13 طريقة طبيعية لاظافر صحية واقوى واحلى

ريهام محمود
ريهام محمود
في
أظافر
7199

كلنا بنبقى عايزين ضوافرنا دايما شكلها حلو وصحي وبنحاول نهتم بيها على قد ما نقدر لكن بتقابلنا مشاكل كتير في الضوافر زي ضعف الضوافر وتكسرها وتشققها او تغيير لونها بسبب المانيكير او شغل البيت النهاردة هنقولكم حلول طبيعية لكل المشاكل دي.

تعالوا نعرف مع بعض 13 طريقة طبيعية لضوافر صحية:

– مشكلة الضوافر الضعيفة:

1- كلي بروتين بشكل كافي:

لو ضوافرك ضعيفة لازم تتأكدي انك بتدخلي في نظامك الغذائي بروتين بشكل كافي وان جسمك بياخد كمية البروتين اللي لزماه لان صحة الضوافر او البشرة او الشعر زي ما قولنا قبل كده اكتر من مرة انها بتبدأ من جوه الاول.

متوسط نسبة البروتين اللي لازم ياخدوا الجسم بالنسبة للاشخاص البالغين هو من 45 ل 56 جرام من البروتين يوميا, ومن الاغذية اللي ممكن تمدك بالبروتين اللي لازمك هي:

– 100 جرام من الفراخ : هتديكي 28 جرام بروتين.

– 100 جرام لحمة : 26 جرام بروتين.

– بيضة : 6 جرام بروتين.

– 100 جرام سلمون او تونة : 22 جرام بروتين.

– نص كوباية فاصوليا : من 7 ل 11 جرام بروتين.

– نص كوباية بسلة : 4 جرام بروتين.

– نص كوباية سبانخ : 3 جرام بروتين.

– 29 جرام مكسرات : من 4 ل 9 جرام بروتين.

– 170 جرام زبادي : 18 جرام بروتين.

– 29 جرام جبنة خالية من الدسم : 200 جرام بروتين.

دي تقريبا اكتر الاكلات الغنية بالبروتين اللي لازم تدخل في نظامك الغذائي عشان تحافظي على ضوافرك صحية وقوية.

2- احصلي على البيوتين:

البيوتين هو فيتامين B اللي لازم يكون في نظامك الغذائي لانه بيزود نسبة الكيراتين اللي هو يعتبر البروتين الطبيعي في جسمنا اللي بيشكل الجلد والشعر والضوافر ولما ترتفع نسبة الكيراتين ده هيساعد على ان الضوافر تكون صحية واقوى عشان كده لازم نحصل على فيتامين B بنسبة كافية, وفيتامين B هنلاقيه موجود في اللحوم , وصفار البيض , وفول الصويا , والسمك , والحبوب الكاملة.

الاكلات الغنية بالبروتين والبيوتين
الاكلات الغنية بالبروتين والبيوتين

– مشكلة تشقق وانقسام الضوافر:

3- كلي دهون صحية وكالسيوم:

لو ضوافرك بتتشقق يبقى كده انتي عندك نقص كالسيوم , عشان كده لازم تدخلي في نظامك الغذائي الاكلات الغنية بالكالسيوم والاحماض الدهنية الاساسية اللي هي الاوميجا 3 لانها بتساعد على تقوية الضوافر وبتحميها من التشقق.

ومن الاكلات الغنية بالكالسيوم الزبادي , والجبنة , واللبن , وفول الصويا , السردين , سمك السلمون , الخضار الورقي اللي لونه اخضر, ومن الاكلات الغنية بالاحماض الدهنية او الاوميجا 3 هي الافوكادو , البيض , المكسرات , والاسماك الدهنية زي السلمون والسردين والتونة, وممكن تضيفي لاكلك يوميا مع السلطة مثلا معلقة كبيرة زيت بذور الكتان ده هيقوي الضوافر جدا وهتحسي بالفرق مع الاستمرار.

اكلات غنية بالكالسيوم والاحماض الدهنية الاوميجا 3
اكلات غنية بالكالسيوم والاحماض الدهنية الاوميجا 3

4- ابردي ضوافرك في اتجاه واحد:

من الحاجات اللي بتخلي الضوافر تتشقق وتنقسم هو بردها في اتجاهين, عشان كده الطريقة الصحيحة لبردها عشان تحافظي عليها سليمة وتحميها من التشقق هو انك تبرديها في اتجاه واحد.

ابردي الضوافر في اتجاه واحد
ابردي الضوافر في اتجاه واحد

– مشكلة الضوافر الجافة:

5- استخدمي جوانتي عند التنضيف:

من اكتر الحاجات اللي بتأثر على الضوافر وبتضعفها وبتخليها جافة هي المنظفات اللي بنستخدمها في تنضيف البيت او غسيل المواعين لان فيها مواد كيميائية بتأثر على الضوافر وبتضعفها , عشان كده لازم تلبسي جوانتي عشان تحميها ومتعرضيهاش  للمواد اللي ممكن تضرها.

البسي جوانتي عند التنضيف
البسي جوانتي عند التنضيف

6- تعرض الضوافر للمية زيادة عن اللزوم:

تعرض الضوافر للمية بشكل مستمر ده بيخليها جافة وبيضعفها ومن ناحية تانية شرب المية مفيد وبيقويها يعني المية في الحالة دي سلاح ذو حدين يعني شربها مفيد وهيساعد على تقوية الضوافر لكن تعريض الضوافر للمية هيضعفها ويخليها جافة, يعني اشربي مية كتير وعرضي ايدك للمية بشكل قليل عشان تحافظي عليها.

