فوايد مذهلة لماسكات الزبادي للبشرة .. اعرفوها معانا

بقلمريهام محمود فيبشرة visibility8286

كلنا عارفين الزبادي قد ايه مفيد صحيا ومغذي ده غير انه وجبة خفيفة على المعدة لكن فوايد الزبادي مش بس صحية كمان ليه فوايد جمالية للبشرة وده اللي هنعرفه النهاردة مع بعض هنقولكم بالتفصيل فوايد الزبادي للبشرة ومجموعة ماسكات من الزبادي لحل مشاكل البشرة.

– تعالوا نعرف الاول العناصر المغذية الموجودة في الزبادي وفايدتها للبشرة:

العناصر الموجودة في الزبادي دي هي اللي بتساعد على تجديد البشرة وبتخليها صحية ومنورة وخالية من اي شوائب وعيوب.

1- الزنك:

الزنك واحد من المواد المهمة والمفيدة جدا الموجودة في الزبادي, في كل 100 جرام زبادي في تقريبا 1 ملليجرام زنك, ومعدن الزنك من المواد المعروفة بخصائصة المضادة للالتهابات, وتجديد الخلايا ونمو الانسجة, وبيساعد جدا في التحكم في الزيوت الزيادة اللي بتفرزها البشرة وبالتالي هو علاج ممتاز لحب الشباب والبثور.

2- الكالسيوم:

الزبادي مليان بعنصر الكالسيوم ولان البشرة ببتكون بنسبة كبيرة من الكالسيوم فهي هتحتاج باستمرار لتجديد الكالسيوم ده واللي هيديها ده هو الزبادي, اللي هيساعد على تجديد البشرة ويمنعها من الجفاف ويخليها دايما صحية ورطبة.

3- فيتامين B:

الزبادي غني جدا بفيتامين B5, B2, B1, B12 وفيتامين بي او الريبوفلافين بيحافظ على البشرة صحية, وبيحافظ على رطوبتها باستمرار, وبيحمي الجلد من اضرار الجذور الحرة اللي بتسبب التجاعيد والشيخوخة للبشرة, وبيجدد خلايا الجلد, وليه دور كبير في زيادة نمو الدهون الصحية المفيدة للبشرة, وكوباية واحدة من الزبادي في اليوم بتديكي تقريبا من 20 ل 30 في المية من نسبة البروتين اللي انتي محتاجاها يوميا.

4- حمض اللاكتيك:

الحمض ده من العناصر الرئيسية الموجودة في الزبادي , والعنصر مهم في الحفاظ على صحة البشرة ورطوبتها, وحمايتها من الشيخوخة ومنع التجاعيد والخطوط الرفيعة على البشرة.

فوايد مذهلة لماسكات الزبادي للبشرة
فوايد مذهلة لماسكات الزبادي للبشرة

– دلوقتي تعالوا نعرف ماسكات الزبادي ممكن تعمل ايه للبشرة ؟

1- ترطيب البشرة:

من اهم الفوايد اللي ممكن تعملها الزبادي للبشرة هي الترطيب, لان حمض اللبنيك الموجود فيها بيحافظ على رطوبة البشرة وبيخفي علامات التعب والاجهاد منها.

2- تفتيح البشرة:

حمض اللبنيك اللي موجودة في الزبادي بيمنع انتاج انزيم “التيروزينيز” والانزيم ده هو المسئول عن انتاج مادة الميلانين اللي هو بيأثر على لون البشرة وبالتالي لما الزبادي توقف انتاج الميلانين ده هيخلي بشرتك افتح ومنورة على طول.

3- تقشير البشرة:

حمض اللبنيك هو نفسه حمض الهيدروكسيل الفا الطبيعي اللي بيساعد على ازالة خلايا الجلد الميتة, وبيمنع البشرة من الالتهاب وبيحفز تجديد خلايا البشرة.

