ازاي تتخلصي من المسام السودا في الرجل بطرق طبيعية ؟
مشكلة بيعاني منها كتير من البنات وهي المسام السودا في الرجل بتبقى عبارة عن نقط سودا بتظهر في الرجل وبتكون واضحة جدا خصوصا على البشرة البيضا وبتخلي شكل الرجل مش حلو اسمهما بالإنجليش “strawberry legs” عشان الرجلين بيبقي فيها نقط سودا زي الفراولة بظبط , والنقط دي بتبقى مسام مفتوحة بتتكون فيها بكتيريا وبيتراكم فيها زيوت زيادة فاللي ان الزيوت دي بتتفاعل مع الاكسجين في الجو ومسام البشرة بتتسد وده بيسبب ظهور المسام او النقط السودا.
في بنات عشان يداروا المسام دي بيختاروا حل سريع انهم يحطوا عليها مكياج او كريم الاساس اللي بيكون مخصص للجسم وبيداري عيوب البشرة, لكن الحل ده وان كان سريع وسهل بس هو مش حل جذري هو حل مؤقت للمشكلة انك تداريها بس لكن مش هتعالجيها ده غير انه ممكن المشكلة تزيد لان المكياج ممكن يسد المسام ويخلي البشرة تلتهب والمشكلة تزيد اكتر , وكمان غير ان الهدوم هتتبهدل من المكياج.
– اسباب ظهور المسام السودا في الرجل:
من اسباب ظهور المسام الواسعة على الرجل هي ازالة الشعر بمكنة الحلاقة لانها بتفتح بوصيلات الشعر وده بيخلي الزيوت والجلد الميت يتراكم في المسام وبيسبب ظهور النقط السودا, عشان كده لو لاحظتي ان النقط دي ظهرت لك بعد حلاقة الشعر بالمكنة لازم توقفي الطريقة دي خالص في ازالة الشعر.
– طيب ايه هي بدائل مكنة الحلاقة لازالة الشعر؟
الحلاقة بالرغم انها من اسهل واسرع الطرق لكن زي ما قولنا مادام بتسبب ظهور النقط السودا يبقى الافضل نستبدلها بطريقة تانية ومن الطرق اللي ممكن نستخدمها ازالة الشعر بالكريم, او بالشمع , او بالليزر لو عايزة تخلصي من المشكلة خالص وتشيلي الشعر بشكل نهائي.
– من اسهل الطرق اللي ممكن تستخدميها لازالة الشعر هي الكريمات هي طريقة سهلة ورخيصة جدا , بس بتفردي الكريم على الرجل وتسيبيه دقايق بس وبعدين تشيلي هتلاقي الشعر كله طلع والافضل انك تستخدمي نوع كريم يكون في بمكوناته صبار عشان يرطب البشرة وكمان هيبقى مناسب جدا للبشرة الحساسة , ممكن تستخدموا كريم فيت لازالة الشعر حلو جدا, ونازل منه انواع مناسبة لكل نوع بشرة, و.
– ازالة الشعر بالشمع كمان من الطرق السهلة جدا واللي مش بتسبب مشاكل للبشرة, بيتباع في الصيدلية بيكون عبارة عن شرايط شمع بتتفرد على الرجل وبتشيل الشعر, كمان فيت نازل منها شرايط شمع ممكن تستخدموها ونازل منه كمان انواع مناسبة لكل نوع بشرة,.
شوفوا من هنا وسائل ازالة الشعر الزائد وازاي تختاري اللي يناسبك.
– وصفات طبيعية للتخلص من المسام السودا:
عشان نحمي الرجل من ظهور المسام السودا لازم نحافظ على نضافة المسام عن طريق تقشير الرجل بانتظام عشان نتخلص من الجلد الميت ونحمي المسام من انها تتسد.
1- اخلطي 2 معلقة كبيرة سكر مع 4 معالق كبيرة زيت زيتون ودلكي الرجل بالخليط بليفة خشنة في حركات دائرية لمدة دقايق وبعدين اشطفي الرجل بمية دافية وبعدين مية باردة عشان تقفلي المسام.
2- اخلطي معلقة كبيرة من صودا الخبز “كربوناتو” مع معلقة كبيرة مية دافية هيبقى عندك خليط عبارة عن عجينة بيضا دلكي بيها الرجل زي ما قولنا في الوصفة اللي فاتت.
3- هاتي كمية مناسبة من الملح وحطي عليهم شوية لبن لحد ما يتكون عندك معجون دلكي بيه رجلك.
4- اخلطي 2 معلقة كبيرة من السكر البني مع 2 معلقة كبيرة من جل الصبار ومعلقة صغيرة عصير ليمون قلبي المكونات كويس مع بعض ودلكي بيهم الرجل.
5- اخلطي كميات متساوية من السكر البني وصودا الخبز “كربوناتو” مع شوية مية لحد ما تتكون عندك عجينة وهندلك بيها الرجل.
6- ممكن نستخدم الزيوت العلاجية او الكريمات ونعمل بيها مساج للرجل عشان نزود الدورة الدموية ونحافظ على الجلد رطب, ممكن تضيفي كام نقطة جلسرين على كام نقطة من فيتامين E وزيت الجوجوبا او زيت جوز الهند واعملي بيهم تدليك للرجل.
7- قشري خيارة واهرسيها كويس وخدي عصير الخيار اللي هيطلع ادهني بيه الرجل وسيبيه ربع ساعة وبعدين اغسليه مع الاستمرار على الوصفة دي هتقلل المسام السودا جدا.
8- ضيفي كام نقطة من زيت شجرة الشاي مع معلقتين زيت زيتون ودلكي بيهم الرجل لمدة دقايق.
9- ضيفي كام نقطة من زيت خشب الصندل مع زيت الزيتون او زيت جوز الهند ودلكي بيهم الرجل.
10- ضيفي كميات متساوية من عصير الليمون وعصير الخيار ومية الورد وادهني رجلك بالخليط وسيبيه ربع ساعة وبعدين اغسليه.
11- ادهني رجلك ببياض البيض وسيبيه لحد ما ينشف وبعدين اغسليه بمية باردة.
الخلطات دي كلها هتساعد جدا في تقليل وعلاج المسام السودا لانها بتقشر الجلد وكمان هترطب الجلد جدا وتحميه من الجراثيم والبكتيريا اللي بتتسبب في انسداد المسام وظهور النقط السودا, وبالنسبة للخلطات اللي فيها السكر لو بشرتك حساسة استخدمي السكر البني هيكون افضل للبشرة من السكر الابيض.
شوفوا كمان ازاي نمنع الحبوب عند ازالة الشعر
