10 فوايد صحية مذهلة من اكل الالياف
اكل الالياف من الحاجات المهمة جدا اللي لازم ندخلها دايما في نظامنا الغذائي وناكل الاكلات اللي بتحتوي على نسبة الياف عالية لانها مفيدة جدا صحيا وبتحمي الجسم من كتير من الامراض, والنهاردة هنتعرف مع بعض من خلال المقال ده على الفوايد الصحية للالياف اللي هتخليكي متستغنيش عنها في اكلك كل يوم.
– تعالوا نعرف الاول ايه هي الاكلات الغنية بالالياف:
في نوعين من الالياف:
– الالياف القابلة للذوبان: ودي موجودة في الشوفان, والتفاح, والفول, والبسلة, والفواكة الحمضية زي البرتقان, والجزر, والشعير, والالياف دي بتدوب في وبتكون مادة هلامية بتساعد على خفض نسبة الكوليسترول.
– الالياف الغير قابلة للذوبان: موجودة في الخضروات بشكل عام, ودقيق القمح, والمكسرات, والبقول, والبطاطس, والنوع ده من الالياف بيحسن حركة الامعاء ووظايف الجهاز الهضمي.
– وفي اكلات تانية غنية بالالياف زي الموز , والتوت, والفراولة, والكمترى, الخوخ, والفشار, البطاطا, الفواكة المجففة, السبانخ, البروكلي, العدس, البسلة, الفاصوليا الناشفة, اللفت, البنجر, الكرنب, الخرشوف, صلصة الطماطم, الحبوب الكاملة زي الارز البني والخبز الاسمر او المصنوع من الحبوب الكاملة.
– دلوقتي تعالوا نعرف 10 فوايد صحية مذهلة من اكل الالياف:
1- بيساعد على انقاص الوزن:
من الفوايد المهمة جدا لاكل الالياف انه بيساعد على التخسيس وانقاص الوزن لو دخلتيه في نظامك الغذائي, واخصائيين التغذية حددوا نسبة الالياف اللي لازم تحصلي عليها يوميا انها تكون مش اقل من 30 جرام في اليوم, واتعملت دراسة حديثة اثبتوا فيها ان اكل الالياف يوميا بيساعد على تخسيس الوزن بشكل اكبر واسرع من انظمة الرجيم او الحميات الغذائية الصعبة زي الحميات اللي بتعتمد مثلا على تحديد نسبة السعرات الحرارية او الدهون او السكريات او الملح, لان الالياف بتمنع الجسم من امتصاص بعض السعرات الحرارية اللي ممكن تكتسبيها من الاكل لانها بتتحد مع الدهون والسكر في خلال دورتهم جوه الجهاز الهضمي وده بيقلل من عدد السعرات الحرارية اللي بياخدها جسمك وبالتالي بتساعد على التخسيس وانقاص الوزن, وفي دراسة تانية اثبتت ان الاشخاص اللي بيدخلوا الالياف في نظامهم الغذائي يوميا بشكل مضاعف عن الكمية المحددة كمان انهم بيحرقوا سعرات حرارية اكتر خلال اليوم بتوصل من 90 ل 130 كالوري في اليوم.
ومن اكتر خمس اكلات غنية بالالياف وممكن تساعدك على انقاص الوزن هي التفاح تفاحة متوسطة هيديكي 4 جرام الياف, والبطاطا لو حجمها كبير هتديكي 4 جرام الياف , والتوت كوباية من التوت هتديكي 8 جرام الياف, والحمص نص كوباية حمص هتديكي 6 جرام الياف ممكن تضيفيه للسطلة او تاكليه كده كسناكس, والشوفان نص كوباية من الشوفان هتديكي 4 جرام من الالياف.
2- الحفاظ على وزن صحي مع الوقت:
الالياف مش بس بتساعد على التخسيس وانقاص الوزن لا بتعمل اكتر من كده كمان الدراسات اثبتت انها بتحافظ على الوزن الصحي والمثالي وبتخلي الجسم ميكسبش وزن زايد تاني, يعني لو حافظتي على اكل الالياف في نظامك الغذائي ده هيخليكي تحافظي على وزنك مثالي على طول ووزنك مش هيزيد تاني بعد ما تخسي.