4- تنقية البشرة:

الزبادي بتساعد على تنقية البشرة من اي شوائب او حبوب او بثور بسبب مادة الزنك اللي احنا اتكلمنا عليها واللي بتتحكم في كمية الزيوت الزيادة اللي بتفرزها البشرة وبالتالي بيحميها من الحبوب والبثور, ده غير ان الزبادي فيها مادة البروبيوتيك اللي بتساعد على تدمير البكتيريا.

5- علاج الهالات السودا:

الزبادي بتساعد على علاج الهالات السودا وتفتيح البقع والندوب بسبب مادة الزنك اللي موجودة فيه.

6- علاج التجاعيد والخطوط الرفيعة:

الزبادي بتحتوي على مضادات اكسدة قوية اللي بتمنع الجذور الحره من اتلاف البشرة, وبتأخر ظهور التجاعيد والخطوط الرفيعة على البشرة, ده غير حمض اللاكتيك اللي بيساعد على تأخير شيخوخة البشرة.

7- حماية الجلد من اي عدوى فطرية:

حمض اللاكتيك الموجود في الزبادي بيحتوي على خصائص مضادة للفطريات وبالتالي الزبادي مفيد جدا في مكافحة اي عدوى فطرية ممكن تظهر على الجلد.

8- علاج حروق الشمس:

من الفوايد المهمة جدا للزبادي هو انه بيساعد في علاج حروق الشمس بسبب مادة الزنك اللي موجودة فيه تعتبر هي المفتاح في علاج الحروق وتهدئة البشرة, وعلاج اي التهاب او احمرار.

فوايد مذهلة لماسكات الزبادي للبشرة
فوايد مذهلة لماسكات الزبادي للبشرة

– دلوقتي بقى ياللا نشوف مجموعة ماسكات بالزبادي:

1- ماسك الزبادي لترطيب البشرة:

حطي معلقتين زبادي مع شوية جزر مبشور اخلطيهم كويس مع بعض, حطي الخليط على البشرة وسيبيه 20 دقيقة وبعدين اغسليه,الماسك ده بيجدد البشرة وبيرطبها وبيديها لمعان.

2- ماسك الزبادي لتفتيح وتقشير البشرة:

ضيفي معلقتين زبادي مع معلقة عصير ليمون اخلطيهم كويس وبعدين حطي الخليط على بشرتك وسيبيه 20 دقيقة وبعدين اغسليه, الماسك ده مفيد جدا للبشرة الدهنية بيقلل من المسام الواسعة , وبيقشر البشرة وبيفتحها.

3- ماسك الزبادي لعلاج التجاعيد:

ضيفي معلقتين عسل نحل مع معلقتين زبادي واخلطيهم مع بعض كويس وادهني الخليط على بشرتك وسيبيه 20 دقيقة وبعدين اغسليه, الماسك ده يعتبر مرطب طبيعي للبشرة, بيقلل من التجاعيد, وبيساعد في علاج حب الشباب والبثور.

4- ماسك الزبادي للبشرة الجافة:

الماسك ده مفيد جدا للي بشرتهم جافة هيرطبها وينعمها جدا.

الماسك عبارة عن 2 معلقة كبيرة زبادي, ومعلقة كبيرة عسل نحل, معلقة كبيرة افوكادو مهروس, معلقة كبيرة دقيق شوفان مطبوخ, اخلطي المكونات كلها مع بعض كويس هتبقى عندك شبه العجينة افرديها على وشك وسيبيها ربع ساعة وبعدين اغسلي بشرتك.

5- ماسك الزبادي للبشرة الملتهبة:

لو بشرتك ملتهبة وحمرا وبتعاني من حروق الشمس يبقى الماسك ده هو انسب ماسك ليكي.

اخلطي ربع كوباية زبادي كامل الدسم مع ربع كوباية خيار مفروم ومتقشر, معلقة كبيرة جل صبار الالوفيرا, معلقة كبيرة عسل نحل, وكام نقطة زيت بابونج, اخلطي المكونات كلها مع بعض كويس, حطي الخليط على البشرة وسيبيه ربع ساعة وبعدين اغسلي بشرتك بمية باردة.

