تطبيقات رمضان للاندرويد والايفون
شهر رمضان شهر العبادات وبنحاول على قد ما نقدر نحافظ على صلاتنا في مواعيدها وعلى ختم القرآن وقراءة الادعية والاذكار يوميا هو طبعا ده المفروض يتعمل طول السنة بس في شهر رمضان بشكل خاص بنحاول نحافظ عليها بشكل اكبر, عشان كده احنا النهاردة جايبينلكم مجموعة تطبيقات رمضان للاندرويد والايفون هتساعدنا ننظم وقت عباداتنا اكتر وقراءة الادعية والاذكار كل يوم.
– تطبيقات رمضان للاندرويد:
1- تطبيق صلاتي “My Prayer”:
ده تطبيق لتوقيتات الصلاة, وفيه بوصلة للقبلة, وفيه تحويل التاريخ بين الهجري والميلادي, وفيه كمان تنبيه بوقت الصلاة والاقامة.
2- تطبيق صلاتك “Salatuk”:
في نفس مميزات التطبيق اللي فات, وزيادة عليه كمان بيقولك المساجد اللي قريبة من بيتك, او المكان اللي انتي فيه.
3- تطبيق صحيح مسلم:
فيه كل الاحاديث الموجودة في كتاب صحيح مسلم ومتقسم لكتب وابواب.
4- تطبيق حصن المسلم:
هتلاقي فيه كل الاذكار والادعية اللي ممكن تحتاجيها لكل الاوقات, زي اذكار الصباح والمساء, واذكار النوم, واذكار الاستيقاظ, ودعاء الاستخارة, والبرنامج سهل جدا تقدري توصلي للاذكار اللي انتي عايزاها بسرعة وبطريقة سهلة.
5- تطبيق قرآن اندرويد “”Quran for Android:
هتقدري تقري القرآن من التطبيق ده كانك بتقريه من المصحف, معمول بنظام كانك بتقري من كتاب وتقلبي منه الصفحات, كمان الآيات تقدري تترجميها للانجليزي, وتقدري توصلي لاي سورة بسهولة عن طريق الفهرس.
6- تطبيق السبحة:
تقدري تسبحي عليها وتعرفي عدات التسبيح اللي انتي عملتيها, وتختاري التسبيح اللي انتي عايزاه.
7- عداد الاستغفار:
عداد الاستغفار نفس نظام السبحة تقدري تعرفي عليه عدات الاستغفار, وعليها تسبيحات تقدري تختاري نوع التسبيح, وعليها تسبيح شخصي وتسبيح جماعي اون لاين يعني تقدري تتفقي مع اصحابك مثلا تسبحوا مع بعض.
8- امساكية رمضان:
امساكية لمواعيد الصلاة, وتوقيتات الامساك والفطار, وعدد ساعات الصيام, وتقدري تحددي عن طريقها القبلة بالـ GPS, فيها تنبيه عشان تنبهك لمواعيد الصلاة, فيها ادعية للصيام والفطار, وفيها كمان سبحة الكترونية.
– تطبيقات رمضان للايفون:
1- تطبيق الا صلاتي:
هتقدري تعرفي منه توقيتات الصلاة, وهتسمعي منه الاذان كامل كل صلاة.
2- تطبيق حديث:
التطبيق ده بيجمع كل كتب السنة الستة الرئيسية (صحيح البخاري – صحيح مسلم – جامع الترمذي – سنن ابي داود – سنن النسائي – سنن ابن ماجة).
3- تطبيق حصن المسلم:
التطبيق فيه كل الاذكار والادعية من كتاب حصن المسلم من اذكار الكتاب والسنة.
4- تطبيق مصحف آي- فون اسلام “iPhoneIslam Mus’haf”:
التطبيق فيه المصحف كامل وتقدري تطلعي اي سورة انتي عايزاها من الفهرس اللي على التطبيق, وكمان فيه تفسير.
5- تطبيق السبحة:
سبحة الكترونية معمولة بنظام السبحة العادية عشان تسهل عليكي التسبيح وتعرفي عدد التسبيحات خلال اليوم او الشهر, وتقدري كمان انتي تحددي عدد الخرازات في السبحة وطريقة التسبيح زي ما انتي عايزة وكمان تختاري سرعة التسبيح ده غير انها بتحسب لك الوقت اللي اخدتيه في التسبيح, وفيها اسماء الله الحسنى.
6- عداد الاستغفار:
عداد الاستغفار هيخليكي تقدري تعرفي عليه عدات الاستغفار بسهولة.