دليلك لــ مسلسلات رمضان 2016

ريهام محمود
ريهام محمود
4718

طبعا كل البنات تقريبا مدمنين مسلسلات :) ومن الحاجات اللي بنحب نتابعها هي مسلسلات رمضان لانه بيكون فيه تقريبا اجمل المسلسلات وبنقدر نشوف ونتابع اعمال كل الفنانين اللي بنحبهم, واحنا النهاردة جيبنالكم دليل لــ مسلسلات رمضان 2016 عشان تختاروا مسلسلات الفنانين اللي بتحبوهم وكمان القنوات اللي هتتعرض عليها المسلسلات عشان تقدروا تتابعوهم .

ياللا نعرف مع بعض مسلسلات رمضان 2016

مسلسلات رمضان 2016
مسلسلات رمضان 2016

1- مسلسل مأمون وشركاه:

بطولة عادل امام, ولبلبة, وشيرين, ومصطفى فهمي, طبعا المسلسل كوميدي واحداثة بتدور حوالين راجل بخيل اللي هو بطل المسلسل الزعيم عادل امام وبتقوم بدور زوجته الفنانة لبلبة وليه 4 اولاد وهو بخيل جداا عليهم وحارمهم من كل حاجة وبعد كده هيكتشفوا ان هو عنده فلوس كتير جدا وملياردير وطول احداث المسلسل هيبدأوا انهم يدوروا على مكان فلوسه اللي هو مخبيها عنهم في اطار كوميدي, والمسلسل تأليف يوسف معاطي, واخراج رامي امام, وهيتعرض على قناة MBC مصر.

مسلسل مأمون وشركاه
مسلسل مأمون وشركاه

2- مسلسل ونوس:

بطولة يحي الفخراني, نبيل الحلفاوي, هالة صدقي, حنان مطاوع, المسلسل اجتماعي بيدور حوالين اب بيسيب ولادة وبيختفي  لمدة 20 سنة وبعدين هيظهر شخص يقولهم انه صديق ابوهم ويطالبهم بفلوس ابوهم اخدها منه ويقولهم على مكانه وانه غني جدا وعنده ملايين, المسلسل تأليف عبد الرحيم كمال, اخراج شادي الفخراني,هيتعرض على قناة CBC.

مسلسل ونوس
مسلسل ونوس

3- مسلسل راس الغول:

بطولة محمود عبد العزيز, ميرفت امين, فاروق الفيشاوي,محمد الشقنقيري, لقاءالخميسي, المسلسل بيدور حوالين شخص نصاب اللي هو محمود عبد العزيز وبارع جدا في النصب والاحتيال وبيفضل طول المسلسل هربان من البوليس لحد ما الشرطة بتعلن عن مكافاة كبيرة للي هيساعد في القبض عليه وهيبقى مطارد من البوليس ومن كل الناس اللي عايزين ياخدوا المكافأة, المسلسل تأليف شريف بدر الدين, اخراج احمد سمير فرج, وهيتعرض على قناة النهار.

مسلسل راس الغول
مسلسل راس الغول

4- مسلسل القيصر:

بطولة يوسف الشريف, خالد زكي, اشرف زكي, احمد سعيد عبد الغني, طارق النهري, طبعا احنا متعودين من يوسف الشريف مسلسلاته بتبقى مختلفة جدا وغير تقليدية وكلها غموض وتشويق السنة دي كمان عامل دور واحد عنده قدرات خاصة واسمه القيصر وعضو في جماعة ارهابية هو قائدها وبيقوموا عمليات ارهابية, المسلسل تأليف محمد ناير, واخراج احمد نادر جلال, وهيتعرض على قناة ONTV.

مسلسل القيصر
مسلسل القيصر

5- مسلسل الاسطورة:

بطولة محمد رمضان, روجينا, دنيا, اشرف زكي, محمد عبد الحافظ, وبتدور احداث المسلسل حوالين شاب متخرج من كلية الحقوق وبيقوم بدوره محمد رمضان وبيحاول انه يشتغل في السلك القضائي ولكن هيترفض بسبب سمعة اخوه السيئة اللي بيشتغل تاجر سلاح, ومع احداث المسلسل هيواجه اخوه مشاكل مع تاجر سلاح كبير وهيقتله ويلفق لمحمد رمضان قضية سلاح وهيدخل السجن, المسلسل تأليف محمد عبد المعطي, اخراج محمد سامي, هيتعرض على قناة MBC مصر.