7- رطبي ضوافرك:

كل ما تغسلي ايدك او تعرضيها للمية لازم ترطبيها بالكريم المرطب على طول عشان تحافظي على رطوبتهم, او تنقعي ضوافرك في زيت زيتون يوميا لمدة 10 دقايق ده علاج هايل جدا وفعال للضوافر الجافة, وابعدي خالص عن اي منتجات يكون فيها كحول.

رطبي ضوافرك
رطبي ضوافرك

8- ابعدي عن مزيلات طلاء الضوافر القوية:

مزيل طلاء الضوافر او المانيكير من الحاجات اللي ممكن تسبب جفاف الضوافر وبتضعفها جدا وتخليها تتشقق خصوصا الانواع اللي فيها اسيتون, عشان كده حاولي تستخدمي انواع فيها بروتين وتكون خالية من مادة الاسيتون, وادهني ضوافرك بزيت اللوز الحلو عشان تغذيهم وتقويهم.

– مشكلة البقع البيضا:

9- احصلي على الزنك في نظامك الغذائي:

من المشاكل اللي بتظهر كتير على ضوافرنا وفي كتير بيعانوا منها ومش بيبقوا عارفين سببها هي البقع البيضا والبقع دي بيكون سببها نقص الزنك, عشان كده لازم تدخلي الزنك في نظامك الغذائي وهتلاقيه موجود في اللحوم , والاسماك , والحبوب الكاملة, والمكسرات, والخضروات الجذرية زي الجزر واللفت والفجل والقلقاس.

الاكلات الغنية بالزنك
الاكلات الغنية بالزنك

– مشكلة فطريات الضوافر:

10- جربي زيت شجرة الشاي:

من المشاكل اللي بتحصل مع كتير مننا هي فطريات الضوافر وبتكون مشكلة صعب حلها وبتاخد وقت, لكن من الحاجات اللي اثبتت فعاليتها في علاج فطريات الضوافر هو زيت شجرة الشاي حطي منه على ضوافرك من نقطة لنقطتين كل يوم لعلاج الفطريات.

زيت شجرة الشاي
زيت شجرة الشاي

11- متقطعيش الجلد اللي حوالين الضوافر:

لو انتي بتعملي مانيكير لنفسك في البيت متقطعيش الجلد اللي حوالين الضوافر لان ده بيسمح بدخول الفطريات والبكتريا للضوافر , افضل حاجة انك تدهني الجلد باي زيت مرطب وتدلكيهم وتزقي الجلد لورا بس من غير ما تقطعيه.

متقطعيش الجلد اللي حوالين الضوافر
متقطعيش الجلد اللي حوالين الضوافر

– وصفة طبيعية ممكن تعمليها لعلاج فطريات الضوافر:

ضيفي 5 نقط من زيت شجرة الشاي وعليهم 5 نقط زيت اكليل الجبل ونقطتين زيت الاوريجانو و250 جرام “طين البنتونيت” او طين البحر الميت ” كل المكونات هتلاقوها عند العطار” تمزجوا كل المكونات مع بعض كويس بمعلقة خشب مش معدنية وبعدين حطي البودرة في اي برطمان عندك واستخدميه يوميا رشي منه على ضوافرك وممكن ترشي منه جوه الجزمة بعد ما ترجعي من بره عشان يمتص الرطوبة ويمنع تكون الفطريات فيها, وغيروا دايما الشرابات باستمرار واستخدموا شرابات نضيفة.

مسحوق علاج فطريات الضوافر
مسحوق علاج فطريات الضوافر

– مشكلة الضوافر الصفرا:

12- استخدمي سكراب لتبييض الضوافر:

عشان نحل مشكلة الضوافر الصفرا ممكن نعمل سكراب بسيط جدا هنضيف شوية مية اكسجين ومعاهم شوية من صودا الخبر “كربوناتو” لحد ما تكون عندنا عجينة وندلك بيها الضوافر ونسيبها دقايق وبعدين نغسل الضوافر, الوصفة دي بتساعد جدا على تبييض الضوافر.

سكراب لتبييض الضوافر
سكراب لتبييض الضوافر

13- خلي ضوافرك تتنفس:

الضوافر زي الشعر والبشرة محتاجة انها تتنفس وترتاح يعني زي ما بنريح بشرتنا من المكياج وشعرنا من الصبغة نريح ضوافرنا من المانيكير مش لازم نحط باستمرار عشان ندي فرصة لضوافرنا انها تتنفس لانها ده هيساعد انها تبقى صحية اكتر واقوى ولونها ابيض طبيعي لان المانيكير الكتير بيسيب بقع على الضوافر وبيغير لونها مع الوقت عشان كده من الافضل اننا نحط مانيكير على فترات مش باستمرار.

خلي ضوافرك تتنفس
خلي ضوافرك تتنفس

شوفي كمان 23 حيلة ونصيحة لوضع المانيكير !

حيل ونصايح لوضع المانيكير
حيل ونصايح لوضع المانيكير

مقالات متعلقه

بمكون واحد من مطبخك هيساعدك على تطويل وتبييض ضوافرك

بمكون واحد من مطبخك هيساعدك على تطويل وتبييض ضوافرك

12 قاعدة بسيطة هتساعدك في الحصول على باديكير مثالي

12 قاعدة بسيطة هتساعدك في الحصول على باديكير مثالي

ازاي تنضفي تحت اظافر الايدين والقدمين, ونصايح للعناية اليومية بالاظافر

ازاي تنضفي تحت اظافر الايدين والقدمين, ونصايح للعناية اليومية بالاظافر