10 تمارين لشد البطن وتخسيس الكرش

كل البنات اكيد بيحلموا بجسم صحي ورشيق ومن اكبر المشاكل اللي في بنات كتير بيعانوا منها هي منطقة البطن او الكرش كلنا بنتمنى يكون عندنا بطن مسطحة ومشدودة , عشان كده احنا النهاردة هنحل لكل بنات حوا المشكلة دي وجيبنالكم تمارين لشد البطن وتخسيس الكرش.

تعالوا نشوف مع بعض 10 تمارين لشد البطن وتخسيس الكرش:

1- التمرين الاول:

التمرين ده يعتبر من اكتر التمارين الفعالة في شد البطن, نامي على ضهرك وافردي الركبتين ومدي الذراعين , اتني الذراع الشمال خلف الراس وامسكي بيها ذراعك اليمين فوق منطقة الكوع , اتني ركبتك اليمين واضغطي بالقدم اليمين لجوه ناحية الرجل الشمال وتكون الرجل الشمال لتحت ناحية الارض, وبعدين هترفعي الكتف اليمين من على الارض ناحية الرجل الشمال مع رفع الرجل 45 درجة , ونكرر التمرين 15 مرة لكل جنب, طبعا مننساش الشهيق والزفير اثناء الحركة وركزي في شد البطن لجوه عند منطقة السرة وانتي بتعملي التمرين.

2- التمرين التاني:

التمرين ده بيركز على منطقة اسفل البطن , نامي على ضهرك , اتني الركبتين ناحية الصدر, قربي صوابع رجل من بعضها الزقيهم في بعض, وخلي الركبتين مفتوحين, مدي الذراعين لورا جنب الاذن , ارفعي منطقة الوركين لحد ما توصل الركبتين لحد منطقة الابطين, وبعدين ننزل الوركين على الارض في حركة بطيئة, ونكرر التمرين 20 مرة, واحنا بنعمل التمرين نركز على منطقة عضلات الحوض.

3- التمرين التالت:

التمرين ده مش بيشتغل على منطقة الوسط او البطن بس كمان بيحرق سعرات حرارية وبيصغر المعدة, اركعي على الايدين والركبتين وبعدين نمد الرجلين لورا واحنا ساندين على الايدين ومحافظين على استقامتهم, حركي منطقة الوركين في الهوا لقدام كانك هتنطي وبعدين ترجعيهم لورا تاني للوضع الاول, كرري التمرين 20 مرة, عشان نتيجة افضل اعملي الحركة بشكل سريع عشان تحرقي سعرات حرارية بشكل اكبر.

4- التمرين الرابع:

التمرين ده لمنطقة البطن وكمان منطقة الوركين والفخدين, اركعي على الايدين والركبتين , مدي الرجل اليمين لورا بشكل مستقيم على مستوى الورك, وبعدين اتني ركبتك اليمين ناحية الكتف اليمين, وبعدين ارجعي افردي رجلك تاني, كرري التمرين 15 مرة لكل جنب, وانتي بتعملي التمرين خلي المسافة بين الايدين والركبتين مناسبة عشان تبقى الحركة اسهل عليكي.

5- التمرين الخامس:

نامي على ضهرك , مدي الذراعين لورا وخليها مفرودة , ومدي رجلك لقدام وارفعيها شوية من على الارض , وافتحي الذراعين والرجلين على شكل X , ارفعي الوركين لفوق ومدي الذراعين لقدام وارفعي راسك من على الارض ناحية الساقين واضغطي بالذراعين على منطقة الوركين من الجنب, وبعدين افردي الساقين والذراعين وارجعي للوضع الاول, وكرري التمرين 20 مرة, مننساش الشهيق والزفير مع الحركة وشدي بطنك اثناء حركة رفع الراس والوركين.

6- التمرين السادس:

التمرين ده بيشتغل تقريبا على كل العضلات الاساسية في الجسم البطن والضهر وعضلات الفخدين, ابدأي بالجنب اليمين اسندي على الكوع اليمين وخليه في مستوى الكتف , ارفعي الذراع الشمال , اتني ركبتك اليمين وخليها ناحية الفخد الشمال من جوه والرجل الشمال تكون مفرودة والقدم على الارض, وبعدين تفتحي الركبة اليمين بعيد عن الفخد الشمال بس خلي وضع القدم زي ما هو ناحية الفخد, كرري التمرين 10 مرات لكل جنب.

7- التمرين السابع:

التمرين ده بيشتغل على منطقة جدار البطن, اقعدي على الارض واتني الركبتين وخلي ايديك على الارض ورا الوركين, ارجعي بجسمك لورا وانتي سانده على ايدك ومدى الساقين لقدام وخليها مرفوعة عن الارض مع تني الركبتين, وبعدين نرجع للوضع الاول, ونكرر التمرين 20 مرة, ونركز اثتاء التمرين على عضلات البطن.

8- التمرين التامن:

التمرين ده بيشتغل على منطقة البطن وكمان بيحرق سعرات حرارية من الجسم كله, اقفي بشكل مستقيم, اشبكي ايديكي الاتنين مع بعض وخليهم ناحية الكتف اليمين وبعدين نطي وانزلي لتحت بجسمك وحركي ايديكي ناحية اعلى منطقة الفخد الشمال, كرري التمرين 10 مرات لكل جنب, وخلال التمرين كل ما كانت النطه اعلى ده هيحرق سعرات حرارية اكتر.

9- التمرين التاسع:

اقفي على رجلك اليمين والرجل الشمال ارفعي القدم من ورا وخلي الصوابع على الارض, اشبكي ايديكي الاتنين مع بعض وخليهم فوق الكتف اليمين, اتني ركبتك الشمال وارفعيها ناحية الكتف اليمين, ونزلي ايديكي وهما مشبوكين في بعض ناحية اعلى الفخد الشمال, كرري التمرين 10 مرات لكل جنب.

10- التمرين العاشر:

نامي على ضهرك واتني الركبة اليمين ومدي الرجل الشمال على الارض, مدي الذراع اليمين لفوق وبعدين اقعدي ومدي ايدك الشمال لقدام ناحية القدم, وبعدين ارجعي للوضع الاول, كرري التمرين 15 مرة لكل جنب, وممكن تستخدمي في التمرين دمبل عشان يديكي نتيجة احسن.

شوفوا معانا كمان تمارين السكوات لنحت وشد المؤخرة والارداف و طرق طبيعية لتخسيس منطقة الوسط والكرش.