وصفات طبيعية لعلاج حروق الشمس وتفتيح البشرة
من اكتر الحاجات اللي كلنا بنعاني منها في فصل الصيف بشكل خاص هي حروق الشمس ومش بس لون البشرة بيتغير كمان الجلد بيبقى ملتهب ومحمر وحساس جدا لاي حاجة وده بيبقى مضايقنا طبعا ومسبب لنا مشكلة ومش بنعرف نرجع لون البشرة للونها الطبيعي , عشان كده احنا النهاردة جيبنا لكل بنات حوا وصفات طبيعية لعلاج حروق الشمس وتفتيح البشرة, وكلها وصفات بمكونات سهلة وبسيطة ومش مكلفة.
وعشان نحافظ على بشرتنا من الشمس لازم مننساش واقي الشمس قبل ما نخرج من البيت ويكون SPF عالي يعني اقل حاجة نسبة حماية 30, ونجدده كل ساعتين لو هنقضي يومنا كله بره, عشان نحمي بشرتنا من الحروق والاسمرار.
اشربوا مية كتير في فصل الصيف عشان نحمي البشرة من الجفاف, ونحافظ على رطوبتها دايما.
تعالوا نشوف مع بعض وصفات طبيعية لــ علاج حروق الشمس وتفتيح البشرة:
1- ماسك الردة والزبادي:
المكونات:
– 2 معلقة كبيرة ردة.
– 3 معالق كبيرة زبادي.
– 2 معلقة عسل نحل.
– كام نقطة عصير ليمون.
الطريقة:
هنخلط المكونات كلها مع بعض كويس جدا, حطي الخليط على بشرتك وسيبيه ربع ساعة وبعدين اغسليه ومرري قطنة فيها مية ورد على البشرة عشان تقفل المسام, كرري الماسك مرة في الاسبوع او بعد كل مرة تتعرضي فيها للشمس.
شوفوا من هنا فوايد ماسكات الزبادي المذهلة للبشرة.
2- ماسك الدقيق واللبن:
المكونات:
– 3 معالق كبيرة لبن.
– 3 معالق صغيرة دقيق.
– معلقة صغيرة مية اكسجين “من الصيدلية”.
– عصير ليمونة.
الطريقة:
اخلطي المكونات مع بعض كويس, حطي الخليط على البشرة وسيبيه نص ساعة وبعدين اغسلي البشرة بمية دافية, الماسك ده بيعالج الحروق وبيفتح البشرة.
3- ماسك الطحينة:
المكونات:
– معلقة كبيرة طحينة.
– معلقة كبيرة مية ورد.
– معلقة كبيرة نشا.
– معلقة كبيرة لبن.
– 5 نقط عصير ليمون.
– 5 نقط زيت لوز حلو.
الطريقة:
اخلطي الطحينة مع مية الورد مع النشا وعصير الليمون وزيت اللوز قلبيهم كويس وبعدين ضيفي اللبن وامزجيهم كويس مع بعض لحد ما يبقى عندك خليط قوامة معقول تقدري تفرديه على البشرة, حطي الخليط على البشرة وسيبيه 10 دقايق وبعدين اغسليه بمية دافية وبعدين بمية باردة.
4- ماسك الزبادي والليمون:
المكونات:
– 2 معلقة كبيرة زبادي.
– كام نقطة ليمون.
الطريقة:
اخلطي الزبادي مع الليمون كويس , حطي الخليط على بشرتك وسيبيه 20 دقيقة, وبعدين اغسليه بمية دافية, وممكن نستبدل الليمون بعصير البرتقان.
5- ماسك الطماطم والليمون:
المكونات:
– معلقة كبيرة عصير طماطم.
– معلقة صغيرة عصير ليمون.
الطريقة:
اخلطي عصير الطماطم مع عصير الليمون وحطيهم على البشرة وسيبيهم ربع ساعة وبعدين اغسليه, بس بالنسبة للي بشرتهم حساسة الافضل بلاش يعملوا الماسك د عشان الليمون مع الطماطم ممكن يسببوا التهاب للبشرة الحساسة.
6- ماسك الطماطم والزبدة:
المكونات:
– معلقة كبيرة عصير طماطم.
– 5 معالق زبدة.
الطريقة:
اخلطي عصير الطماطم مع الزبدة, افردي الخليط على البشرة وسيبيه ربع ساعة وبعدين اغسليه, الماسك ده فعال جدا في علاج الشمس وتفتيح البشرة.
7- ماسك الشوفان والزبادي:
المكونات:
– 2 معلقة كبيرة شوفان مطحون.
– 2 معلقة كبيرة زبادي.
– 2 معلقة كبيرة عصير طماطم.
