10 اخطاء تجنبيهم وانتي بتعملي شعرك كيرلي بالمكوى !

بقلمريهام محمود فيشعر visibility3284

الشعر الكيرلي من اكتر تسريحات الشعر المفضلة دلوقتي عند كتير من البنات لان بيبقى شكلها حلو وبتدي لوك مختلف ده غير انها انسب تسريحة لو انتي معندكيش وقت مثلا تعملي شعرك سيشوار بيبقى اسهل واسرع حاجة انك تعمليه كيرلي وكمان مناسب جدا للصيف وجو الصيف, واحنا جيبنالكم قبل كده تسريحات للشعر الكيرلي و ازاي تعملي شعرك كيرلي بطرق سهلة في البيت, لكن لما بنيجي نعمل شعرنا كيرلي ممكن نقع في اخطاء من غير ما ناخد بالنا وده اللي هنعرفه النهاردة مع بعض.

10 اخطاء تجنبيهم وانتي بتعملي شعرك كيرلي بالمكوى:

10  اخطاء تجنبيهم وانتي بتعملي شعرك كيرلي بالمكوى
10 اخطاء تجنبيهم وانتي بتعملي شعرك كيرلي بالمكوى

1- استخدام مكوى بحجم كبير:

في كتير من البنات بيفتكروا ان كل ما حجم المكوى كبر ده هيديهم تمويجات اكبر واحسن, لكن ده ممكن يعمل نتيجة عكسية وخصوصا لو انتي شعرك مش طويل وحجم المكوى كبير ده هيسبب لك الم وانتي بتعملي شعرك, عشان انسب حاجة انك تستخدمي مكوى مناسبة لطول شعرك, وممكن تسرحي الشعر بالفرشة بعد ما تخلصي بشكل خفيف عشان تدي الكيرلي شكل احلى ويطلع زي ما انتي عايزاه.

2- استخدام مثبت الشعر:

رشي شعرك بمثبت الشعر قبل ما تعملي الشعر بالمكوى عشان ده هيحافظ على شعرك من الحرارة, ومش بس كده ده هيسهل عمل الشعر كيرلي لانواع الشعر اللي مش بتتجعد بسهولة, وممكن تحطي في الاخر اي نوع زيت شعر انتي بتستخدميه عشان يظبط شكل الكيرلي اكتر.

3- استخدمي حرارة منخفضة:

لما تيجي تعملي شعرك كيرلي بالمكوى متستخدميش حرارة عالية اوي لان ده هيضر الشعر, خلي حرارة المكوى منخفضة, او استخدمي الرش الخاص بالحماية من درجة الحرارة قبل ما تستخدمي المكوى عشان يحمي شعرك من اضرار الحرارة او انه ينشف او يتقصف ,وده هتلاقيه موجود في المحلات اللي بتبيع مستلزمات الشعر او في الصيدلية.

4- استخدام مكوى رخيصة:

لما تيجي تشتري المكوى حاولي تختاري الماركات المعروفة والمضمونة وابعدي عن الماركات مجهولة المصدر او مش معروفة والرخيصة عشان دي ممكن تضر شعرك.

5- قسمي شعرك اجزاء:

قبل ما تبدأي قسمي شعرك اجزاء او خصل متساوية واشبكي كل خصلة لوحدها بالبنس عشان ده هيسهل عليكي جدا انك تعملي كل خصلة كويس وتطلع بالشكل اللي انتي عايزاة ومش هيتعبك.

6- استخدمي اسلوب واحد للكيرلي:

لما تيجي تعملي الشعر كيرلي استخدمي اسلوب واحد في تجعيد الشعر كله عشان يطلع شكله متناسق يعني متبقاش كل خصلة بشكل او استايل مختلف عن التانية.

7- متثبتيش المكوى على خصلة الشعر:

لو انتي مش عايزة تعملي حجم كبير لشعرك متثبتيش المكوى على خصلة الشعر يعني ابدأي من الجذور وانزلي على باقي الشعر على طول, لكن لو عايزة تديه حجم اكبر يبقى تلفي الخصلة على المكوى من عند الجذور وتثبتيها شوية وبعدين تنزلي على باقي الخصلة.

8- لفي الشعر كله في نفس الاتجاه:

لو عايزة شكل كيرلي كلاسيكي لفي الشعر كله في نفس الاتجاه يعني لو لفيتي خصلة الشعر ناحية اليمين يبقى تعملي الشعر كله بنفس الطريقة, لكن لو عايزة كيرلي الشاطيء او الفوضوي يبقى ممكن تنوعي وتعملي الخصل في اكتر من اتجاه يعني تعملي خصلة ناحية اليمين وخصلة للشمال بشكل مش مترتب يعني وهكذا على باقي الشعر.

9- متثبتيش المكوى على الشعر فترة طويلة:

وانتي بتعملي الخصل متثبتيش المكوى على خصلة الشعر فترة طويلة بالكتير اوي مش اكتر من 10 ثواني على كل خصلة ولو انتي شعرك مش بيتجعد بسهولة ممكن تخليه فترة اطول حاجة بسيطة جدا, عشان الحرارة الزيادة ممكن تضر الشعر وتحرقه.

10- متستخدميش المكوى على شعر مبلول:

ابعدي تماما عن استخدام المكوى وشعرك مبلول لازم تستني لما ينشف خالص او تنشفيه بالسيشوار وبعدها تقدري تستخدمي المكوى وزي ما قولنا عشان تحمي الشعر اكتر ممكن ترشي عليه حامي من الحرارة وبعدها ترشي مثبت شعر ده هيحمي شعرك من اي اضرار او انه يتحرق ده غير انه هيسهل عمل الكيرلي اكتر.

شوفي كمان 11 تسريحة شعر لو معندكيش وقت تغسليه!.