مسلسل الاسطورة
مسلسل الاسطورة

6- مسلسل المغني:

الفنان محمد منير مشارك السنة دي بمسلسل المغني وبيشاركه البطولة رانيا فريد شوقي, ميساء مغربي, ميرهان حسين, جمال عبد الناصر, محمد ابو داود, والمسلسل بيدور حوالين حياة الفنان محمد منير وكل اللي مر بيه خلال مسيرته الفنية كلها, وهيغني منير في المسلسل اغاني جديدة معمولة مخصوص للمسلسل, والمسلسل من تأليف محمد محمدي, اخراج شريف صبري, هيتعرض على قناة الحياة.

مسلسل المغني
مسلسل المغني

7- مسلسل ابو البنات:

بطولة مصطفى شعبان, صلاح عبد الله, علا غانم, لقاء الخميسي, رجاء الجداوي, ادوارد, بتدور الاحداث حوالين واحد عنده معرض سيارات وهو مصطفى شعبان وبيواجه صراعات مع رجل اعمال اللي بيقوم بدوره صلاح عبد الله بسبب اعمال قديمة مشتركة بينهم في تجارة المخدرات, وبسبب الخلافات دي مصطفى شعبان هياخد بناته ويتنقل يعيش في مكان تاني لكن صلاح عبد الله هيروح وراه وهيخطف بناته, وتبدأ الاحداث تتصاعد, المسلسل تأليف احمد عبد الفتاح, اخراج رؤوف عبد العزيز, هيتعرض على MBC مصر.

مسلسل ابو البنات
مسلسل ابو البنات

8- مسلسل ليالي الحلمية “الجزء السادس”:

بطولة الهام شاهين, صفية العمري, هشام سليم, درة, محمد رياض, حنان شوقي, سميرة عبد العزيز, طبعا كلنا تابعنا مسلسل ليالي حلمية بكل اجزاءة وكان من اجمل المسلسلات, وفي احداث الجزء ده الهام شاهين هتجيلها صدمة عصبية بعد موت على البدري, وهتظهر بنت سليم البدري اللي كانت عايشة طول عمرها في فرنسا وهتقرر انها ترجع مصر تاني, والمسلسل بتدور احداثه حوالين كل اللي حصل في مصر بعد ثورة 25 يناير, والمسلسل تأليف ايمن بهجت قمر وعمرو محمود يس, اخراج مجدي ابو عميرة, هيتعرض على قناة النهار, الحياة.

مسلسل ليالي الحلمية الجزء السادس
مسلسل ليالي الحلمية الجزء السادس

9- مسلسل الكيف:

اكيد كلنا اتفرجنا على فيلم الكيف وكلنا بنستمتع بيه جدا المسلسل نفس قصة الفيلم بيتكلم عن قضية المخدرات وتأثيرها على المجتمع, بيقوم ببطولة المسلسل باسم سمره, احمد رزق, لوسي, ميرهان حسين, المسلسل تأليف احمد محمود ابو زيد, اخراج محمد النقلي, هيتعرض على قناة MBC مصر.

مسلسل الكيف
مسلسل الكيف

10- مسلسل سقوط حر:

بطولة نيللي كريم, فرح يوسف, احمد وفيق, وفادء صادق,محمد فراج, المسلسل بيدور حوالين واحدة مريضة نفسيا اللي بتقوم بدورها نيللي كريم وبتتهم بقتل جوزها واختها وبعد القبض عليها المحكمة هتحولها لمستشفى الامراض النفسية وخلال احداث المسلسل هتتعرض لمشاكل كتير في المصحة, المسلسل تأليف وائل حمدي, اخراج شوقي الماجري, هيتعرض على ال CBC, ودبي الاولى, والقاهرة والناس, صدى البلد, TEN, ONTV, دريم, المحور, وعلى التليفزيون المصري.