الطريقة:
اخلطي المكونات مع بعض كويس وحطي الخليط على البشرة وسيبيه 20 دقيقة وبعدين اغسليه بمية باردة.
شوفوا من هنا 10 وصفات بالشوفان لجمال البشرة والشعر.
8- ماسك زيت اللوز وجوز الهند:
المكونات:
– 4 معالق صغيرة زيت لوز حلو.
– 5 معالق صغيرة زيت جوز الهند.
الطريقة:
اخلطي الزيوت مع بعض ودلكي بيهم البشرة كويس وممكن تنامي بيه عادي وتغسليه الصبح.
شوفوا من هنا فوايد زيت اللوز الحلو للبشرة والشعر.
9- ماسك النعناع:
المكونات:
– ورق نعناع مفروم.
– مية.
الطريقة:
افرمي كام ورقة نعناع وحطي عليهم مية لحد ما تبقى عندك عجينة خفيفة, حطي الخليط على بشرتك وسيبيه ربع ساعة وبعدين اغسليه, وممكن تكرري الماسك يوميا.
10- ماسك الخيار والعسل:
المكونات:
– معلقة كبيرة عسل نحل.
– شرايح خيار.
الطريقة:
ادهني بشرتك بالعسل وبعدين حطي عليه شرايح الخيار, وسيبيها ربع ساعة وبعدين اغسلي البشرة.
شوفوا من هنا 15 وصفة من الخيار لجمال بشرتك.
11- ماسك الزبادي والحمص:
المكونات:
– معلقة كبيرة حمص مطحون.
– 2 معلقة صغيرة زبادي.
– كام نقطة عصير ليمون.
الطريقة:
اخلطي المكونات كلها مع بعض, حطيه على البشرة وسيبيه 20 دقيقة وبعدين اغسليه بمية دافية.
12- ماسك العسل:
المكونات:
– معلقة كبيرة عسل نحل.
– معلقة كبيرة لبن بودرة.
– معلقة كبيرة عصير ليمون.
– نص معلقة كبيرة زيت لوز حلو.
الطريقة:
اخلطي المكونات كلها مع بعض كويس, حطي الخليط على البشرة وسيبيه 20 دقيقة او لحد ما ينشف خالص, وبعدين اغسليه بمية دافية.
شوفوا من هنا ماسكات من العسل لحل كل مشاكل البشرة.
13- ماسك الشاي الاخضر:
المكونات:
– 2 معلقة كبيرة زبادي.
– باكيت شاي اخضر.
الطريقة:
هنجيب باكيت الشاي الاخضر نقصه ونحط الشاي اللي جواه على الزبادي ونخلطهم كويس , هنحط الخليط في التلاجة لمدة نص ساعة وبعدين نخرجه ونحطه على بشرتنا ونسيبه ربع ساعة, وبعدين اغسلي البشرة بمية باردة ومرري عليها مكعب تلج, كرري الماسك يوميا.
شوفوا من هنا وصفات للبشرة من الشاي الاخضر.
14- ماسك صودا الخبز:
دوبي 4 معالق كبيرة صودا الخبز او البيكنج الصودا “كربوناتو” في كوباية مية باردة وهاتي حتة قطنة حطيها في الخليط ده ومرري القطنة على بشرتك, الطريقة دي بتهدي البشرة من اثار حروق الشمس.
شوفوا من هنا 5 استخدامات وفوايد للبيكنج صودا .
15- شرايح البطاطس:
من الحاجات الفعالة جدا لعلاج حروق الشمس , حطي شرايح البطاطس على البشرة وسيبيها 20 دقيقة.
16- ماسك خل التفاح:
خل التفاح من الحاجات الفعالة جدا لتخفيف حروق الشمس, بس هاتي قطنة وحطي عليها خل التفاح ومرري القطنة على بشرتك وسيبيه 10 دقايق وبعدين اغسليه, لما تحطيه ممكن تحسي بلسعه خفيفة على البشرة ده عادي متقلقيش منها وهتروح لوحدها.
17- ماسك جل الالوفيرا:
جل الالوفيرا من الحاجات الممتازة لعلاج حروق الشمس وتهدئة البشرة, ادهني بشرتك بالجل وسيبيه ربع ساعة وبعدين اغسليه, بيهدي البشرة جدا وبيمنع تقشر البشرة او الالتهابات اللي ممكن تحصل بسبب حروق الشمس.
18- ماسك فيتامين E:
هاتي كبسولات فيتامين E من الصيدلية طلعي الزيت اللي جواها وادهني بيه بشرتك.
شوفوا من هنا فوايد ووصفات بفيتامين E و 11 ماسك بمكونات طبيعية لتفتيح البشرة.