اللون البينك الناري او الفاقع من الالوان الجريئة واللي كلها حياة والمناسبة جدا لموسم الصيف, بس في كتير من البنات بيقلقوا شوية وبيترددوا انهم يلبسوا الالوان الجريئة دي عشان مش بيعرفوا ينسقوها ازاي او ممكن يتلبس عليها ايه.
بس احنا النهاردة جايبينلكم مجموعة استايلات باللون البينك الناري هتشجعك انك تلبسيه وتضيفي اللون لدولابك, الستايلات هتديكم افكار ازاي تلبسوا اللون البينك.
ياللا نشوف مع بعض استايلات باللون البينك الناري:
يعني مثلا ممكن تختاري فستان باللون البينك, وممكن يتلبس عليها شوز اسود, او نيود, او ازرق , او اصفر كل الالوان دي هتطلع حلوة جدا عليه.
لو انتي بقى من محبات الجيبات فممكن تلبسي جيبة باللون البينك الناري سواء الجيبات المنفوشة او السك اللي واخدة شكل الجسم, وتنسقيها مع بلوزة بيضا سادة او مقلمة ابيض في اسود هيطلع الشكل حلو جدا.
ولو انتي لسه مترددة بردوا وخايفة تلبسي اللون البينك ممكن تكتفي بيه بس في الشوز ممكن تلبسي شوز باللون البينك, ممكن تلبسي الشوزات الفلات او اللي بكعب, وممكن تلبسيها على البنطلون الجينز او الجيبات, يعني قدامك اختيارات كتير تقدري تنوعي في الستايل بتاعك حسب اكتر حاجة تحبيها او شايفاها لايقة عليكي اكتر.