مسلسل سقوط حر
مسلسل سقوط حر

11- مسلسل افراح القبة:

بطولة منى زكي,صابرين, اياد نصار, سيد رجب, جمال سليمان, كندة علوش,صبا مبارك, سوسن بدر, رانيا يوسف, احمد السعدني, المسلسل احداثه بتدور في فترة السبعينات عن فرقة مسرحية واثناء ما هما قاعدين بيقروا نص واحدة من المسرحيات اللي هيقدموها يكتشفوا ان النص بيتكلم عن شخصياتهم الحقيقة والمؤلف بيقول عنهم اسرار وحاجات عن حياتهم الخاصة وبيحاولوا انهم يوقفوا عرض المسرحية ولكن صاحب الفريق بيصمم انهم يكملوا وبيضطروا انهم يمثلوا شخصياتهم الحقيقة في المسرحية, والمسلسل مقتبس من رواية للاديب العالمي نجيب محفوظ, اخراج محمد ياسين, هيتعرض على قناة النهار, MBC دراما.

مسلسل افراح القبة
مسلسل افراح القبة

12- مسلسل هي ودافنشي:

بطولة ليلى علوي, خالد الصاوي, وبتقوم ليلى علوي بدور محامية بتعيش في منطقة شعبية بتتعرض لمواقف صعبة في حياتها وهيظهر دافنشي في حياتها اللي بيقوم بدوره خالد الصاوي وهيغير حياتها تماما, المسلسل تأليف محمد الحناوي, اخراج عبد العزيز حشاد, هيتعرض على قناة الحياة, النهار, صدى البلد, دريم, روتانا مصرية, والتليفزيون المصري.

مسلسل هي ودافنشي
مسلسل هي ودافنشي

13- مسلسل فوق مستوى الشبهات:

بطولة يسرا, نجلاء بدر, شيرين رضا, كريم فهمي, بتقوم يسرا بدور واحدة مريضة نفسيا عايشة بشخصيتين عكس بعض شخصية طيبة اللي بتظهرها لكل الناس وشخصية تانية بتضر كل اللي حواليها, المسلسل تأليف عبد الله حسن, اخراج هاني خليفة, هيتعرض على قناة ال CBC, ودبي الاولى, والقاهرة والناس, صدى البلد, TEN, ONTV, دريم, المحور, وعلى التليفزيون المصري.

مسلسل فوق مستوى الشبهات
مسلسل فوق مستوى الشبهات

14- مسلسل وعد:

بطولة مي عز الدين,حسن حسني, يوسف عثمان, هند رضا, حمدي مرغني, والمسلسل بيدور حوالين الاختيارات الصعبة في حياتنا سواء اختيار شريك الحياة او تحديد العلاقات الاجتماعية بصفة عامة في حياتنا, المسلسل تأليف محمد سليمان عبد المالك, اخراج ابراهيم فخر, هيتعرض على قناة MBC مصر.

مسلسل وعد
مسلسل وعد

15- مسلسل الخانكة:

بطولة غادة عبد الرازق, ماجد المصري, فتحي عبد الوهاب, ميرهان حسين, نهال عنبر, احداث المسلسل بتحكي قصة حقيقة وهي قصة مدرسة بتشتغل في مدرسة دولية وبتتعرض لحادثة تحرش من واحد من الطلاب وهي بتحاول تاخد حقها هيتحول الموضوع انها تبقى هي الجاني مش المجني عليها, المسلسل تأليف محمود دسوقي, اخراج محمد جمعة, هيتعرض على قناة النهار, وروتانا خليجية.

مسلسل الخانكة
مسلسل الخانكة

16- مسلسل الطبال:

بطولة امير كرارة, روجينا, دنيا, صبري عبد المنعم, وبيدور المسلسل حوالين شخصية طبال اللي بيقوم بيها امير كرارة وعنده فرقة شعبية وبيحول المهنة بتاعته لاسلوب حياة عشان يزود دخله وحالته المادية, المسلسل تأليف هشام هلال, اخراج عصام نصار, هيتعرض على قناة ONTV.

مسلسل الطبال
مسلسل الطبال

17- مسلسل جراند اوتيل:

بطولة عمرو يوسف, دينا الشربيني, رجاء الجداوي, المسلسل بتدور احداثة في فندق كبير بيقوم رجال الاعمال بعقد صفقاتهم فيه واثناء وجودهم بتتقتل واحدة من موظفين الفندق ويبدأ اخو القتيلة يدور على القاتل ويتورط مع رجال الاعمال في مشاكل وبمجرد ما يوصل لخيوط جريمة قتل اخته هيتقتل هو كمان, المسلسل تأليف تامر حبيب, اخراج محمد شاكر خضير, هيتعرض على قناة ال CBC وابو ظبي الاولى.

