10 اسرار جمالية لمكعبات الثلج .. اعرفيها معانا

ريهام محمود
ريهام محمود
في
بشرة
13037

طبعا مش اول مرة نسمع عن فوايد الثلج للبشرة واحنا اتكلمنا قبل كده عن اسرار الجمال باستخدام الثلج , واحنا النهاردة جايبين لكم فوايد تانية و اسرار جمالية لمكعبات الثلج ووصفات نعملها بمكعبات الثلج لعلاج مشاكل كتير في البشرة زي حروق الشمس والتهاب البشرة, وانتفاخات تحت العين والهالات السودا, وعلاج الحبوب وغيرها من الفوايد اللي هنعرفها مع بعض النهاردة مع كل بنات حوا.

تعالوا نعرف مع بعض اسرار جمالية لمكعبات الثلج:

1- مكعبات الخيار والعسل المنظفة للبشرة:

مكعبات الخيار والعسل بتنضف البشرة وبترطبها وبتخليها صحية ومنورة.

اهرسي الخيار وضيفي عليه شوية عسل نحل وكام نقطة من عصير الليمون اخلطيهم مع بعض وبعدين صبي الخليط في مكعبات الثلج وسيبيها في الفريزر لحد ما تتجمد, هنستخدمها بعد كده نفرك بيها الوش والرقبة في حركات دائرية لمدة 30 ثانية وممكن بعد ما تفركي البشرة تسيبي بشرتك 10 دقايق وبعدين تغسليه.

مكعبات الخيار والعسل المنظفة للبشرة
مكعبات الخيار والعسل المنظفة للبشرة

2- مكعبات الشاي الاخضر لعلاج نتفاخات العين والهالات السودا:

الشاي الاخضر من الحاجات اللي اثبتت فعاليتها جدا في علاج انتفاخات العين وتهدئة العين وده بسبب انه غني جدا بالمواد المضادة للاكسدة والكافيين المعروفين بفايدتهم للبشرة, واكيد معظمنا قبل كده جرب اكياس الشاي لعلاج الانتفاخات لكن تعالوا نجرب مكعبات الشاي المثلجة لانها اكتر فعالية في علاج الانتفاخات والهالات السودا.

هنعمل فنجان شاي اخضر بالطريقة العادية جدا وبعدين هنصبه في مكعبات الثلج ونسيبه يتجمد, وبعدين نستخدمه ندلك بيه تحت العين هيخفف جدا من الانتفاخات لانه بيخلص حوالين العين من السوايل الزيادة وهيعالج الهالات السودا.

مكعبات الشاي الاخضر لعلاج نتفاخات العين والهالات السودا
مكعبات الشاي الاخضر لعلاج نتفاخات العين والهالات السودا

3- مكعبات الثلج لشد البشرة:

هنا في الطريقة دي هنستخدم مكعبات الثلج العادية, اعملي الوصفة دي كل يوم الصبح اول ما تقومي من النوم اشربي الاول كوباية مية ومعصور فيها كام نقطة ليمون وبعدين جيبي طبق غويط وحطي فيه مكعبات ثلج وحطي وشك فيه لمدة 30 ثانية او اغسلي وشك بالمية المتلجة دي, لو استمريتي كل يوم الصبح على الطريقة دي هتلاقي بشرتك مشدودة وشكلها صحي جدا لانها بتحسن عمل الدورة الدموية.

مكعبات الثلج لشد البشرة
مكعبات الثلج لشد البشرة

4- مكعبات الثلج لعلاج الحبوب والبثور:

كتير مننا بيعانوا من حب الشباب وبثور البشرة وساعات بيطلع لنا حبوب منتفخة وبتسبب لنا الم في بشرتنا, عشان نتخلص من الحبوب دي هتجيبي مكعب الثلج وتحطيه في كيس بلاستيك او تلفيها في فوطة وتحطيه على مكان الحباية لمدة 5 دقايق, الطريقة دي هتخفف جدا من حجم الحباية ومن الالم وكمان لو في التهاب او احمرار في البشرة هتخففه.

مكعبات الثلج لعلاج الحبوب والبثور
مكعبات الثلج لعلاج الحبوب والبثور

5- تخفيف الم ازالة شعر الحواجب:

معظمنا بيحس بألم اثناء ازالة شعر الحواجب بس مكعبات الثلج هتخلصك من المشكلة دي, قبل ما تشيلي شعر الحواجب افركي حواجبك بمكعب ثلج وابدأي شيلي الشعر واثناء ما انتي بتشيلي الشعر كمان افركيه تاني ده هيعمل زي تخدير للمنطقة ومش هيخليكي تحسي باي الم, وبعد ما تخلصي افركي المنطقة تاني بالثلج عشان ده هيخلي بشرتك ميحصلهاش اي احمرار او التهاب او تورم بعد ازالة الشعر.

