15 وصفة من الخيار لجمال بشرتك

ريهام محمود
ريهام محمود
في
بشرة
10407

خلاص دخلنا على الصيف والحر والرطوبة والجو ده بيأثر على بشرتنا بطريقة سلبية جدا, ومن انسب الحاجات اللي ممكن تستخدميها لبشرتك في الصيف هو الخيار لانه فيه نسبة 90% من المية وده بيدي ترطيب لبشرتنا من جوه ومن بره, والنهاردة جايبين لكل بنات حوا 15 وصفة من الخيار لجمال بشرتك هتساعد بشرتك على مواجهة حر الصيف والرطوبة وهتحميها.

تعالوا نشوف مع بعض 15 وصفة من الخيار لجمال بشرتك:

1- لوشن الخيار لتهدئة البشرة:

اللوشن ده بيهدي البشرة جدا بعد يوم من الشمس والحر, ده غير ان الفيتامينات اللي في الخيار بتساعد على علاج الهالات السودا تحت العين, وبتساعد البشرة انها تحافظ على رطوبتها, وبتجدد خلايا البشرة.

المكونات:

– خيارة.

– ربع كوباية حليب جوز الهند.

– ربع كوباية جل صبار الالوفيرا.

الطريقة:

هنبشر الخيار ناعم ونحطه في مصفي ونضغط عليه عشان نطلع منه العصير, يعني ابشري خيار بحيث يطلع لك كوباية عصير خيار, بعد كده هنضيف على العصير اللي طلع عندنا حليب جوز الهند والصبار ونحط الخليط في ازازة ونرجها كويس عشان نخلط المكونات ونحتفظ بيها في التلاجة لما نيجي نستخدمة عند اللزوم, هتجيبي حتة قطن او قماش وتبليها باللوشن وتمسحي بيها بشرتك والمناطق الملتهبة او المحمرة من الشمس هيهديها جدا.

لوشن الخيار لتهدئة البشرة
لوشن الخيار لتهدئة البشرة

2- سكراب الخيار لتقشير الجسم:

السكراب ده بيقشر البشرة وبينعمها ويرطبها جدا, بيجدد الجلد, بيقلل من التهابات البشرة لان الخيار غني بالمواد المضادة للاكسدة, ده غير انه بيدي ريحة حلوة جدا للجسم.

المكونات:

– كوباية سكر ابيض.

– 3/4 كوباية خيار مفروم.

– ربع كوباية زيت جوز الهند.

– كام ورقة ريحان “اختياري”.

الطريقة:

نغسل الخيار والريحان كويس ونسيبهم ينشفوا كويس وبعدين نحطهم مع بعض في الخلاطط نفرمهم كويس وبعدين نضيف عليهم السكر وزيت جوز الهند, ونقلبهم مع بعض كويس, ونحط الخليط في برطمان ونحتفظ بيه في التلاجة لما نيجي نستخدمة وممكن يقعد في التلاجة لحد اسبوعين, لما تيجي تستخدمية بقى هتاخدي شاور سخن عشان تفتحي مسام البشرة وبعدين هتفركي جسمك كله بالسكراب في حركات دائرية وتركزي على المناطق الغامقة زي الكوعين والركبتين وتحت الابط والمناطق الحساسة لانه هيساعد جدا على تفتيحها وتنعيمها.

سكراب الخيار لتقشير الجسم
سكراب الخيار لتقشير الجسم

3- ماسك الخيار لعلاج حب الشباب:

الماسك ده ممتاز جدا لعلاج حب الشباب وعلاج الندبات اللي بيسيبها حب الشباب على البشرة, وفعال جدا في علاج حروق الشمس ومهديء للبشرة.

المكونات:

– معلقة كبيرة عصير خيار.

– نص معلقة كبيرة جل الالوفيرا.

– 5 نقط زيت شجرة الشاي.

– 3 نقط زيت اللافندر.

– 2 معلقة كبيرة لبن بودرة كامل الدسم.

الطريقة:

هنخلط عصير الخيار وجل الالوفيرا وبعدين نضيف عليهم اللبن بودرة لحد ما تكون عندنا عجينة قوامها معقول, وبعدين نضيف زيت اللافندر وزيت شجرة الشاي ونخلطهم مع بعض كويس, هنحط الخليط على البشرة ونسيبه من 15 ل 20 دقيقة وبعدين نغسله البشرة بمية دافية.

ماسك الخيار لعلاج حب الشباب
ماسك الخيار لعلاج حب الشباب

4- سبراي الخيار والشاي الاخضر للجسم:

الاسبراي ده بيعالج البشرة من الجفاف اللي ممكن يحصلها بسبب حرارة الشمس وبيرطبها, وبيجدد خلايا الجلد.

المكونات:

– ربع كوباية شاي اخضر.

– 2 معلقة كبيرة عصير خيار.

– معلقة كبيرة جل صبار الالوفيرا.

– نقطتين من زيت النعناع ” اختياري”.

الطريقة:

هنحط الشاي الاخضر في التلاجة نسقعه وبعدين هنضيف عليه باقي المكونات ونحط الخليط في ازازة بخاخ ونرجها كويس عشان نخلط المكونات ونحتفظ بيها في التلاجة لحد ما نيجي نستخدمها وممكن تقعد في التلاجة لمدة اسبوع, ممكن بقى ترشي منه على الجسم لو راجعة من يوم شمس وحر خدي شاور وبعدين رشي جسمك بيه.

سبراي الخيار والشاي الاخضر للجسم
سبراي الخيار والشاي الاخضر للجسم

5- صابونة الخيار:

الصابونة بتنعم البشرة وبتفتحها وبتصفيها من اي شوائب.

المكونات:

– خيارتين مبشورين.

– صابونة من غير عطور.

الطريقة:

هنصفي الخيار المبشور نطلع منه العصير بتاعه  ونسخنه على نار هاديه, هنبشر الصابونة ونستخدم صابونة من غير ريحة يعني ممكن نجيب صابونة من عند العطار من الصابونات الطبيعية زي الصابون المغربي او صابون الغار وبعدين نضيف الصابون المبشور على الخيار على النار ونقلبه لحد ما يدوب كويس, نرفعه من على النار ونصبه في قوالب ممكن نستخدم قوالب السيليكون او علبة بلاستيك صغيرة ونسيبه لحد ما يتجمد ونحطه في التلاجة لما نيجي نسستخدمة, نغسل بيه الوش والجسم.

صابونة الخيار
صابونة الخيار

6- سكراب الخيار والسكر:

السكراب ده بيساعد على تنضيف البشرة وتفتيحها, بيهديها من اي التهاب او احمرار, بيخلص البشرة من الجلد الميت, وبينعمها ويرطبها جدا.

المكونات:

– نص خيارة.

– 3/4 كوباية سكر.

– نص معلقة كبيرة زيت زيتون.

– معلقة صغيرة ورق نعناع مفروم.

الطريقة:

نهرس الخيار ناعم جدا ونضيف ليه السكر وزيت الزيتون والنعناع المفروم, ونقلب المكونات كويس مع بعض ونحطه في برطمان ونحتفظ بيه في التلاجة لما نيجي نستخدمة, ممكن تستخدميه كل يوم الصبح تفركي بيه بشرتك في حركات دائرية.

سكراب الخيار والسكر
سكراب الخيار والسكر

7- ماسك الخيار لتنضيف البشرة:

ماسك لتنضيف البشرة قبل النوم.

المكونات:

– 2 معلقة كبيرة خيار مبشور.

– 2 معلقة كبيرة زبادي.

– 6 نقط من اي نوع زيت عطري.

الطريقة:

هنمزج المكونات كلها مع بعض كويس جدا ونحط الخليط على البشرة ونسيبة من 15 ل 20 دقيقة وبعدين نغسلة بمية دافية, ولو فضل من الماسك ممكن نحتفظ بالباقي في التلاجة ممكن يقعد تلات ايام.

ماسك الخيار لتنضيف البشرة
ماسك الخيار لتنضيف البشرة

8- تونر الخيار والعسل لتقليل المسام الواسعة:

التونر ده مفيد جدا في تقليل المسام الواسعة في البشرة.

المكونات:

– خيارة متوسطة.

– 2 معلقة صغيرة عسل نحل.

الطريقة:

هنهرس الخيار في الخلاط وبعدين نصفيه عشان نطلع منه العصير وبعدين هنضيف عليه العسل ونحطه في ازازة او برطمان ونرجه كويس عشان نخلطهم كويس ونحتفظ بيها في التلاجة, ولما نيجي نستخدمه نجيب قطنة نبلها بالخليط ونمسح بيها البشرة كلها ونسيبه 20 دقيقة وبعدين نغسله.

تونر الخيار والعسل
تونر الخيار والعسل

9- مكعبات تلج الخيار والليمون:

المكونات:

– 2 خيارة صغيرة مهروسة.

– عصير ليمونة.

الطريقة:

هنصفي الخيار المهروس وناخد منه العصير ونضيف عليه عصير الليمون ونصبه في قوالب التلج ونحطه في الفريزر لحد ما يتجمد, ونستخدمه على البشرة كل يوم ناخد مكعب ندلك بيه بشرتنا في حركات دائرية لحد ما يدوب المكعب, المكعبات دي بتفتح البشرة وبتنعمها وبتقل المسام.

مكعبات تلج الخيار والليمون
مكعبات تلج الخيار والليمون

10- سكراب الخيار والنعناع والسكر:

المكونات:

– خيارة كبيرة.

– 2 معلقة كبيرة ورق نعناع.

– 2 كوب ونص سكر.

– 4 معالق كبيرة زيت زيتون.

الطريقة:

هنحط الخيار والنعناع في الخلاط نهرسهم كويس وبعدين هنضيف عليهم السكر وزيت الزيتون ونخلط المكونات كويس مع بعض, هنحتفظ بالخليط في برطمان ونحطه في التلاجة لحد ما نيجي نستخدمه, ونعمل بيه تقشير للبشرة والجسم ناخد شاور سخن ونفرك بيه البشرة والجسم بيفتح وينعم ويرطب البشرة.

سكراب الخيار والنعناع والسكر
سكراب الخيار والنعناع والسكر

11- مكعبات الخيار وزيت جوز الهند لعلاج الهالات السودا:

الماسك ده مفيد جدا في علاج الهالات السودا والانتفاخات تحت العين.

المكونات:

– خيارة كبيرة مهروسة.

– 2 معلقة كبيرة زيت جوز هند.

– ربع كوباية جل صبار الالوفيرا.

الطريقة:

هنخلط المكونات كلها مع بعض كويس, ونحط الخليط في مكعبات التلج ونسيبها لحد ما تتجمد, ونستخدم المكعبات حوالين منطقة العين لمدة من 10 ل 15 دقيقة.

مكعبات الخيار وزيت جوز الهند لعلاج الهالات السودا
مكعبات الخيار وزيت جوز الهند لعلاج الهالات السودا

12- حمام الخيار للجسم:

المكونات:

 – كوباية عصير خيار.

– كوباية لبن.

– كوباية صودا الخبز “كربوناتو”.

– ربع كوباية خل تفاح مخلوطين مع كوبايتين مية.

– كوباية دقيق الشوفان.

– كوباية من شاي البابونج او الشاي اخضر او النعناع.

الطريقة:

هنملى البانيو مية دافية ونحط فيها كل المكونات وننقع جسمنا في المية دي لمدة من 15 ل 20 دقيقة, وبعدين نغسل جسمنا, الحمام ده بينعم البشرة وبيفتحها وبيرطبها جدا.

حمام الخيار
حمام الخيار

13- ماسك الخيار لترطيب وشد البشرة:

المكونات:

– 3/4 خيارة.

– مية.

الطريقة:

هنقطع الخيار شرايح كبيرة ونحطه في الخلاط ونهرسه كويس, هنضيف شوية مية صغيرين ونخلطهم كويس مع الخيار في الخلاط, هنحط الخليط على البشرة ونسيبه عشر دقايق وبعدين نغسله بالمية, وننشف البشرة ونرطبها بزيت الزيتون, ولو فضل من الماسك ممكن نحطه في اي علبة او برطمان ونحتفظ بيه في التلاجة ممكن يقعد كام يوم.

ماسك الخيار لترطيب وشد البشرة
ماسك الخيار لترطيب وشد البشرة

14- ماسك الخيار لتقشير القدمين:

المكونات:

– 2 خيارة كبيرة.

– 2 معلقة كبيرة زيت زيتون.

– 2 معلقة كبيرة عصير ليمون.

الطريقة:

هنحط كل المكونات مع بعض في الخلاط ونفرمها كويس, هنحط الخليط في طبق وندفيه على النار شوية وبعدين هنحط نص الخليط في طبق والنص التاني في طبق تاني وانقعي كل رجل في طبق وافركي رجلك كلها كويس لمدة من 5 ل 10 دقايق, وبعدين اشطفيها بمية دافية, الماسك ده بيساعد على تقشير الجلد وتنعيمه وترطيبة وكمان بيريح الرجل جدا لو كنتي لابسة الشوز لفترة طويلة ورجلك بتوجعك منها الماسك ده هيبقى مفيد جدا ليها.

ماسك الخيار لتقشير القدم
ماسك الخيار لتقشير القدم

15- شرايح الخيار لعلاج الهالات السودا والانتفاخات:

طبعا شرايح الخيار مش وسيلة جديدة علينا لعلاج الهالات السودا والانتفاخات, هنجيب شريحتين خيار شريحة لكل عين هنحطها الاول في التلاجة شوية نسقعها عشان وهي باردة هتجيب نتيجة احسن مع الانتفاخات, وبعدين هنحطها على العين لمدة نص ساعة, الخيار غني جدا بالمواد المضادة للاكسدة ومركبات الفلافونويد وده بيساعد جدا في التخلص من الهالات السودا والانتفاخات تحت العين والاحمرار وتهيج العين.

شرايح الخيار لعلاج الهالات السودا والانتفاخات
شرايح الخيار لعلاج الهالات السودا والانتفاخات

شوفي معانا كمان 10 وصفات بالشوفان لجمال البشرة والشعر و ماسكات من العسل لحل كل مشاكل البشرة.

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

10 نصايح جمالية دخليهم في روتينك هيفرقوا معاكي

10 نصايح جمالية دخليهم في روتينك هيفرقوا معاكي

10 وصفات طبيعية لتغذية بشرتك في الشتا

10 وصفات طبيعية لتغذية بشرتك في الشتا