اعرفي معانا ازاي تنظمي وقتك في رمضان
طبعا كلنا بنشتكي من ضيق الوقت في شهر رمضان لان جدولنا ومواعيدنا بتتغير كلها وبنظبط يومنا كله على ميعاد الفطار ومش بنعرف ننظم وقتنا ما بين الشغل لو بتشتغلي او لوحتى ربة بيت وما بين العبادة وشغل البيت بيبقى وقتك مضغوط ومش بتعرفي تنظميه وتيجي على اخر الشهر تتعبي ومتقدريش تواصلي, احنا النهاردة هنقولكم نصايح وهنقولكم على نظام يومي هيساعدكم انكوا تنظموا وقتكوا في رمضان ما بين الشغل وشغل البيت والعبادة.
– تعالوا نعرف شوية نصايح الاول هتسهل عليكي تحضير اكلات رمضان وتوفير الوقت:
1- اول حاجة قبل رمضان بيومين ابدأي حطي قايمة للاكل لمدة اسبوع , يعني تكتبي كل الاكلات اللي هتعمليها طول الاسبوع لان ده هيسهل عليكي جدا وهيوفرلك وقت انك تقعدي تفكري كل يوم في اكله, واخر الاسبوع حطي قايمة للاسبوع الجديد, او ممكن تعملي قايمة كبيرة بمجموعة اكلات وتعملي كل يوم اكلة وبعد ما تخلص القايمة تعيديها من الاول هيكون عدى وقت طبعا على اول اكلة عملتيها في القايمة وهكذا, او لو حابة تعملي قايمة لل 30 يوم براحتك وحسب ما تفضلي انتي وتختاري النظام اللي هترتاحي فيه اكتر, بس المهم القايمة تكون جاهزة قبل رمضان.
2- انزلي قبل رمضان اشتري الخضروات والحاجات اللي هتحتاجيها في القايمة بتاعتك, حضريها عندك يعني ممكن تجيبي الحاجات اللي مش بتبوظ زي الحاجات الناشفة الفاصوليا واللوبيا, وهاتي طمامم واعصري كمية واحفظيها في الفريزر عصير جاهز ده هيسهل عليكي جدا ومش هتحتاجي كل مرة تيجي تطبخي تعصري طماطم وهيوفرلك الوقت جدا.
3- ممكن تحفظي اكلات عندك في الفريزر زي الملوخية والبامية مثلا, هاتيهم وجهزيهم واحفظيهم عندك هتلاقي نفسك لما تيجي تعمليهم هتاخدي نص الوقت بس وهتخلصي بسرعة.
4- ممكن تحضري كمية من البصل والثوم المفروم وتحطيهم في برطمانات وتحفظيهم في التلاجة, بردوا هيوفرلك جدا في الوقت وهيسهل عليكي الطبخ.
5- ممكن تحضري معجنات زي السمبوسك والفطاير المحشية جبنة او لحمة, والكبيبة والكفتة وورق عنب وتحفظيهم في التلاجة عشان تكون جاهزة عندك.
6- كمان مع الحلويات ممكن تجهزي كمية قطايف وتحشيها وتحطيها في اطباق وتحفظيها في الفريزر تبىق جاهزة على التحمير على طول, وتكوني بردوا محضرة كمية من الشربات عندك في التلاجة عشان تستخدميها ومش كل مره تعملي مخصوص.
7- لو هتعملي لحمة او فراخ او سمك على الفطار ممكن تتبليها قبلها بيوم بالليل وتحطيها في التلاجة عشان لما تيجي تعمليها تاني يوم تلاقيها جاهزة على التحمير على طول وتوفر عليكي الوقت.
8- بالنسبة للمشروبات الرمضانية زي التمر هندي والخروب وغيرها من المشروبات ممكن تجهزيها بردوا وتحطيها في ازايز وتتحفظ في التلاجة وتقدري تشربي منها في اي وقت.
