5 ماسكات طبيعية لجمال ونضارة بشرتك
كل بنات حوا بيحلموا ببشرة صافية ومافيهاش اي عيوب وشوائب ودايما بنقعد ندور على ماسكات طبيعية والوصفات اللي ممكن تفيد بشرتنا, واحنا زي ما عودناكم دايما بنجيبلكم اكتر الماسكات الفعالة اللي تخلي بشرتنا صحية ونضرة والنهاردة جيبنا لكل بنات حوا خمس ماسكات جديدة لمشاكل البشرة زي حب الشباب, والتجاعيد, وجفاف البشرة, وكل الوصفات بمكونات طبيعية وسهلة جدا ومش مكلفة.
ياللا نشوف مع بعض 5 ماسكات طبيعية لجمال ونضارة بشرتك:
1- ماسك الزبادي:
احنا اتكلمنا قبل كده عن فوايد الزبادي بالتفصيل وجيبنالكم ماسكات كتير بالزبادي للبشرة النهاردة جايبين لكم ماسك جديد بالزبادي.
المكونات:
– ربع كوباية زبادي.
– نص معلقة صغيرة قرفة.
– 2 معلقة صغيرة عسل نحل.
الطريقة:
هنخلط كل المكونات مع بعض كويس جدا وندلك بيها البشرة, ونسيب الماسك ربع ساعة على البشرة, وبعدين نشيلة بحتة قماش مبلولة او نغسله بالطريقة العادية, وبعدين نرطب البشرة, لو بشرتك حساسة ممكن البشرة تحمر شوية من القرفة بس هيروح بعد دقايق.
2- ماسك الموز:
الماسك ده بيحسن الدورة الدموية, وبيفتح البشرة وبيرطبها, وبيحمي البشرة من التجاعيد والخطوط الرفيعة.
المكونات:
– 2 معلقة صغيرة زيت جوز الهند.
– بياض بيضة.
– نص موزة.
– قرفة “اختياري”.
– افوكادو مهروس “اختياري”.
– عسل نحل ” اختياري”.
الطريقة:
هنحط زيت جوز الهند وبياض البيضة والموز مع بعض في الخلاط لحد ما المكونات تتمزج كويس مع بعض, وبالنسبة للقرفة والافوكادو والعسل دي مكونات اختيارية ممكن نحطها وممكن لا لو متوفرة حطوها عشان تزود فايدة الماسك, هنحط الماسك على البشرة ونسيبه لحد ما ينشف وبعدين نغسله بمية دافية, اللي هيفضل من الماسك ممكن نحطه في برطمان ونحفظه في التلاجة لما نيجي نستخدمه مرة تانية, ونكرر الماسك مرتين في الاسبوع.
شوفوا من هنا كمان فوايد الموزواستخداماته للبشرة والشعر.
3- ماسك لمكافحة علامات الشيخوخة:
الماسك بيحمي البشرة من علامات الشيخوخة زي التجاعيد والخطوط الرفيعة.
المكونات:
– صفار بيضة.
– 2 معلقة صغيرة عسل نحل.
– نص معلقة صغيرة جيلاتين.
– معلقة صغيرة عصير ليمون.
– نقطتين من زيت اللافندر.
الطريقة:
هنخلط المكونات كلها مع بعض كويس, اغسلي وشك بالمية ومتنشفيش البشرة حطي عليها الماسك وهي مبلولة وسيبيه لحد ما ينشف, وبعدين اغسليه بمية دافية, ولو فضل من الماسك احفظيه في التلاجة لما تيجي تستخدميه مرة تانية, وكرري الماسك من مرة لمرتين في الاسبوع.
4- ماسك الافوكادو:
الماسك بيمنع التجاعيد والخطوط الرفيعة من البشرة لان الافوكادو غني بالمواد المضادة للاكسدة, ومرطب جدا للبشرة عشان كده الماسك ده مناسب جدا للبشرة الجافة, بيحمي البشرة من الالتهاب و الاحمرار وتهيج البشرة, وبيجدد البشرة.
المكونات:
– نص ثمرة افوكادو.
– نص موزة.
– معلقة كبيرة زيت زيتون.
– من نقطتين لتلات نقط من اي زيت عطري “اختياري”.
الطريقة:
هنحط الموز والافوكادو مع بعض ونهرسهم كويس بمعلقة خشب او بالخلاط او بهراسة البطاطس المهم نهرسهم كويس جدا لحد ما يبقوا ناعمين خالصوبعدين نضيف عليهم زيت الزيتون والزيت العطري لو هنضيفة ونمزج المكونات مع بعض كويس, هنفرك بشرتنا بالخليط وبعدين نسيبه ربع ساعة وبعدها نغسل البشرة.
5- ماسك الشوفان والعسل:
الماسك ده ممتاز جدا لعلاج حب الشباب, وبيخلص البشرة من الالتهاب والاحمرار, بيساعد على تقشير وتنضيف البشرة بعمق, بيصفي البشرة من اي شوائب.
المكونات:
– ربع كوباية شوفان.
– 2 معلقة صغيرة زبادي.
– 2 معلقة صغيرة عسل نحل.
– 2 معلقة صغيرة زيت زيتون.
الطريقة:
هنحط المكونات كلها في الخلاط ونضربهم مع بعض كويس جدا لمدة 10 دقايق كده لحد ما يبقى الخليط عندنا ناعم خالص, هناخد الخليط نفرك بيه البشرة لمدة 3 دقايق بحركات دائرية وبعدين نسيبه على البشرة خمس دقايق كمان وبعدها نغسله, لو بشرتك حساسة مش لازم تفركي بيه البشرة ممكن تسيبيه بس على بشرتك لمدة ربع ساعة وبعدين تغسليه, كرري الماسك من مرتين لتلات مرات في الاسبوع.
شوفوا من هنا ماسكات من العسل لحل كل مشاكل البشرة و 10 وصفات بالشوفان لجمال البشرة والشعر.
