11 تسريحة شعر لو معندكيش وقت تغسليه!
طبعا كلنا بنحب نهتم بشعرنا و بنحاول نحافظ على نضافته وشكله على قد ما نقدر وعلى طول بنقعد ندور على تسريحات جديدة عشان نعملها ويبقى شعرنا دايما بلوك حلو وجديد ومختلف, لكن ساعات بيجي علينا اوقات مش بيكون عندنا وقت نهتم بيه بشكل كافي او نغسله بسبب الشغل او الدراسة او كسل في بعض الاحيان وعشان الشعر ميطلعش بشكل وحش احنا النهاردة جايبين لكل بنات حوا تسريحات شعر مخصوص لو معندكيش وقت تغسليه وهيطلع شكله حلو.
تعالوا نشوف مع بعض 11 تسريحة شعر لو معندكيش وقت تغسليه !
1- رفع الشعر في دقيقتين:
التسريحة دي حلوة جدا وبسيطة ومناسبة للصيف بما ان معظمنا بيحب يرفع شعره في الصيف عشان الحر والرطوبة, هنحط باندانا على الشعر تبقى زي العقال على الشعر ونبرم الشعر كله من ورا ونبدأ نلفه كله على الباندانا ونثبته بالبنس, وكده تبقى التسريحة خلصت بسيطة وسهلة جدا ومش هتاخد منك اكتر من دقيقتين في تنفيذها.
2- تسريحة الضفيرة مع الكحكة:
هناخد خصلة شعر من كل جنب ونضفرها ونعمل ضفيرة في كل جنب وبعدين نلم الضفيرتين على ورا مع باقي الشعر ونعملهم كحكة فوضوية منخفضة ونثبتها بالبنس والكحكة دي طالعة موضة جدا.
3- الضفيرة التاج:
قسمي شعرك الاول لنصين متساويين, وبعدين كل جنب قسميه اتنين واعملي ديل حصان ولميه بتوكة استك هيبقى عندك اربعة ديل حصان, وبعد كده ضفري كل ديل حصان لوحده واشبكيه باستك من تحت عشان الضفيرة متتفكش, هتاخدي كل ضفيرة وتلفيها على الشعر بالعكس يعني الضفيرة اللي ناحية اليمين لفيها على الشعر للجنب الشمال ونفس الطريقة للجنب التاني وكل ضفيرة ثبتيها بالبنس في الشعر, وكده تبقى التسريحة بتاعتنا خلصت وهيبقى شكل الضفاير زي شكل التاج على الشعر.
4- كحكة مع باندانا للشعر:
هنا في التسريحة دي هنعمل الكحكة بطريقة مختلفة ونديها شكل جديد اننا ندخل معاها الباندانا, هنعمل الشعر ديل حصان نلمه بالاستك وبعدين هنربط عليه الباندانا ونلفها على الشعر ونبرمه ونعمل الشعر كحكة ونثبته بالبنس هيطلع شكل الكحكة ملفوف مع الباندانا بشكل حلو جدا.
5- ضفاير البوهو:
التسريحة دي مناسبة جدا للشعر الطويل اوي, اقسمي شعرك نصين متساويين, وابدأي اعمل كل نص منهم ضفيرة واشبكيها بالاستك من تحت وممكن في جنب من الجناب تسيبي خصل رفيعة من قدام اعمليها ضفاير رفيعة ضفيرتين او تلاتة رفيعين مثلا وسيبيهم من قدام من غير ما تلميهم مع باقي الشعر او ممكن تلمي ضفيرة وتسيبي واحدة يعني حسب اختيارك واللوك اللي تحبيه اكتر, ومتخليش الضفاير محكومة اوي من فوق يعني خلي الضفيرة تبدأ من اول تحت الودن وخلي الشعر من فوق شكله فوضوي او منكوش شوية, وطبعا هنا شبكت الضفاير بتوك ريش عشان تديها اللوك البوهيمي او الافريقي شوية, وممكن تلبسي برنيطة زي ما هي عملت في اللوك او تسيبيه كده.
