ازاي تخلي الفاونديشن او كريم الاساس يثبت طول اليوم ؟
الفاونديشن او كريم الاساس من الحاجات الاساسية في مكياجنا لانه بيغطي اي عيوب في البشرة وبيوحد لونها بس دايما بتقابلنا مشكلة لو خرجنا وهنقضي اليوم كله بره ان كريم الاساس مش بيدوم معانا طول اليوم وبيسيح وخصوصا كمان اننا داخلين على الصيف والحر والرطوبة ومكياجنا بيسيح بسرعة, عشان كده احنا النهاردة هنقول لكل بنات حوا حيلة هتخلي كريم الاساس يثبت معاكم طول اليوم.
ياللا نشوف سوا خطوات سهلة هتخلي كريم الاساس يثبت طول اليوم:
1- ارسمي فراشة بكريم الاساس في نص الوش:
اول خطوة هنعملها هنرسم شكل فراشة بكريم الاساس في نص الوش لان المنطقة دي هي اللي بتظهر الوش وبتديه اضاءه عشان كده لازم نركزعليها , الرسمة هتبقى في نص الجبهة وعلى طول الانف وعلى جانبي الانف ورسم شكل V في نص الدقن.
2- دمج كريم الاساس بصوابعك:
تاني خطوة هتدمجي كريم الاساس على بشرتك بصوابعك, هتبدأي تفرديه لبره على البشرة كلها عشان تساوي اللون على الوش كله وانتي بتفرديه اضغطي ضغط خفيف على البشرة عشان تدمجيه كويس وتخلي شكله مخملي على البشرة.
اتعرفوا من هنا على افضل انواع وماركات كريم الاساس.
3- حطي البودرة على منطقة التي زون T-Zone:
دلوقتي هنيجي للخطوة التالتة بعد ما دمجنا كريم الاساس كويس جدا على البشرة هنحط البودرة السايبة على منطقة التي زون T-Zone اللي هي الجبهة وعلى الانف والدقن لان زي ما قولنا هي دي المناطق اللي عايزين نظهرها اكتر وكمان دي اكتر المناطق اللي بيبقى فيها زيوت زيادة على البشرة وبيسيح فيها المكياج اسرع عشان كده هتحتاج اننا نهتم بيها اكتر عشان نطفي لمعتها ونقلل من الزيوت, هنحط البودرة بالفرشة ونوزعها كويس على البشرة.
اتعرفي من هنا على انواع البودرة وازاي تختاري اللي يناسبك.
4- استخدام مثبت المكياج:
اخر خطوة هنعملها هي مثبت المكياج بعد ما نخلص خطواتنا كلها هنرش مثبت المكياج على الوش, والمثبت مش بس لتثبيت المكياج هو كمان بيخلي لوك المكياج طبيعي وبيشيل اي زيادات في المكياج , وبيقلل من افراز البشرة للزيوت, اخر حاجة هنعمل اللمسة الاخيرة في المكياج نختار لون روج طبيعي عشان نظهر اللوك بتاعنا وندي حياة للمكياج.
كده نكون خلصنا الخطوات بتاعتنا كلها اللي هتخلي مكياجك يثبت طول اليوم خطوات بسيطة وسهلة جدا ومش محتاجة اي مجهود بس لو عملناها هتفرق كتير في مكياجنا ودي النتيجة النهائية.