6- ماسك الزبادي لعلاج حب الشباب:

اخلطي معلقة كبيرة زبادي مع معلقة كبيرة عسل نحل ومعاهم معلقة صغيرة عصير ليمون ومعلقة صغيرة كركم, اخلطي المكونات كلها مع بعض كويس وحطيه على البشرة وسيبيه ربع ساعة وبعدين اغسلي البشرة بمية دافية.

7- ماسك الزبادي لتفتيح البشرة:

اخلطي 2 معلقة كبيرة زبادي مع معلقة صغيرة عدس اصفر مطحون ومعلقة كبيرة عصير برتقان, اخلطي المكونات كويس وحطي الخليط على البشرة وسيبيه ربع ساعة وبعدين اغسلي بشرتك بمية دافية, ولو بشرتك جافة ممكن تضيفي على المكونات معلقة صغيرة عسل نحل.

8- ماسك الزبادي للجلد المجهد:

اخلطي 4 معلقة كبيرة زبادي مع معلقة كبيرة كاكاو ومعلقة كبيرة عسل نحل, اخلطي المكونات كويس وحطي الخليط على البشرة وسيبيه 20 دقيقة وبعدين اغسليه بمية دافية, الماسك ده بيجدد البشرة وبيخلي شكلها صحي.

9- ماسك لتقشير البشرة:

اخلطي 2 معلقة كبيرة زبادي مع معلقة كبيرة شوفان, اخلطيهم كويس ودلكي بشرتك بالخليط في حركات دائرية وبعدين اغسليه, الماسك ده هيخلصك من الجلد الميت وهيجدد البشرة.

عدد مرات الماسكات حسب نوع البشرة
عدد مرات الماسكات حسب نوع البشرة

– عدد مرات استخدام ماسكات الزبادي حسب نوع بشرتك:

الزبادي مالهاش اثار جانبية على البشرة ولكن عدد مرات عمل الماسكات بيختلف من بشرة للتانية حسب نوع البشرة.

– بالنسبة للبشرة الدهنية والمعرضة لحب الشباب:

ممكن تستخدمي الماسكات يوميا عشان تجيب معاكي افضل نتيجة.

– البشرة الجافة والعادية:

صاحبة البشرة الجافة ممكن تعمل ماسكات الزبادي من 2 ل 3 مرات في الاسبوع.

– البشرة اللي بتعاني من عدوى فطرية:

بالنسبة للبشرة اللي فيها مشاكل اوعدوى فطرية يطبقوا الماسكات من 4 ل 5 مرات في اليوم الواحد عشان يجيب معاهم افضل النتايج.

– نصايح قبل عمل اي ماسك من الزبادي:

 – بالنسبة للبشرة الحساسة ممكن تحس بوخز خفيف او حرقان شوية في الوش لما تحط ماسك الزبادي, ولو بشرتك حساسة اوي ممكن تحسي بحرقان جامد في الحالة دي اغسلي وشك مباشرة متسيبيش الماسك على وشك لان البشرة ممكن تلتهب, والبشرة كده تبقى حساسة من منتجات الالبان او حساسة من حمض اللبنيك او البروبيوتك او حمض الهيدروكسيل الفا او بيتا وبالتالي صاحبة البشرة دي مش هتقدر تستخدم ماسكات الزبادي, عشان كده من الافضل قبل ماسك الزبادي نعمل اختبار على جزء صغير من البشرة عشان نتأكد ان البشرة مش حساسة من منتجات الالبان.

– الافضل نستخدم الزبادي كاملة الدسم عشان تفيد البشرة اكتر وترطبها وتغذيها بشكل اكبر, ولو متوفرة زبادي اورجانيك او عضوية هتكون افضل كمان للبشرة ولو مش متوفرة يبقى نعمل بالزبادي العادية مافيش مشكلة خالص.

شوفوا كمان ماسكات من العسل لحل كل مشاكل البشرة و 11 وصفة من الكركم لجمال البشرة.