تخفيف الم ازالة شعر الحواجب
تخفيف الم ازالة شعر الحواجب

6- مكعبات الالوفيرا لعلاج حروق الشمس:

لعلاج حروق الشمس بشكل فوري استخدمي مكعبات الالوفيرا, هنجيب جل صبار الالوفيرا النقي من غير اي اضافات ونصبه في مكعبات الثلج ونسيبه يتجمد ونستخدمه على الاماكن اللي فيها حروق الشمس, ده يعتبر علاج فوري يعني نخلي دايما في الفريزر عندنا المكعبات دي موجودة وجاهزة عشان نستخدمها وقت اللزوم.

مكعبات الالوفيرا لعلاج حروق الشمس
مكعبات الالوفيرا لعلاج حروق الشمس

7- مكعبات الثلج لعلاج الخطوط الرفيعة على البشرة:

ادهني بشرتك بكام نقطة من زيت اللافندر وبعدين لفي مكعبات الثلج في فوطة وابدأي اعملي مساج لبشرتك ودلكي الوش والرقبة كويس, كرري المساج ده يوميا قبل ما تنامي, بيساعد جدا في علاج الخطوط الرفيعة على البشرة, وتحسين الدورة الدموية.

مكعبات الثلج لعلاج الخطوط الرفيعة على البشرة
مكعبات الثلج لعلاج الخطوط الرفيعة على البشرة

8- مكعبات الليمون والبرتقان:

مكعبات الليمون والبرتقان بتساعد جدا في التخلص من الرؤوس السودا, وعلاج البثور, وندبات حب الشباب, وعلاج التجاعيد, وتفتيح البشرة.

اعصري الليمون والبرتقان بكميات متساوية وصبيهم في مكعبات الثلج وسيبيه يتجمد وبعدين دلكي بيها الوش والرقبة لمدة 30 ثانية وسيبي بشرتك نص ساعة وبعدين اغسليها بمية دافية , كرري الوصفة دي يوميا.

مكعبات الليمون والبرتقان
مكعبات الليمون والبرتقان

9- مكعبات اللبن لتبييض البشرة:

مكعبات اللبن من الحاجات الهايلة للبشرة بتساعد جدا على تبييض البشرة, وبتعالج البثور , وندبات حب الشباب, وعلاج التجاعيد.

صبي لبن كامل الدسم في قوالب الثلج وسيبيه لحد ما يتجمد, خدي مكعب ثلج ودلكي بيه وشك ورقبتك لحد ما المكعب يدوب خالص وسيبي بشرتك ربع ساعة وبعدين اغسليها بمية دافية, استخدمي الطريقة دي تلات مرات في الاسبوع ومع الوقت هتلاحظي فرق كبير على بشرتك.

مكعبات اللبن لتبييض البشرة
مكعبات اللبن لتبييض البشرة

10- مكعبات القهوة لعلاج السيلوليت:

مكعبات القهوة علاج ممتاز جدا للسيلوليت, وبتحسن الدورة الدموية في الجسم.

والمكعبات عبارة عن كوباية قهوة مطحونة وشريحتين زنجبيل و3 كوبايات ملح ناعم و2 كوباية مية هنحط المكونات دي كلها في الخلاط ونخلطهم كويس جدا وبعدين نصب الخليط في مكعبات الثلج ونسيبه لحد ما يتجمد, هناخد مكعب ثلج وندلك بيه المناطق اللي فيها سيلوليت لحد مايدوب المكعب, ونكرر الوصفة يوميا.

مكعبات القهوة لعلاج السيلوليت
مكعبات القهوة لعلاج السيلوليت

اعرفوا معانا كمان فوايد مذهلة لماسكات الزبادي للبشرة و ماسكات من العسل لحل كل مشاكل البشرة.

مقالات متعلقه

5 علاجات طبيعية بتستخدمها كارينا كابور لبشرة نضرة وشباب

5 علاجات طبيعية بتستخدمها كارينا كابور لبشرة نضرة وشباب

مكون واحد بس لمنع علامات الشيخوخة

مكون واحد بس لمنع علامات الشيخوخة

مكونات طبيعية اساسية ومتعددة الاستخدامات للبشرة والشعر

مكونات طبيعية اساسية ومتعددة الاستخدامات للبشرة والشعر