9- لو تلاجتك صغيرة ومش هتقدري تشيلي فيها كميات اكل كبيرة ممكن تعملي كميات اسبوعية ولما تخلص تعمليكمية تانية للاسبوع الجديد.
– تعالوا نشوف جدول ازاي تنظمي وقتك في رمضان:
دلوقتي بعد ما وفرنا مع بعض وقت بالنصايح اللي احنا قولناها هنقولكم على جدول ممكن تمشوا عليه او لو حابين تغيروا فيه حاجات حسب ظروفكم ووقتكم.
– هنبدأ مع سحور اول يوم وصلاة الفجر هتتسحري وتصلي الفجر وتقري اذكار وخمس صفحات من القرآن ولو حابة تزودي كل واحد حسب مقدرته.
– بعد الفجر هتنامي لو معندكيش شغل هتقومي مثلا على الساعة 11 تصلي الضحى وتقري 5 صفحات من القرآن ممكن تنامي تاني لحد الضهر وبعدين تقومي تصلي الضهر وتقري خمس صفحات كمان من القرآن وبعدين تبدأي تدخلي المطبخ تجهزي الاكل بتاعك اللي احنا اصلا زي ما قولنا هنبقى مجهزين نصه, يعني مثلا من صلاة الضهر لحد الساعة 3 هتكوني مخلصة, هتصلي العصر وهيبقى عندك وقت قبل الفطار ممكن تقري فيهم قرآن, وقبل الفطار بنص ساعة ممكن تبدأي تسخني الاكل وتجهزي السفرة بتاعتك.
– ولو بتشتغلي هتروحي شغلك بدري وكل اماكن الشغل بتخفض ساعات الشغل في رمضان فهترجعي بدري عن الايام العادية يعني هيكون على العصر مثلا, ترجعي هتكوني مصلية الضهر في شغلك طبعا هتصلي العصر وتقري خمس صفحات كمان من القرآن, وتدخلي تحضري الاكل بتاعك.
– بعد الاكل صلاة المغرب هنصلي ونقرا خمس صفحات كمان من القرآن, ونغسل طبعا المواعين وننضف المطبخ بتاعنا منسيبش الحاجات تتراكم على بعض لانك هتلاقي نفسك اخر اليوم قدامك شغل كتير خلصي اول باول احسن.
– ممكن بعد الاكل بشوية تاكلي الحاجة الحلوة بتاعة رمضان زي الكنافة والقطايف بقى وحاجات رمضان الجميلة دي كلها وتقعدي مع العيلة او لو وراكي حاجة تعمليها لحد صلاة العشا هنصلي العشا والتراويح سواء بتصليها في المسجد او في البيت, او ممكن تاجلي الحاجة الحلوة بعد صلاة العشا بردوا حسب اختياركم.
– بعد صلاة العشا والتراويح هيبقى عندك وقت لحد السحور ممكن زي ما قولنا تتبلي اللحمة او الفراخ او السمك اللي هتعمليه تاني يوم على الفطار او تقطعي الخضار وتجهزية يعني اي حاجة هتسهل عليكي تحضير الفطار تاني يوم هتاخدي مثلا ساعة تجهيز.
– بعد ما تخلصي تجهيز الاكل هيبقى في وقت لحد صلاة الفجر ممكن تقري ربع قرآن, وتقري اذكار وادعية وكتروا من الصلاة على سيدنا محمد عليه الصلاة والسلام ومن الاستغفار, وبعدين تحضري السحور هتتسحري وبعدها تصلي الفجر وتقري خمس صفحات من القرآن وبعدين تنامي, وهتبدأي اليوم التاني بنفس النظام.
وبطريقة قراءة القرآن اللي احنا قولناها بعدد الصفحات هتختمي القرآن تقريبا في اسبوع, يعني هتختمي القرآن اربع مرات في رمضان ان شاء الله.
وده جدول هيساعدكم اكتر على ختم القرآن فيه نظامين لختم القرآن في 3 ايام وفي خمس ايام:
