10 وصفات بالشوفان لجمال البشرة والشعر
الشوفان من الاكلات المفيدة جدا من الناحية الصحية لكن فوايده مش بتقتصر على الناحية الصحية بس لكن هو ليه فوايد تانية كتير للبشرة والشعر لانه غني بالالياف والبروتينات المفيدة لصحة بشرتنا وشعرنا, واحنا النهاردة جيبنا لكل بنات حوا مجموعة وصفات بالشوفان لجمال بشرتك هنتعرف عليها مع بعض.
10 وصفات بالشوفان لجمال البشرة والشعر:
1- الحماية من حب الشباب:
من اكتر المشاكل اللي بتقابل بنات كتير جدا هي مشكلة حب الشباب والبثور, والشوفان من اكتر الحاجات الفعالة في حماية البشرة من حب الشباب لانه الزيوت الزيادة في البشرة وبينضفها من البكتيريا وده بيساعد في حماية البشرة من حب الشباب .
هنجيب الشوفان ونسلقه في مية لحد ما يطرى ونسيبه يبرد, وبعدين نحطه على البشرة ونسيبه ربع ساعة وبعدين نغسل البشرة.
2- تقشير البشرة:
الشوفان بيساعد على تقشير البشرة وتجديد الجلد وعلاج جفاف البشرة لانه بيحتوي على السكريات اللي بتعمل حاجز وقائي على البشرة.
– هنخلط معلقتين من الشوفان المطحون مع معلقة عسل ومعلقة زيت لوز حلو او زيت زيتون, اخلطي المكونات مع بعض كويس لحد ما يبقى عندك خليط سميك شوية, افركي بشرتك بالخليط في حركات دائرية لمدة دقايق وبعدين اغسلي البشرة.
– ممكن نعمل مقشر تاني, عبارة عن نص كوباية شوفان مطحون ونضيف عليه نص كوباية زيت جوز هند ومعلقة صغيرة خلاصة الفانيليا ومعلقة صغيرة عسل ومعلقة صغيرة سكر بني, هنخلط المكونات كلها مع بعض ونحتفظ بيها في اي برطمان نضيف عندنا وناخد منه نعمل تدليك للبشرة, ونحتفظ بباقي الخليط عندنا لما نيجي نستخدمة تاني.
3- كريم الشوفان لترطيب البشرة:
الشوفان يعتبر من المرطبات الطبيعية للبشرة وبيخلص البشرة من الجلد الميت, وبيزود كولاجين البشرة وبينشط الجهاز المناعي وبيحافظ على صحة الجلد.
المكونات:
نص كوباية شوفان مطحون.
2 كوب مية.
4 معالق كبيرة زبدة الشيا.
4/3 كوباية زيت زيتون.
معلقة صغيرة فول صويا مطحون.
قرص فيتامين C يكون 1000 ملليجرام “هنلاقيه في الصيدلية”.
الطريقة:
هنخلط الشوفان مع المية ونقلبهم مع بعض كويس هنحطهم في الفرن فوق لحد ما يغلي وبعدين ننزله في رف الفرن اللي تحت ونغطيه ونسيبه 20 دقيقة لحد ما يبقى قوامه سميك, هنخرجه من الفرن ونصفيه بالمصفي, هندوب زبدة الشيا في طبق صغير على نار هادية وبعد ما تدوب نشيلها من على النار ونضيف عليها زيت الزيتون وفول الصويا ونطحن قرص الفيتامين C ونضيفه على الخليط وبعدين هنضيف ده كله على الشوفان اللي احنا عملناه ونقلب المكونات كلها كويس هيبقى الخليط عندنا شب الكريم, هنحتفظ بيها في اي برطمان ونحطه في التلاجة لما نيجي نستخدمه, ممكن ندهن منه بشرتنا يوميا قبل النوم ونغسله الصبح.
4- لتهدئة البشرة وعلاج الالتهاب:
الشوفان ليه خصائص مهدئة للجلد ومضادة للالتهابات, ويعتبر افضل علاج لجفاف الجلد والامراض الجلدية زي الاكزيما والصدفية.
هنخلط الشوفان المطحون مع المية هيشكل عندنا عجينة هنحطها على الاماكن المصابة او الملتهبة ونسيبها ربع ساعة وبعدين نغسل البشرة, وممكن نضيف على الشوفان صودا الخبز او خل تفاح لان ده بيعمل توازن لدرجة حموضة الجسم وبيساعد في علاج الالتهاب.
5- لتفتيح البشرة:
الشوفان من الحاجات الفعالة جدا لتفتيح البشرة, وعلاج البقع الغامقة.
المكونات:
2 معلقة كبيرة شوفان.
4 معالق كبيرة لبن.
4 معالق كبيرة عصير ليمون.
الطريقة:
هنغلي الشوفان في المية شوية لحد ما يطرى ونسيبه يبرد وبعدين نضيف عليه اللبن وعصير الليمون, هنخلطهم كويس مع بعض, هنحط الخليط على البشرة وممكن نعمل الماسك كمان للجسم كله ونسيبه من 20 ل 25 دقيقة وبعدين نغسله بمية دافية, نعمله تلات مرات في الاسبوع والنتيجة تبان بعد شهرين من الاستخدام.
6- منظف الشوفان:
المنظف ده بيساعد على تنضيف البشرة من الاوساخ والزيوت الزيادة, ومطهر للبشرة.
اخلطي الشوفان المطحون مع المية لحد ما يبقى عندك عجينة افركي بيها البشرة في حركات دائرية لمدة دقايق وبعدين اغسلي البشرة بمية دافية.
7- لعلاج حكة فروة الراس:
في بعض البنات بيعانوا مش مشكلة حكة فروة الراس وبيفضلوا يهرشوا فيها لحد ما يعوروا نفسهم, الشوفان هيحل لك المشكلة دي.
المكونات:
2 كوباية مية.
نص كوباية شوفان.
كيسين شاي اخضر.
10 نقط زيت اللافندر.
10 نقط زيت اكليل الجبل.
10 نقط زيت النعناع.
الطريقة:
هنغلي المية وبعدين نرفعها من على النار ونحط فيها اكياس الشاي الاخضر ونسيبها لمدة دقايق وبعدين نشيلها من المية ونحط الشوفان ونسيبه مقنوع لمدة 20 دقيقة ونقلبه في المية لحد ما يبرد, بعد كده هنصفي الخليط ده بالمصفى او حتة شاش وبعدين نضيف الزيوت ونقلب الخليط كويس, دلوقتي هنحطه على فروة الراس والشعر وندلكه ونسيبه لمدة ربع ساعة وبعدين نغسله بمية دافية, وممكن تستبدلي غسل الشعر بالشامبو بالخليط ده يعني اغسلي شعرك بالخليط من غير ما تغسليه بالشامبو هيكون كافي جدا لانه هو بينضف فروة الراس, وكمان بيرطب الشعر.
8- علاج قشرة الشعر:
هنضيف 2 معلقة كبيرة شوفان مطحون معاه 2 معلقة كبيرة سكر بني و2 معلقة كبيرة بلسم, هنخلط المكونات مع بعض كويس, اغسلي شعرك بالشامبو وبعدين حطي عليه الخلطة ودلكيه كويس في الشعر وفروة الراس في حركات دائرية لمدة دقايق وبعدين اغسلي شعرك.
9- شامبو جاف بالشوفان:
احنا اتكلمنا قبل كده عن الشامبو الجاف و ازاي نعمله بنفسنا في البيت, دي طريقة تانية للشامبو الجاف.
وهي عبارة عن بس شوفان مطحون, هتحطي الشوفان على فروة الشعر وبعديننسرح شعرنا بالفرشة عشان نوزعه على الشعر كله, وده هيبقى بديل لغسل الشعر بالشامبو العادي لو معندكيش وقت تغسليه.
10- منع تساقط الشعر:
زي ما قولنا ان اكل الشوفان مفيد صحيا وده بيأثر بشكل ايجابي على صحة الشعر والبشرة, لان الشوفان غني جدا بالزنك والحديد والمغنسيوم وكل المكونات دي بتعزز نمو الشعر, عشان كده لازم نحاول ندخل الشوفان في نظامنا الغذائي, ده بالاضافة للحبوب الكاملة, والخضروات الورقية اللي لونها اخضر غامق, والمكسرات, والسمك كل الحاجات دي لازم تبقى في نظامنا الغذائي عشان نحافظ على صحة شعرنا وكمان بشرتنا.
شوفي معانا كمان فوايد الموز واستخداماته للبشرة والشعر و ماسكات من العسل لحل كل مشاكل البشرة.
