه بيتجمع عليها البكتيريا اللي ممكن تتنقل للبشرة وتتسبب في ظهور حب الشباب, كمان فرش المكياج والسبونج اللي بنستخدمها في المكياج لازم نحافظ على نضافتها باستمرار.

اغسلي وغيري كيس المخدة والفوطة باستمرار
اغسلي وغيري كيس المخدة والفوطة باستمرار

– وصفات طبيعية لتجنب وعلاج حب الشباب:

1- جل صبار الالوفيرا:

من الحاجات الفعالة جدا في علاج حب الشباب وكمان منع ظهوره على البشرة, ادهني بشرتك بجل صبار الالوفيرا وسيبيه على البشرة ربع ساعة وبعدين اغسليه, وكرري الوصفة يوميا, ده هيخلص البشرة من الزيوت الزيادة وهيخليها ناعمة وصحية.

جل صبار الالوفيرا لــ تجنب وعلاج حب الشباب
جل صبار الالوفيرا لــ تجنب وعلاج حب الشباب

2- خل التفاح:

خل التفاح بيساعد جدا في علاج حب الشباب لانه بينظم درجة حموضة الجلد, ضيفي نص معلقة صغيرة خل تفاح على كوباية مية وبلي قطنة من الخليط ده وادهني بيها بشرتك كل يوم بالليل ونامي بيه واغسليه الصبح.

خل التفاح لــ تجنب وعلاج حب الشباب
خل التفاح لــ تجنب وعلاج حب الشباب

3- صودا الخبز “الكربوناتو”:

اخلطي صودا الخبز مع عصير الليمون لحد ما تتكون عندك عجينة حطيها على بشرتك وسيبيها خمس دقايق وبعدين اغسلي البشرة وادهنيها كريم مرطب, الوصفة دي بتعالج وبتمنع حب الشباب ومناسبة لجميع انواع البشرة.

صودا الخبز لــ تجنب وعلاج حب الشباب
صودا الخبز لــ تجنب وعلاج حب الشباب

اعرفوا من هنا فوايد واستخدامات البيكنج صودا او صودا الخبز.

4- الثوم:

الثوم فيه كبريت ومواد مضادة للاكسدة ومضادات للبكتيريا والفيروسات عشان كده هو فعال جدا في علاج حب الشباب والبثور, اهرسي الثوم كويس وخدي العصير بتاعة وادهني بيه بشرتك وسيبيه خمس دقايق وبعدين اغسلي البشرة, وكرري الوصفة يوميا.

الثوم لــ تجنب وعلاج حب الشباب
الثوم لــ تجنب وعلاج حب الشباب

5- العسل:

يعتبر العسل من العلاجات الطبيعية الفعالة لحب الشباب ومنع ظهوره, ادهني بشرتك بالعسل وسيبيه نص ساعة وبعدين اغسليه بمية دافية, وكرري الوصفة يوميا, هيخلي بشرتك صحية ومنورة.

عسل
عسل

شوفوا من هنا ماسكات من العسل لحل كل مشاكل البشرة.

6- مكعبات التلج:

اعملي مساج لبشرتك يوميا بمكعبات التلج ده بيساعد جدا في علاج حب الشباب لانه بيخلص البشرة من الزيوت الزيادة والاوساخ المتراكمة في المسام, وكمان مكعبات التلج مفيدة جدا في علاج التهاب وتورم البشرة.

مكعبات التلج لــ تجنب وعلاج حب الشباب
مكعبات التلج لــ تجنب وعلاج حب الشباب

اعرفوا من هنا 10 اسرار جمالية لمكعبات التلج.

7- ورق النعناع:

افرمي النعناع كويس وخدي العصير اللي هيطلع منه ادهني بيه بشرتك ونامي بيه واغسليه الصبح, كرري الوصفة يوميا, ده هيساعد جدا في علاج حب الشباب وكمان الندبات واثار حب الشباب.

نعناع
نعناع

8- الشوفان:

الشوفان يعتبر مقشر للبشرة, وكمان بيمتص الزيوت الزيادة على البشرة, اطبخي الشوفان بالطريقة العادية يعني يتسلق في مية لحد ما يطرى ويتسوي وسيبيه لحد ما يبرد وبعدين حطيه على بشرتك وسيبيه ربع ساعة وبعدين اغسلي بشرتك وحطي كريم مرطب.

شوفان
شوفان

شوفوا من هنا 10 وصفات بالشوفان لجمال البشرة والشعر.

9- عصير البرتقان:

عصير البرتقان من الحاجات اللي بتساعد في علاج الحبوب, جيبي قطنة وادهني بشرتك بعصير البرتقان كل يوم بالليل وسيبيه طول الليل واغسليه الصبح اهم حاجة يكون عصير برتقان فريش او طازة معمول في البيت مش من العصاير المحفوظة, في طريقة تانية انك تنشفي قشر البرتقان وتطحنية كويس لحد ما يبقى عندك زي البودرة احفظيه في اي برطمان ولما تيجي تستخدميه خدي منه معلقتين اخلطيهم بالمية لحد ما تتكون عندك عجينة حطيها على بشرتك وسيبيها لحد ما تنشف وبعدين اغسلي البشرة وحطي كريم مرطب.

عصير البرتقان
عصير البرتقان

10- معجون السنان:

ممكن لو عايزة تخفي حباية بشكل سريع تستخدمي عليها معجون السنان, مرري الاول مكعب تلج على مكان الحباية وبعدين حطي عليها معجون السنان عشان تديكي نتيجة احسن وسيبي المعجون نص ساعة وبعدين اغسليه بالمية, ممكن تكرري الوصفة دي من مرتين لتلات مرات في الاسبوع.

معجون السنان
معجون السنان