طريقة ازالة الشعر بالفتلة بنفسك في البيت !

ريهام محمود
ريهام محمود
في
بشرة
93350

الشعر الزايد في الوش من المشاكل اللي كلنا بنعاني منها وخصوصا كمان ان في بنات بيكون عندهم كثافة في شعر الوش وبتبقى المشكلة عندهم اكبر وبنحاول كلنا على قد ما نقدر ننتظم اننا نشيله عند الكوافير, لكن مش طول الوقت بنقدر نروح عند الكوافير ممكن يكون معندناش وقت او كسل, ده غير ان في بنات كمان بيشيلوا شعر الوش بالسويت او بالشمع وده بيسبب الم وكمان الطريقة دي متنفعش للي بشرتك حساسة عشان هتهيج البشرة وتخليها تلتهب, وعشان كده احنا هنحل لكم المشكلة دي هنعلم كل بنات حوا النهاردة خطوة بخطوة ازاي تشيلي شعر وشك بالفتلة بنفسك في البيت عشان ترتاحي من مشوار الكوافير كل شوية وكمان هنريحك من الم السويت او الشمع لان الفتلة تقريبا مبيبقاش في الم منها او بيكون الالم بسيط جدا لو بشرتك حساسة اوي, ومش بتهيج البشرة لانها طريقة طبيعية جدا ومافيهاش اي حاجة تأذي البشرة.

تعالوا نشوف مع بعض بالخطوات طريقة ازالة الشعر بالفتلة:

طريقة ازالة الشعر بالفتلة
طريقة ازالة الشعر بالفتلة

1- الخطوة الاولى:

اول حاجة هنجيب الخيط ويكون خيط ابيض عشان يسهل عليكي تشوفي الشعر وانتي بتشيليه, ويكون اي خيط مش مطلوب نوع خيط معين اي بكرة خيط ابيض متوفرة عندك من اللي بنستعمله في الخياطة.

الخطوة الاولى
الخطوة الاولى

2- الخطوة التانية:

تاني حاجة هتقصي حتة خيط من البكره تكون مش طويلة اوي ولا قصيرة اوي يعني تقريبا 45 سم عشان تعرفي تتحكمي فيها ومتوجعش ايدك وتقدري تشيلي الشعر بيها كويس.

الخطوة التانية
الخطوة التانية

3- الخطوة التالتة:

هنربط طرفين الخيط مع بعض ونعملهم عقدة وهنمسك الخيط على اطراف صوابعنا ونخلي العقدة تحت الصوابع في جنب من الجوانب, ونلف الخيط 7 او 10 لفات.

الخطوة التالتة
الخطوة التالتة

4- الخطوة الرابعة:

دلوقتي جهزنا الخيط بتاعنا هنبدأ بقى نشيل الشعر هنحط الخيط عند المكان اللي عايزين نشيل منه الشعر سواء الحواجب او شعر الشنب هتخلي صوابع ايد مقفولة وثابته وبالايد التانية تبدأي توسعي الصوابع وتفضلي تقفلي وتفتحي ايدك هتلاقي الشعر بيطلع وبيتشال معاكي بسهولة جدا ومن غير الم.

الخطوة الرابعة
الخطوة الرابعة

الطريقة دي كمان ممكن نشيل بيها شعر الرجل, طولي بس الخيط شوية وشيلي الشعر بنفس الطريقة.

ازالة شعر الرجل بالفتلة
ازالة شعر الرجل بالفتلة

ده فيديو بيوضح الطريقة اللي شرحناها بالصور:

– نصايح سريعة عشان تقللي من الم الفتلة على الوش:

1- قبل ما تشيلي الشعر مرري مكعب تلج على المكان لان ده بيعمل زي التخدير للمنطقة وبيقلل الالم وبعد ما تخلصي مرريه تاني عشان يمنع احمرار البشرة, ودي كانت من ضمن الحاجات اللي اتكلمنا عليها قبل كده من فوايد مكعبات التلج.

2- ممكن تعملي مساج للمناطق اللي شيلتي منها الشعر بعد ما تخلصي بجل صبار الالوفيرا او كريم مرطب يكون من مكوناته الالوفيرا لان ده بيهدي البشرة.

3- بعد ما تشيلي الشعر حاولي متعرضيش بشرتك للشمس لمدة يوم على الاقل عشان تمنعي احمرار وتهيج البشرة لانها بتكون حساسة بعد ازالة الشعر, بس لو لازم تنزلي يبقى ضروري تحطي صن بلوك.

شوفوا من هنا نصائح لتجنب اثار الفتلة على الوجه.

مقالات متعلقه

6 نصايح فعالة هتساعدك تتخلصي من اكتر المشاكل الجمالية المزعجة

6 نصايح فعالة هتساعدك تتخلصي من اكتر المشاكل الجمالية المزعجة

ازاي تعملي تفتيح “تشقير” شعر الوجه بطرق طبيعية

ازاي تعملي تفتيح “تشقير” شعر الوجه بطرق طبيعية

شمع الشوكولاتة لازالة الشعر: اعرفي فوايدة للبشرة وازاي تعمليه بنفسك في البيت

شمع الشوكولاتة لازالة الشعر: اعرفي فوايدة للبشرة وازاي تعمليه بنفسك في البيت