3- تقليل الاصابة بمرض السكر:
الالياف بتقلل من خطر الاصابة بمرض السكر, والدراسات اثبتت ان الاشخاص اللي بياكلوا الياف يوميا بنسبة اكتر من 26 جرام في اليوم دول بتقل عندهم نسبة الاصابة بمرض السكر بنسبة 18% مقارنة مع الاشخاص اللي بياخدوا الالياف بنسبة اقل من 19 جرام في اليوم, واثبتت الدراسات ان ده سببه ان الالياف بتحافظ على توازن نسبة السكر في الدم.
4- تقليل الاصابة بامراض القلب:
من الفوايد المهمة جدا من اكل الالياف هي انها بتقلل من خطر الاصابة بامراض القلب لو اكلتي يوميا 7 جرام بس من الالياف ده بيقلل الاصابة بنسبة 9%, وده بيرجع ان الالياف بتمنع زيادة نسبة الكوليسترول الضار في الجسم وبالتالي ده بيحمي القلب من انسداد الشرايين.
5- الحفاظ على امعاء صحية وتسهيل الهضم:
اكل الالياف يوميا بيحسن جدا من صحة الامعاء وبينظم حركتها وبيسهل عملية الهضم, وبيقلل من خطر الاصابة بسرطان القولون, بس لازم لما نزود كمية الالياف في الاكل نزود شرب المية لان من غير شرب المية الالياف هتبقى جافة في الجهاز الهضمي عشان كده اكل الالياف وشرب المية بيكملوا بعض وكلنا عارفين اصلا ان شرب المية يوميا بكمية كافية مهم جدا للجسم لانها بتطرد السموم من الجسم وبتخليه صحي, ده غير ان الالياف بتنتج في الامعاء احماض دهنية ودي مفيدة جدا للحفاظ على صحة الامعاء والجهاز الهضمي.
6- بتقلل من خطر الاصابة ببعض امراض السرطان:
الالياف بتقلل بشكل فعال جدا من خطر الاصابة بامراض السرطان, لو اكلتي 10 جرام من الالياف في اليوم ده بيبقى قصادهم تقليل من خطر الاصابة بسرطان القولون بنسبة 10% زيهم, وبيقلل من خطر الاصابة بسرطان الثدي بنسبة 5%, واثبتت الدراسات ان الالياف غير انها غنية بالمواد المضادة للسرطان هي كمان غنية جدا بالمواد المضادة للاكسدة والمواد الكيميائية النباتية.
7- بتقلل من خطر الوفاة المفاجئة:
اثبتت الدراسات ان اكل الالياف يوميا بيقلل من خطر الوفاة المفاجئة لاي سبب, لانهم لقوا ان الناس اللي بياكلوا الاكلات الغنية بالالياف بتقل عندهم خطر الوفاة المفاجئة مقارنة مع الاشخاص اللي بياكلوا الالياف بشكل اقل.
8- بيقلل من الامساك المزمن:
اكل الالياف من الحاجات اللي بتساعد جدا في علاج مشكلة الامساك المزمن, لانه بيحسن عمل الجهاز الهضمي وبيخليه يشتغل بشكل احسن وبالتالي ده هيقلل من مشكلة الامساك.
9- بيخلص الجسم من السموم:
الالياف بتساعد على تخليص الجسم من السموم وتطهير الجهاز الهضمي, لان الالياف بتمنع بعض المواد اللي ممكن تكون ضارة بالجسم زي هرمون الاستروجين والدهون الغير صحية من ان الجسم يمتصها وبالتالي بتحميه من مخاطرها.
10- بتحافظ على عظام صحية:
اكل الالياف بيحافظ على العظام صحية واقوى, لان الدراسات اثبتت انه الاكلات الغنية بالالياف زي فول الصويا, والقمح, والشوفان انها غنية بالمعادن زي الكالسيوم اللي ليه دور اساسي في الحفاظ على صحة العظام وبيخليها اقوى وبيحمي من هشاشة العظام.
اعرفي معانا كمان ازاي اكل الدهون يخليكي اذكى!.