مسلسل جراند اوتيل
مسلسل جراند اوتيل

18- مسلسل يونس ولد فضة:

بطولة عمرو سعد, ريهام حجاج, هبة مجدي, وبتدور احداث المسلسل في صعيد مصر وشخصية يونس اللي ليها نفوذ كبير وبيعمل حاجات غير مشروعة, والمسلسل بيتكلم عن قضايا الفساد في الصعيد بشكل عام, المسلسل تأليف عبد الرحيم كمال, اخراج احمد شفيق, هيتعرض على قناة MBC مصر.

مسلسل يونس ولد فضة
مسلسل يونس ولد فضة

19- مسلسل 7 ارواح:

بطولة خالد النبوي, اياد نصار, رانيا يوسف, ريهام حجاج, عبد الله مشرف, بيدور المسلسل حوالين ظابط شرطة اللي بيقوم بدوره خالد النبوي هيقبض على شخصية مهمة في البلد بتهمة القتل وهيتحكم عليه بالاعدام وبعدها هيقدم الظابط استقالته من الشرطة وهتجيله مكالمة تليفون تقوله انه اتسبب في اعدام رجل بريء وانها عايشة متقتلتش, وبعدها هيتعرض الظابط لمشاكل كتير من رجالة رجل الاعمال اللي اتعدم, المسلسل تأليف محمد سيد بشير, اخراج طارق رفعت, هيتعرض على قناة ONTV , وقناة ابو ظبي الاولى.

مسلسل 7 ارواح
مسلسل 7 ارواح

20- مسلسل الخروج:

بطولة ظافر العابدين, درة, شريف سلامة, الشحات مبروك, نورهان, المسلسل بوليسي غامض بتدور احداثه حوالين جريمة قتل بيتكلف في التحقيق فيها اتنين ظباط اللي بيقوم بدورهم ظافر العابدين وشريف سلامة, وخلال تحقيقهم هتحصل جرايم قتل تانية مرتبطة بالجريمة اللي هما بيحققوا فيها, المسلسل تأليف محمدالصفتي, اخراج محمد جمال العدل, هيتعرض على قناة ال CBC , النهار, دريم, الحياة, القاهرة والناس, صدى البلد, المحور, ONTV, والتليفزيون المصري.

مسلسل الخروج
مسلسل الخروج

21- مسلسل الميزان:

بطولة غادة عادل, ناهد السباعي, شيرين رضا, اميرة العايدي, وبتدور احداث المسلسل في كواليس المحكمة وعالم المحاماه والقضايا والجرايم, المسلسل تأليف باهر دويدار, اخراج احمد خالد موسى, هيتعرض على قناة CBC, ONTV, دريم, الحياة, صدى البلد, روتانا مصرية, التليفزيون المصري.

مسلسل الميزان
مسلسل الميزان

22- مسلسل شهادة ميلاد:

بطولة طارق لطفي, صلاح عبد الله, انجي المقدم, بتدور احداث المسلسل حوالين التغيرات اللي حصلت في المجتمع المصري خلال السنين الاخيرة, المسلسل تأليف عمرو سمير عاطف وتامر عبد الحميد, اخراج احمد مدحت, هيتعرض على قناة ONTV.

مسلسل شهادة ميلاد
مسلسل شهادة ميلاد

23- مسلسل ازمة نسب:

بطولة محمود عبد المغني, زينة, دينا,وائل عبد العزيز, والمسلسل اجتماعي كوميدي بيدور حوالين بنت بتعيش في منطقة شعبية اللي هي زينة وبيعرض من خلالها مشكلة الفروق والصراع الطبقي في المجتمع, المسلسل تأليف محمد صلاح العزب, اخراج سعيد حامد, هيتعرض على قناة ONTV.

مسلسل ازمة نسب
مسلسل ازمة نسب

24- مسلسل كلمة سر:

بطولة لطيفة, هشام سليم, حسن يوسف, ايمي, بتدور احداث المسلسل حوالين مدرسة فرنساوي اللي بتقوم بدورها لطيفة واللي بتدخل في مشاكل مع جوزها هشام سليم بسبب شكه فيها وبتطلب منه الطلاق وطلبها هيزود المشاكل وهيبدأ انه يطاردها, المسلسل تأليف احمد عبد الفتاح, اخراج سعد هنداوي, هيتعرض على قناة الحياة, والتليفزيون المصري.

