شوفي معانا احلى مجموعة عبايات لرمضان 2016

بقلمريهام محمود فيموضة وأزياء visibility2732

رمضان خلاص على الابواب كل سنة وانتوا طيبين ورمضان كريم على كل بنات حوا, طبعا رمضان شهر خاص جدا وشهر عبادات وروحانيات وكلنا بنحب نعيش جو رمضان بكل تفاصيله, وفي بنات كتير بيحبوا يغيروا استايل لبسهم في رمضان بلوك يمشي مع جو الشهر  وبيفضلوا لبس العبايات طول شهر رمضان, عشان كده احنا جيبنا النهاردة لكل بنات حوا احدث تشكيلة عبايات لرمضان 2016 من الماركات العالمية المختلفة, لان دلوقتي اغلب دور الازياء تقريبا المحلية والعالمية بقوا يتجهوا لانتاج خط عبايات جديد كل رمضان.

وهنلاحظ دلوقتي في اغلب موديلات العبايات انها بقت مش مقتصرة بس على الموديلات التقليدية للعبايات لكن بقى في تجديد وبقت الموديلات تاخد شكل عصري جدا وتناسب جميع الاذواق والاعمار.

يعني نازل السنة دي موديلات عبايات ملونة بالوان زاهية ومطبوعة بعكس ما كان دايما بينزل في العبايات كان بتكون ياما بلون واحد سادة او سادة مطرزة تطريزات بسيطة وكانت دايما بتكون بالوان غامقة دلوقتي في الوان كتير فاتحة وغير تقليدية, يعني الموضوع دلوقتي اختلف خالص في الالوان والموديلات.

ونازل السنة دي شكل مختلف تماما للعباية وهي موديل شبه البنجابي الهندي اللي بيكون عبارة عن بنطلون وعليه بلوزة طويلة لحد بعد الركبة الستايل ده حلو جدا ومختلف وبناتي اوي.

حتى بالنسبة للبنات اللي مش بتحب لبس العبايات نازل لهم موديلات تناسبهم, دلوقتي بقى في عبايات طويلة مفتوحة من قدام ممكن تتلبس على اللبس العادي, يعني تلبسي لبسك اللي بتلبسيه في الايام العادية وتلبسي فوقيه العباية دي بتدي لوك حلو اوي.

في كمان نظام القفاطين اللي بيكون شبة الفستان شوية وبتبقى مقفولة خالص , يعني الموديل تصميمه بيبقى ما بين الفستان والعباية.

واحنا زي ما عودنا كل بنات حوا دايما اننا نعرض لكم كل جديد جمعنا لكم تشكيلة منوعة من العبايات من كل الموديلات اللي احنا اتكلمنا عليها عشان كل واحدة تقدر تختار منهم الموديل اللي يناسبها وتحبه اكتر.

تعالوا نشوف مع بعض مجموعة عبايات لرمضان 2016:

تقدروا تشوفوا من هنا تشكيلة عبايات رمضان 2015.