روتينك اليومي للعناية ببشرتك قبل النوم
الاهتمام اليومي ببشرتك لازم تكون من اساسيات يومك عشان تحفظي عليها دايما صحية ونضرة, وفي خطوات لازم نعملها كل يوم قبل النوم هنقولك عليها ودي تبقى روتينك اليومي للعناية ببشرتك لانها هتفرق معاكي جدا ولو مشيتي عليها هتصحى الصبح تلاقي بشرتك منورة, نضره وشكلها صحي جدا.
تعالوا نعرف سوا روتينك اليومي للعناية ببشرتك قبل النوم:
1- ازالة المكياج:
ازالة المكياج قبل النوم من الحاجات المهمة جدا اللي لازم منهملهاش ابدا لان للاسف في بنات كتير بيرجعوا البيت يكسلوا يشيلوا المكياج ويناموا بيه لكن دي من اكتر الحاجات اللي ممكن تبوظ بشرتنا وتجهدها لاننا لو سيبنا المكياج على بشرتنا ونمنا بيه هيسد المسام وده هيسبب لنا مشاكل في البشرة منها ظهور الحبوب والبثور ده غير ان البشرة طول الليل مش هتتنفس وهتصحي الصبح هتلاقي شكلها تعبان ومجهد جدا, عشان كده لازم يوميا قبل ما تنامي تشيلي اي مكياج على وشك ومتنسيش الرقبة ومنطقة الصدر لو كنتي حاطة عليهم مكياج, استخدمي مزيل مكياج مناسب لبشرتك, ممكن تستخدموا مزيل مكياج ميسيلار من غارنييه حلو جدا ويمشي مع كل انواع البشرة, الموضوع مش هياخد منك اكتر من ثواني بس الثواني دي هتفرق مع بشرتك جدا.
2- تنضيف وتطهير البشرة:
خطوة المنظف بتكون قبل ازالة المكياج بمزيل المكياج يعني ننضف بشرتنا بالمنظف وبعدين بالمزيل, اختاري الغسول او المنظف المناسب لبشرتك , افركي بشرتك كويس بالمنظف عشان تزيلي اي اتربه او اوساخ لازقة على البشرة.
– بالنسبة للبشرة الجافة : اختاري غسول يساعد على ترطيب بشرتك يكون كريمي ومكوناته فيها مرطبات للبشرة زي غسول غارنييه “Garnier Skin Care Clean” ده مرطب ومغذي للبشرة, وغسول “Deep Clean” من نيتروجينا.
– البشرة الدهنية : استخدمي غسول ينضف بشرتك بعمق عشان يزيل الاتربة والدهون الزيادة من البشرة , زي غسول “كلير آند كلير” للتحكم في اللمعان , غسول “بيور اكتيف” من غارنييه.
– البشرة المختلطة : البشرة دي اللي بتجمع ما بين الدهنية عند منطقة التي زون “T-Zone” وباقي البشرة عند الخدود بتكون جافة وانسب حاجة انك تستخدمي نوعين منظف واحد للبشرة الدهنية في الاماكن الدهنية ومنظف تاني للاماكن الجافة, ولو مش هتقدري تستخدمي نوعين ممكن تستخدمي من الانواع المخصوص للبشرة المختلطة في ماركات دلوقتي عاملة منتجات تناسب البشرة المختلطة زي غسول “غارنييه” وغسول “نيفيا”.
– البشرة الحساسة : البشرة الحساسية بتتأثر من اي حاجة بسرعة وبتلتهب وبتحمر, عشان كده انسب منظف ليكي اللي مكوناته فيها زيوت نباتية خفيفة على البشرة لان الزيوت دي مهدئة للبشرة زي غسول “نيفيا”.
– البشرة المعرضة لحب الشباب : بالنسبة للبشرة اللي فيها حبوب او معرضة لحب الشباب بتكون محتاجة لمنظفات تنضف البشرة بعمق وكمان تعالج مشكلة حب الشباب, من انسب المنظفات للبشرة دي غسول “Oil Free Acne” من نيتروجينا وغسول “كلير آند كلير”.
شوفي من هنا ازاي تعرفي نوع بشرتك وازاي تهتمي بيها.
3- تطبيق علاجات وترطيب البشرة:
طبعا الخطوة دي مهمة جدا بعد تنضيف البشرة وازالة المكياج لازم اخر حاجة نعملها اننا نرطب بشرتنا, ولو بتستخدمي اي علاجات لبشرتك زي علاجات التجاعيد او البقع او لتفتيح البشرة حطيها هي الاول على البشرة, وبعدين حطي كريم العين, واخر حاجة طبقة كريم مرطب.
اعرفي من هنا افضل انواع مرطب البشرة حسب نوع كل بشرة.
ودلوقتي بقى تقدري تروحي تنامي بعد ما خلصتي الخطوات دي هي مش صعبة خالص ومش هتاخد منك وقت وزي ما قولنا كلها دقايق بسيطة قبل النوم لكن هيفرقوا مع بشرتك جدا.