6- لم الشعر على الطريقة الفرنسية:
اقسمي الشعر تلت وتلتين وخدي جنب منهم طلعي منه خصلة من الجنب خليها لوحدها والجزء اللي ورا من الشعر امسكي كل خصلة منه سريحها بالمشط بالعكس لحد ما تخلصي الشعر كله عشان يبقى شكله منفوش, هنساويه بالمشط بالراحة عشان نحافظ على الشكل اللي احنا عملناه , هنلم الشعر كله على ورا ماعدا الخصلة اللي احنا سيبناها في البداية ونبرمه وندخله في بعضه ونثبته بالبنس, دلوقتي هناخد الخصلة اللي احنا سبناها لوحدها في البداية نسرحها بالمشط بالعكس عشان ننفشها ونلمها على ورا مع باقي الشعر ونثبتها بالبنس, والقوصه هنلمها بنفس الطريقة على ورا مع باقي الشعر ونثبتها بالبنس بردوا, وفي الاخر نرش مثبت شعر عشان نثبت التسريحة.
شوفي من هنا 21 تسريحة شعر بالبنس تعمليهم في دقايق.
7- تسريحة ديل الحصان مع الكحكة:
هنقسم الشعر نصين, هناخد الجزء اللي تحت نعمله ديل حصان, واللي فوق نعمله ديل حصان تاني, ونمسك الاتنين نلفهم مع بعض عكس بعض, وبعدين نعملهم كحكة ونثبتها بالبنس.
شوفي من هنا اكتر من 20 طريقة لعمل كحكة الشعر.
8- الضفيرة الجانبية:
التسريحة دي مفيهاش اي حاجة خالص انتي هتجيبي الشعر كله في جنب واحد اليمين او الشمال حسب ما تفضلي اكتر وتضفري الشعر على جنب واحد وخلي الضفيرة على واسع يعني مش محكومة اوي, ولو عندك قوصة وعايزة تلميها ممكن تلميها على ورا على الضفيرة وتثبتيها بالبنس.
9- تسريحة الكيرلي:
ممكن لو انتي شعرك عملاه استريت وعايزة تغيري شكله من غير ما تغسليه ممكن تعمليه كيرلي هتغيري الشكل وتديه لوك جديد.
شوفي من هنا 10 تسريحات تجنن للشعر الكيرلي و 7 طرق لعمل الشعر كيرلي في البيت.
10- شعر مفرود على ورا:
التسريحة دي مناسبة اوي للشعر القصير او الكاريه والطريقة سهلة جدا هترشي شعرك كله بمثبت الشعر ونسرحه كله على ورا بالمشط وبعدين واحنا بنسرح بالمشط نركز السيشوار على الشعر عشان نثبت التسريحة اكتر وفي الاخر ندهنه بالسيروم وبعد كده نركز عليه السيشوار تاني نحط ايدينا على الشعر عشان ميهش ونركز عليه السيشوار.
11- ضفيرة مع ديل الحصان للشعر القصير:
الطريقة سهلة جدا وبسيطة هتعملي ضفيرة جانبية من الجانبين وبعدين تلمي الضفيرتين مع بعض على ورا وتثبتيهم بالبنس مع بعض وبعدين تلمي باقي الشعر مع الضفيرتين وتعملي ديل حصان منخفض.
في كل التسريحات ممكن قبل ما تعملي التسريحة تستخدمي الشامبو الجاف على شعرك زي ما اتكلمنا عليه قبل كده وقولنا انه بيبقى بديل لغسيل الشعر تقدروا تعرفوا من هنا كل حاجة عن الشامبو الجاف وكمان ازاي تعملي الشامبو الجاف في البيت.
شوفي كمان تسريحات شعر تجنن للشعر القصير و 30 تسريحة شعر للشعر الخفيف والطويل هتبين شعرك اتقل !