مسلسل كلمة سر
مسلسل كلمة سر

25- مسلسل نيللي وشريهان:

بطولة دنيا وايمي سمير غانم, بيومي فؤاد, سلوى خطاب, مصطفى خاطر, والمسلسل كوميدي اجتماعي بتدور احداثه حوالين نيللي اللي بتقوم بدورها دنيا وبتدور على بنت عمها شريهان اللي بتقوم بدورها ايمي تنفيذ لوصية باباها اللي ساب لها لغز مش هتعرف تحله الا لما تلاقي بنت عمها وهي كانت ساكنة معاها في نفس البيت لكن مكنتش تعرف انها بنت عمها وهتكتشف خلال احداث المسلسل انها بنت عمها ويبدأوا هما الاتنين يحلوا اللغز.المسلسل تأليف مصطفى صقر, اخراج تامر حمزة واحمد الجندي, هيتعرض على قناة الحياة, ودبي الاولى.

مسلسل نيللي وشريهان
مسلسل نيللي وشريهان

26- مسلسل يوميات زوجة مفروسة اوي “الجزء التاني”:

الجزء التاني من المسلسل الكوميدي يوميات زوجة مفروسة اوي اللي احنا تابعنا اجزاءة الاولى بطولة داليا البحيري, خالد سرحان, سمير غانم, رجاء الجداوي, مروة عبد المنعم, والمسلسل حلقات منفصلة متصلة والاحداث بتدور حوالين صحفية اللي هي داليا البحيري اللي بتشتغل مع جوزها في نفس الجريدة وبتحصل بينهم خلافات ومواقف كتير على مستوى الشغل والحياة الخاصة, والمسلسل بيعرض المواقف اللي بتتعرض ليها الاسرة المصرية يوميا بشكل عام ومعاناة المرأة في شغلها وبيتها, المسلسل تأليف اماني ضرغام, اخراج احمد انور, هيتعرض على قناة الحياة.

مسلسل يوميات زوجة مفروسة اوي “الجزء التاني”
مسلسل يوميات زوجة مفروسة اوي “الجزء التاني”

27- مسلسل بنات سوبر مان:

بطولة يسرا اللوزي, شيري عادل, ريهام حجاج, انتصار, كريم عفيفي, المسلسل بتدور احداثه حوالين شخصية سوبر مان الاسطورية اللي بيقرر يجي مصر لتنفيذ مهمة وبدل تنفيذ المهمة هيروح شارع الهرم وهيتعرف على واحدة وهيدخل معاها في علاقة وهيسيبها ويمشي وهتكتشف انها حامل وهتحاول تتخلص من الطفلة وهتسيبها قدام ملجأ, المسلسل تأليف كلوك وورك تمبيشون, اخراج حسام علي, هيتعرض على قناة MBC مصر.

مسلسل بنات سوبر مان
مسلسل بنات سوبر مان

28- مسلسل صد رد:

بطولة علي ربيع, محمد انور, محمد اسامة”اوس اوس”, محمد عبد الرحمن, عبد الله مشرف, سامي مغاوري, وبتدور احداث المسلسل في شكل كوميدي حوالين تلات شباب بيحاولوا يتخلصوا من مشاكلهم اليومية ولكن بيقعوا في مشاكل اكبر, المسلسل تأليف محمد صلاح العزب, اخراج هشام فتحي, هيتعرض على قناة MBC مصر.

مسلسل صد رد
مسلسل صد رد

29- مسلسل هبة رجل الغراب “الجزء التالت”:

بطولة ناهد السباعي, حنان سليمان, نورهان, محمد سليمان, وبيجي الجزء التالت تكملة للجزئين الاولانين اللي كانت بتقوم ببطولتة ايمي سمير غانم بيدور حوالين بنت من مستوى اجتماعي متوسط وبتحب صاحب الشغل بتاعها, وبتعاني من معاملة زمايلها السيئة ليها في الشغل, المسلسل تأليف شريف بدر الدين, اخراج رامي رزق الله, هيتعرض على قناة ال CBC.

مسلسل هبة رجل الغراب الجزء التالت
مسلسل هبة رجل الغراب الجزء التالت

مقالات متعلقه

برامج ومسلسلات راديو نجوم اف ام في رمضان 2024

برامج ومسلسلات راديو نجوم اف ام في رمضان 2024

برامج ومسلسلات الراديو 9090 في رمضان 2024

برامج ومسلسلات الراديو 9090 في رمضان 2024

دليل مسلسلات رمضان 2019

دليل مسلسلات رمضان 2019